Հանգիստ Նարեկ Ա. Քհնյ. Շրիգեանի

0914Der Nareg Shrikian

0914Der Nareg Shrikian

ԼԱ ՔՐԵՍԵՆԹԱ.- Միացեալ Նահանգներու Արեւմտեան թեմի առաջնորդ Մուշեղ արք. Մարտիրոսեան, հոգեւորականաց դասը, Կրօնական ժողովն ու Ազգային վարչութիւնը խոր ցաւով կը գուժեն թեմի բազմավաստակ հոգեւորականներէն՝ Նարեկ Ա. քհնյ. Շրիգեանի վախճանումը, որ տեղի ունեցաւ Երեքշաբթի, Սեպտեմբեր 12ին։

Վախճանեալ քահանայ հօր ծառայական վաստակը կ՛երկարի աւելի քան 60 տարիներու վրայ. ան ծնած էր Մուսա լեռ, 1926ին, Մովսէս քահանայի յարկին ներքեւ, եւ հասակ առած անոր շունչին տակ։ 50ական թուականներու սկիզբը մուտք գործած էր Կիլիկիոյ կաթողիկոսութեան Դպրեվանքը եւ հետեւած քահանայից պատրաստութեան դասընթացքին։ Քահանայ ձեռնադրուած էր 1955ին. ծառայութեան առաջին անդաստանը եղած էր Այնճարը, ուր պաշտօնավարած էր իբրեւ Ս. Պօղոս եկեղեցւոյ հոգեւոր հովիւ. հիմնական դեր ունեցած էր նոր եկեղեցւոյ կառուցման մէջ, միաժամանակ վարելով Ազգային Յառաջ վարժարանի տնօրէնութեան պաշտօնը՝ վարժարանը օժտելով երկրորդական բաժինով։

1963ին տեղափոխուած էր Միացեալ Նահանգներու Արեւմտեան շրջանը ու յաջորդ տասնամեակներուն, իբրեւ հոգեւոր հովիւ ծառայած էր Սան Ֆրանսիսքոյի Ս. Գրիգոր Լուսաւորիչ, Էնսինոյի Ս. Նահատակաց, Հոլիվուտի Ս. Կարապետ, Օրենճ Քաունթիի Հայց. առաքելական եկեղեցւոյ (յետագային՝ Ս. Քառասնից Մանկանց), Մոնթեպելլոյի Ս. Խաչ եւ Կլենտէյլի Ս. Աստուածածին եկեղեցիներու ծխական համայնքներուն, միաժամանակ վարելով ուսուցչական եւ տնօրէնի պաշտօններ։

Երկար տարիներ անդամակցած է թեմի Կրօնական ժողովին եւ վարած անոր ատենապետի պաշտօնը։

Տէր հայրը եղած է եկեղեցաշէն եւ դպրոցաշէն՝ գործնապէս նպաստելով թեմի եկեղեցիներու հիմնադրութեան ու շինութեան եւ վարժարաններու ընդարձակման։ Գործած է անսակարկ նուիրումով, վայելած է թեմի ժողովականութեան ու հաւատացեալ ժողովուրդի սէրն ու համակրանքը. աւելին, եղած է բարերար եւ իր արդար վաստակէն բաժին հանած է Դպրեվանքին ու հայ դպրոցին, իբրեւ երախտագիտութեան գործնական արտայայտութիւն՝ եկեղեցիին ու ազգին հանդէպ։

Նարեկ Ա. քահանայի վերջին օծման ու թաղման կարգերը տեղի պիտի ունենան յընթացս Ս. պատարագի, Երկուշաբթի, Սեպտեմբեր 18ին, կէսօրէն առաջ ժամը 11ին, Կլենտէյլի Ս. Աստուածածին եկեղեցւոյ մէջ, ապա վախճանեալ քահանայ հօր մարմինը պիտի հանգչի Հոլիվուտ Հիլզի «Ֆորեսթ Լոն» գերեզմանատան մէջ։

«Այս տխուր առիթով, առաջնորդ սրբազանը, հոգեւոր դասը, Կրօնական ժողովը, Ազգ. վարչութիւնն ու Արեւմտեան թեմի մեծ ընտանիքը կը ցաւակցին վախճանեալ տէր հօր զաւակներուն՝ Ցոլակին, Նեկտարին, Սալբիին, Նայիրիին, քրոջ՝ Սօսի Պիտանեանին, եւ անոնց ընտանեկան հարազատներուն։ Յիշատակն արդարոյն օրհնութեամբ եղիցի», նշուած է առաջնորդարանի դիւանին յղած հաղորդագրութեան մէջ։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top