Յունաստանի Մէջ՝ Խրիսթինա Ալեքսանեանի Մենակատարումը Անժէլ Քուրթեանի Դերով

0000ALEKSANIAN

 

0000ALEKSANIAN

ԱԹԷՆՔ.- Շաբաթ, 16 Սեպտեմբերին, Նէա Զմիռնիի «Ալսոս» պուրակին մէջ կազմակերպուած «Իոնիքես Եորթես» փառատօնի ծիրին մէջ, առաջին անգամ ըլլալով բեմականացուած՝ ներկայացուեցաւ կեանքի ոդիսականը Անժէլ Քուրթեանի, որ Հայոց Ցեղասպանութենէն ու Զմիւռնիոյ աղէտէն փրկուելով՝ հաստատուեցաւ Յունաստանի Կրետէ կղզիին, ապա Քոքինիոյ շրջանին մէջ, ընտանիք կազմելով ու զաւակներով եւ թոռներով իր կեանքը ամբողջացնելով:

Յունահայ դերասանուհի Խրիսթինա Ալեքսանեան դժուար եւ պահանջկոտ մենակատարում մը ստանձնեց՝ ներկայացնելով Անժէլ Քուրթեանի կերպարը «Անժէլ Քուրթեանի Տետրակները» գիրքին վրայ հիմնուած թատերական բեմադրութեան մէջ:

«Հայոց Ցեղասպանութեան եւ Զմիւռնիոյ աղէտի ծանր մթնոլորտը, գաղթն ու վերապրումը, ընտանիքի անդամներու կորուստը, ցաւն ու աղէտը խոր ապրումներ եւ յուզում ստեղծեցին սիրտին ու հոգիին մէջ շուրջ 2000 հանդիսատեսներու, որոնք մասնակից զգացին բեմին վրայ ընթացող պատմութեան դէպքերուն եւ դէմքերուն», կը գրէ մեր պաշտօնակից «Ազատ Օր» օրաթերթը՝ աւելցնելով. «Խրիսթինա Ալեքսանեան բեմին վրայ դարձաւ մանուկ, մայր ու հայր՝ Անժէլ Քուրթեանի կեանքի փորձառութիւնները պատմելով: Մազերը հիւսուած փոքրիկ Անժէլն էր, թաշկինակ մը գլխուն՝ մայրը Սոֆիան էր, քոյրերն էին՝ Գուինն ու Ռոզան, հայրն էր, զոր շարունակ ան կը փնտռէր, մինչեւ որ ինք եւս մայր ու մեծ մայր դարձաւ պանդխտութեան ու նոր հայրենիքին մէջ»:

Սիրուած երգիչ Հայկ Եազըճեան, իր երաժշտութեամբ ամբողջացուց բեմին վրայ ընթացող մենակատարումը: «Հայկ Եազըճեան՝ ուտի վրայ նուագելով հայկական եւ յունական ծանօթ մեղեդիները, հաւատարմօրէն կենդանացուց ալեկոծուած դէպքերն ու յուզիչ պահերը», կը նկարագրէ «Ազատ Օր»ը:

Նէա Զմիռնիի մշակութային հաստատութեան նախաձեռնութիւնն ու արտադրութիւնն էր «Անժէլ Քուրթեանի Տետրակները» գիրքին բեմականացումը, որ առաջին անգամ ըլլալով իրագործուեցաւ «Իոնիքես Եորթես» տարեկան փառատօնի ծիրին մէջ: Անիկա յաջողուեցաւ մշակութային հաստատութեան նախագահ Վանկելիս Խաչատուրեանի անձնական ճիգով ու ընտրութեամբ:

Նախքան թատերախաղի ներկայացումը բեմ բարձրանալով՝ Վանկելիս Խաչատուրեան յայտնեց, որ Նէա Զմիռնիի քաղաքապետութիւնը եւ քաղաքապետ Սթաւրոս Ծուլաքիս, միշտ նեցուկ կանգնած են հայութեան դատին, Հայաստանին ու Արցախին, յիշեցնելով նաեւ հայրենի Սիսիան քաղաքին հետ եղբայրացման բեղուն տարիները եւ բոլոր այն նախաձեռնութիւնները, զորս քաղաքապետութիւնը կը կատարէ, յատուկ զգայնութեամբ ու յարգանքով: Արդիւնաւէտ այս աշխատանքը երկար տարիներու հաստատ ուղի մը կտրած է, շնորհիւ Հայ Դատի Յանձնախումբին ու տեղւոյն ՀՅԴ կոմիտէին հետ համագործակցութեան:

Թատերախաղի աւարտին բեմ բարձրացան Անժէլ Քուրթեանի դուստրն ու ծոռը՝ Նելի Խանիկեան եւ Յուսիկ Խանիկեան՝ դաշնակի վրայ նուագելով եւ երգելով «Երեւան-Էրեբունի»ն:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top