Քրտական Ինքնավար Մարզի Անկախութեան Հանրաքուէն Պիտի Յետաձգուի՞

0914barzani

0914barzani

ԵՐԵՒԱՆ, «Էրմենիհապեր».- Իր տեղեկութիւնները Հիւսիսային Իրաքի Քրտական ինքնավար մարզի կառավարութեան գլխաւոր ընդդիմադիր՝ «Փոփոխութիւն» շարժումին պատկանող կայանէն քաղելով, թրքական «Հիւրրիյէթ» թերթը Սեպտեմբեր 13ին գրած է, թէ Սեպտեմբեր 25ին նախատեսուած նշեալ մարզին անկախութեան հանրաքուէն կրնայ յետաձգուիլ՝ Իրանի եւ Միացեալ Նահանգներու բանեցուցած ճնշումներուն իբրեւ հետեւանք։

Ըստ նոյն աղբիւրին՝ Քրտական ինքնավար մարզի նախագահ Մասուտ Պարզանիի հետ մէկ օր առաջ անջատ հանդիպումներ ունեցած են իրանցի եւ ամերիկացի բարձրաստիճան պաշտօնատարներ, որոնք, յետաձգման դիմաց, Պարզանիին խոստացած են ապահովել քիւրտերուն համար աւելի նպաստաւոր համաձայնագիր մը՝ Պաղտատի հետ։

Նշենք, որ Իրաքի խորհրդարանը, Սեպտեմբեր 12ին, Քրտական ինքնավար մարզի անկախութեան հանրաքուէին դէմ քուէարկեց: Խորհրդարանը որոշեց վարչապետ Հայտար Ապատիէն պահանջել՝ Իրաքի միասնականութիւնը պահպանելու համար անհրաժեշտ որեւէ՛ միջոցառում որդեգրել եւ առկախ հարցերու լուծման համար լո՛ւրջ երկխօսութեան սկսիլ: «Մայատին» կայանը կը հաղորդէ, որ քիւրտ երեսփոխանները, քուէարկութեան պատճառով, հեռացած են խորհրդարանի այդ նիստէն:

Պարզանի, իր կարգին, խստօրէն քննադատեց Իրաքի խորհրդարանին սոյն որոշումը։

Իրաքի արտաքին գործոց նախկին նախարար եւ Քրտական ինքնավար մարզի նախագահի խորհրդական Հոշիար Զիպարի յայտնեց, որ այդ մերժումը «պարտադիր չէ՛», աւելցնելով, որ Սեպտեմբեր 14ին Քրտական ինքնավար մարզի խորհրդարանը, 2015ի Հոկտեմբերէն ի վեր առաջին անգամ ըլլալով ժողով մը պիտի գումարէ՝ հակադարձելու համար Իրաքի խորհրդարանին որդեգրած որոշումին։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top