Հիւսիսային Քորէա «Մեծ Ցաւ Ու Տառապանք» Կը Խոստանայ Միացեալ Նահանգներուն

 

ՄՈՍԿՈՒԱ, «ՌԻԱ Նովոսթի».- Հիւսիսային Քորէա յայտարարած է, թէ Միացեալ Նահանգներու կողմէ պատժամիջոցները եւ ճնշումը մուտք կը գործեն «չափազանց անխոհեմ փուլ», եւ զգուշացուց, որ պատրաստ է այդ գծով աննախադէպ քայլերու դիմելու: Հիւսիսային Քորէայի արտաքին գործոց նախարարութեան յայտարարութեան մէջ նշուած է, թէ Ուաշինկթըն կը շահագործէ ՄԱԿի Ապահովութեան խորհուրդը, անոր միջոցաւ խստացնելու համար Հիւսիսային Քորէայի դէմ պատժամիջոցները՝ հիւլէական վերջին փորձերուն պատճառով:

Երկրի արտաքին գործոց նախարարութիւնը շեշտած է նաեւ, որ «գերհզօր ջրածնային զէնք»ը ստեղծուած է Միացեալ Նահանգներու կողմէ աճող թշնամական գործողութիւնները զսպելու եւ Քորէական թերակղզիին վրայ հիւլէական պատերազմը կանխարգիլելու համար:

Փիոնկիանկ նաեւ յայտնած է, որ ուշադիր կը հետեւի Միացեալ Նահանգներու գործողութիւններուն եւ պատրաստ է «մեծ ցաւ ու տառապանք» պատճառող պատասխան մը տալու:

Նախարարութիւնը աւելցուցած է, որ «ամբողջական ոչնչացումէ խուսափելու համար», Միացեալ Նահանգները պէտք է դադրեցնէ Հիւսիսային Քորէայի հետ քաղաքական, տնտեսական եւ զինուորական ճակատումը:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top