Թուրքերը Կը Հերքեն Ցեղասպանութեան Մասին Բոլոր Ապացոյցները, Իսկ Ատրպէյճանցիները՝ Կաշառքի Հետ Առնչուածները

Harout-Sassounian

 

ՅԱՐՈՒԹ ՍԱՍՈՒՆԵԱՆ

 

Harout-SassounianՀակառակ ներկայացուած բոլոր տեսակի ապացոյցներուն, աւելի քան դարէ մը ի վեր թրքական կառավարութիւնը կը շարունակէ հերքել Հայոց Ցեղասպանութիւնը գործադրած ըլլալու իր յանցանքը՝ մնայուն կերպով պնդելով, որ այդ բոլորը կեղծիք են:

Նոյն ձեւով, եւ հակառակ Ատրպէյճանի ղեկավարութեան ներկայացուած բոլոր ապացոյցներուն՝ կաշառատուութեան եւ փտախտի գործունէութեան մէջ իր միլիառաւոր տոլարներու չարաշահման գծով, ատրպէյճանական կառավարութիւնը միշտ կը հերքէ փաստերը եւ կը մեղադրէ «այլ երկիրներ», հայերն ու որոշ անհատներ, զորս կը նկատէ իրեն դէմ եղողներ…

Անցեալ շաբաթը բացառութիւն չէր: «Կարտիըն»ը եւ աշխարհի քանի մը տասնեակ այլ թերթեր հաղորդեցին, որ Ատրպէյճանի կառավարութիւնը 2012էն 2014, աւելի քան 3 միլիառ տոլարի կաշառք տուած է բազմաթիւ անհատներու եւ հաստատութիւններու, ամբողջ Եւրոպայի մէջ: Ըստ «Կարտիըն»ի՝ աւելի քան 16 հազար նման գործարքներ կատարուած են: Այս մեծ գայթակղութեան մէջ կաշառակերութեան համար մեղաւոր է ոչ միայն Ատրպէյճանի կառավարութիւնը, այլ նաեւ եւրոպացի այն բոլոր պաշտօնեաները, որոնք կաշառք վերցուցած են՝ Ալիեւի վարչակարգին ապօրինի ծառայութիւններ մատուցելու համար…

Այն, ինչը «Կարտիըն»ը կը նկարագրէ իբրեւ «ատրպէյճանական լուացքատուն», կը ներառէ «խիստ ազդեցութեան ծրագիր մը, վարձավճարներ՝ լոպիիստներուն, պաշտպաններուն եւ եւրոպացի քաղաքական գործիչներուն՝ կանխիկ գումար «լուալ»ու համար, (որ) կու գայ Ատրպէյճանի նախագահ Իլհամ Ալիեւի հետ կապուած ընկերութիւններէ, պետական նախարարութիւններէ եւ երկրի մեծագոյն՝ Ատրպէյճանի միջազգային դրամատունէն, որ վերջերս սնանկութեան դիմում ներկայացուցած էր: Կանխիկ գումարը փոխանցուած է ստուերային կառավարում ունեցող բրիտանական չորս ընկերութիւններէ, եւ այնտեղէն ծախսուած է  տարբեր երկիրներու մէջ, որոնց շարքին՝ Գերմանիոյ, Մեծն Բրիտանիոյ, Ֆրանսայի, Թուրքիոյ, Իրանի եւ Ղազախստանի մէջ»: «Կարտիըն» մոռցած է աւելցնել Պելճիքան եւ Իտալիան…

Ատրպէյճանական ապօրինի դրամները բրիտանական ընկերութիւններ ուղղուած են Դանիոյ ամէնէն մեծ դրամատան՝ «Տանսքէ»ի էսթոնական մասնաճիւղին միջոցով: Այս ստուերային ընդյատակեայ ընկերութիւններէն երկուքը եղած են սքոթլանտական սահմանափակ ընկերութիւններ՝ Hilux Services եւ Polux Management, որոնք կը վերահսկուին գործակալներու կողմէ, բրիտանական Վըրճինեան կղզիներուն մէջ։

Տեսնենք, թէ այս ապօրինի փոխանցուած ֆոնտերու շահառուներէն քանի մը հատը որո՞նք են: Ըստ «Կարտիըն»ի՝ «անոնցմէ մէկը Լուքա Վոլոնթէն է, Եւրոպայի Ժողովրդական կուսակցութեան աջ-կեդրոն խումբի նախկին իտալացի նախագահը՝ Եւրոպական Խորհուրդի խորհրդարանական վեհաժողովին մէջ (ԵԽԽՎ): Վոլոնթէ շարքին էր ԵԽԽՎի այն պատուիրակներուն, որոնք տարօրինակ կերպով դէմ քուէարկեցին Ատրպէյճանի մէջ մարդկային իրաւունքներու խախտումները քննադատող 2013ի զեկոյցին: Ըստ բացայայտուած տուալներու՝ ան ստացած է աւելի քան երկու միլիոն տոլար: Իտալիոյ մէջ անոր առաջադրուած է մեղադրանք՝ դրամի լուացման եւ կաշառակերութեան համար, կապուած՝ «խաւիարային դիւանագիտութիւն» անունը ստացած հետաքննութեան: Ան կը հերքէ բոլոր անօրինութիւնները»։

«Կարտիըն»ի համաձայն՝ մէկ այլ բարձրաստիճան շահառու է «Գերմանիոյ խորհրդարանի նախկին պատգամաւոր Էտուըրտ Լինթնըր, Քրիստոնէական սոցիալական միութենէն…: 2012էն 2014, երբ ան այլեւս պատգամաւոր չէր, անոր հիմնադրամը ստացած է 819 հազար եուրօ: Լինթնըր 61 հազար եուրոյի կանխիկ գումար ստացած է՝ որպէս ընտրութիւններու դիտորդ, Ատրպէյճան այցելելէն երկու շաբաթ ետք: Ան բարձրօրէն գնահատած է քուէարկութիւնը՝ մինչեւ իսկ «գերմանական չափանիշներուն» համապատասխանող: Ան ըսած է, որ վճարումները եղած են օրինական աշխատանքի համար, եւ ինք անձամբ չէ օգտուած այդ գումարէն կամ ծանօթ չէ այդ դրամական միջոցներու սկզբնաղբիւրին»։

Ըստ «Կարտիըն»ի՝ «Կանխիկ գումար ուղարկուած է նաեւ Պուլկարիա եւ Զուիցերիա, Քալին Միթրեւի պատկանող դրամատնային հաշիւներուն, որ ժամանակին եղած է մասնաւոր խորհրդատու, իսկ այժմ կ՛աշխատի Լոնտոնի Վերակառուցման եւ զարգացման եւրոպական դրամատան համար: Միթրեւ կը յայտնէ, որ գումարը եղած է մասնաւոր եկամուտ՝ օրինական խորհրդատուական աշխատանքներէն, եւ ան ծանօթ չէ դրամական միջոցներու սկզբնաղբիւրին: Ան կը հերքէ, որ որեւէ անօրինութիւն կատարած է»։

Կան նաեւ քանի մը բարձրաստիճան ատրպէյճանցի պաշտօնեաներ, որոնք օգտուած են այդ հիմնադրամներէն: Ատրպէյճանական ընկերութիւն մը՝ Baktelekom MMC, աւելի քան 1.4 միլիառ տոլար փոխանցած է ստուերային դրամատնային հաշիւներու։

Հետաքրքրական է այն, որ հունգարական թերթը եւս բացայայտած է, թէ այն պահուն, երբ Հունգարիա կ՛արտայանձնէր Ռամիլ Սաֆարովը՝ 2004ին Պուտափեստի մէջ ՆԱԹՕի զօրավարժութիւններուն ընթացքին հայ սպան կացինահարուած ատրպէյճանցի մարդասպանը, Ատրպէյճան քանի մը դրամատնային փոխանցումներ կատարած է հունգարական MKB դրամատան, ընդհանուր՝ 7 միլիոն տոլար գումարի չափով: Սա եւս մէկ օրինակ է Ատրպէյճանի գաղտնի դրամատուներու կաշառակերութեան օգտագործման՝ Եւրոպայի մէջ եւ այլուր,  իր շահերուն հետապնդման համար։

Ատրպէյճանցիները, ի հարկէ, չեն ընդունիր իրենց անօրինութիւնները եւ կը մեղադրեն բոլորը՝ հայերէն սկսեալ մինչեւ միլիառատէր Ճորճ Սորոսը եւ միջազգային լրատուական միջոցները:  «Ատրպէյճանի նախագահի օգնական Ալի Հասանով «Կարտիըն»ի եւ այլ լրատուական միջոցներու յօդուածները որակած է «զրպարտութիւն»…: Հասանով ըսած է, որ Ալիեւի վարչակարգը դարձած է բրիտանական հետախուզութեան, Հայկական Սփիւռքի եւ Միացեալ Նահանգներու կողմէ կազմակերպուած «գայթակղեցուցի»չ արշաւի զոհը», կը տեղեկացնէ «Կարտիըն»ը: Հասանով մեղադրած է որոշ հակաատրպէյճանական շրջանակներ, որոնք «Արեւմուտքի եւ մասնաւորապէս Ամերիկայի Միացեալ Նահանգներու մէջ կը վերահսկուին Հայկական Սփիւռքի միջոցներուն շնորհիւ»: Բացի ասկէ, Ատրպէյճանի կառավարութիւնը արգելափակած է հասանելիութիւնը Կազմակերպուած յանցաւորութեան եւ կաշառակերութեան լուսաբանման նախագիծի կայքին (The Organized Crime and Corruption Reporting Project), որ հրապարակած էր «ատրպէյճանական լուացքատան» մանրամասնութիւնները, դանիական Berlingske թերթին մէջ յայտնուած տուեալներու արտահոսքէն ետք։

Անցեալ շաբաթ, Մեծն Բրիտանիոյ վարչապետ Թերեզա Մէյ յայտարարեց, որ Յանցագործութիւններու ազգային գործակալութիւնը կը հետաքննէ Ատրպէյճանի կապուած՝ բրիտանական չորս ընկերութիւններու կաշառակերութեան գործունէութիւնը: Միաժամանակ, Եւրոպական Խորհուրդի Խորհրդարանական վեհաժողովի քանի մը անդամներ մտադիր են ընդլայնելու Ատրպէյճանի կաշառակերութեան մնայուն ծրագիրներու գոյութիւն ունեցող ընթացիկ հետաքննութիւնը:

 

ՅԱՐՈՒԹ ՍԱՍՈԻՆԵԱՆ

«Քալիֆորնիա Քուրիըր» թերթի հրատարակիչ եւ խմբագիր

 

Արեւելահայերէնի թարգմանեց՝

ՌՈՒԶԱՆՆԱ ԱՒԱԳԵԱՆ

Արեւմտահայերէնի վերածեց՝

ՍԵԴԱ ԳՐԻԳՈՐԵԱՆ

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top