«Բոհեմ» Համոյթի «Ճեղքուող Լռութիւն» Համերգը

0000VRASDAN1

0000VRASDAN1

2017 թուականի Սեպտեմբերի 17ին, Վիրահայոց թեմի «Հայարտուն» կենտրոնի «Գալուստ Կիւլպէնկեան» սրահում կայացաւ Երեւանի «Բոհեմ» համոյթի «Ճեղքուող լռութիւն» խորագրով գրական-երաժշտական երեկոն, որը նուիրուած էր Վրաստանի եւ Հայաստանի Հանրապետութեան միջեւ դիւանագիտական յարաբերութիւնների 25ամեակին: Վիրահայոց թեմի առաջնորդ Վազգէն եպիսկոպոս Միրզախանեանի օրհնութեամբ, միջոցառումը նախաձեռնել էին «Երեւակ» հանդէսի գլխաւոր խմբագիր, տնօրէն Գէորգ Թադեւոսեանը եւ Վիրահայոց թեմի մշակոյթի բաժինը: Ծրագիրը ներկայացրին բանաստեղծ Գոռ Յարութիւնեանը, երաժիշտ-կատարողներ Վահէ Քոչարը, Ռուբէն Քամալեանը եւ Գագիկ Շիբոյեանը: Միջոցառմանը ներկայ էին Վազգէն եպիսկոպոս Միրզախանեանը, Թբիլիսիի Սուրբ Էջմիածին եկեղեցու լուսարարապետ Մանուկ քահանայ Զեյնալեանը, թբիլիսահայ հաւատացեալներ, մտաւորականներ, երիտասարդներ:

Երեկոն բացուեց համոյթի գործունէութեան մասին տեսանիւթով, որը ներկաներին տրամադրում էր առաջիկայ երկու ժամերին իրենց սպասող անակնկալին: Վիրահայոց թեմի «Յովհաննէս Թումանեանի տուն» գիտական, մշակութային կենտրոնի ղեկավար Գիսանէ Յովսէփեանը, ողջունելով հիւրերին՝ ընդհանուր գծերով ներկայացրեց համոյթի ինքնատիպ արուեստը: Աւանդական գրական, երաժշտական կաղապարներից դուրս գրականութեան ու երաժշտութեան ներդաշնակ սինթէզը (համադրութիւնը-Խմբ.), իսկապէս, անակնկալ էր ներկաների համար: Երիտասարդ արուեստագէտները ներկայացնում էին իրենց արուեստը, որ ստեղծուել է մեր տեսակի՝ բանական մարդու գոյութեան հաւասարակշռութեան լծակը ապահովելու համար, աշխարհը կատարելագործելու համար: Նրանք պատմում էին իմաստալից պահերի մասին՝ պատմելով պահը յաւերժացնելու համար եւ փորձում արուեստի միջոցով գիտակցութիւնն ու յոյզերը կապող օղակ դառնալ՝ ժողովրդին կրթելու համար: Տղաները մտաւորականի իրենց իդէալն ունեն՝ քաղաքական եւ քաղաքացիական ճիշդ կեցուածք ընդունող մտաւորական, որ հերոս է դառնում Մեծն Թումանեանի օրինակով, ով արուեստ էր ստեղծում դժուարութիւնների մէջ, պարտքերի մէջ… անմահութեան իր ուղին էր հարթում ոչ միայն գրականութեամբ, այլ իր ամենաթանկը՝ իր տասը երեխայի հետ իրեն էլ այդ ճանապարհին նուէր տալով…

0000VRASDAN

«Բոհեմ» համոյթը հիմնադրուել է 2016 թուականի Մարտին: Կարճ ժամանակ անց համոյթը վաստակել է սէրը, համակրանքը այն մարդկանց, ովքեր կիսել են նրանց յոյզերը, զգացմունքները, վերաբերմունքն ու առաքելութիւնը: Իսկ առաքելութիւնը ազգայինը պահպանելն է, ոչ թէ եսակենտրոն, այլ գաղափարակենտրոն ազգայինը պահպանելը՝ ծառայելու համար այն ազգին, ով պատմական յիշողութիւն ունի, էսթետիկայի (գեղագիտութեան-Խմբ.)  զգացողութիւն… Ձեւի ու բովանդակութեան իրենց փնտրտուքը «բոհեմականներ»ը շարունակում են՝ իմասատաւորելով ոչ թէ արդիւնքը, այլ արարման գործընթացը՝ այս ճանապարհին լսարանին հոգեհարազատ պահեր պարգեւելով: Այդ է պատճառը, որ օրէցօր մեծանում է նրանց լսարանը…

Ծրագրի աւարտին համոյթին եւ միջոցառման կազմակերպիչներին իր օրհնութիւնը բերեց թեմակալ առաջնորդը: Գնահատանքի իր խօսքում սրբազան հայրը արժեւորեց համոյթի գործունէութիւնը՝ տեւական թմիրից յետոյ, հոգեւոր վերածննդի շող տեսնելով նրանց մէջ, որ գալիս է «մեր տան ներսից փլուող կամարները ամրապնդելու»: Սրբազան հայրը ընդգծեց, որ նման երեկոները հոգեւոր, կրթական ու մշակութային առաքելութեան մաս են հանդիսանում եւ շատ կարեւոր դաս կարող են լինել յատկապէս երիտասարդ սերնդի համար:

Ոչ աւանդական ծրագիրը ջերմօրէն ընդունուեց: Ներկաների համար նոր բացայայտում էր արուեստի այս ձեւը եւ ուրախալի, որ մայր հայրենիքում արուեստի բնագաւառում առաջընթաց կայ, առաւել ուրախալի, որ վիրահայութիւնը հնարաւորութիւն ունի այդ առաջընթացի ականատեսն ու մասնակիցը դառնալու:

 

ՀԱՅ ԱՌԱՔԵԼԱԿԱՆ

ՈՒՂՂԱՓԱՌ ՍՈՒՐԲ ԵԿԵՂԵՑՈՒ ՎԻՐԱՀԱՅՈՑ ԹԵՄ

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top