Երեւանի Մէջ Բացուեցաւ Գրատպութեան Թանգարան

0926musuem

0926musuem

 

ԵՐԵՒԱՆ.- «Մեդիամաքս»ը կը հաղորդէ, որ Հայաստանի ազգային գրադարանի թամանեանական մասնաշէնքին մէջ բացուեցաւ Գրատպութեան թանգարան, որ կը ներկայացնէ հայ տպագրութեան անցած ճանապարհը:

Թանգարան հիմնելու գաղափարը ծնած էր 2012ին, երբ կը նշուէր հայ գրատպութեան 500ամեակը եւ ԵՈՒՆԵՍՔՕն Երեւանը կը հռչակէր Գիրքի համաշխարհային մայրաքաղաք:

Թանգարանի բացման ներկայ էր մշակոյթի նախարար Արմէն Ամիրեան:

Վեց ցուցասրահներու մէջ կը ներկայացուին նախագրային շրջանէն մինչեւ ժամանակակից տպագրութեան ուղին: Մեծ ցուցասրահ յատկացուած է հայ գրատպութեան «առաջնեկներուն». այցելուները կրնան տեսնել 1512 թուականին Վենետիկի մէջ հրատարակուած հայատառ առաջին գիրքը՝ «Ուրբաթագիրք»ը, առաջին Աստուածաշունչը, որ լոյս տեսած է 1666ին Ամսթերտամի մէջ, առաջին ամսագիրը՝ Մատրասի մէջ տպագրուած «Ազդարար»ը: Այնտեղ կը ներկայացուի նաեւ ամբողջութեամբ հայատառ առաջին քարտէսը՝ «Համատարած Աշխարհացոյց»ը:

Թանգարանին մէջ կը ներկայացուին հայկական գրատպութեան մեծ կեդրոնները:

«Եւրոպական երկիրներու, Անդրկովկասի, արեւելքի, պատմական Հայաստանի տարբեր քաղաքներու մէջ տպարաններ կը բացուէին, հայերէն տառեր կը ձուլուէին ու գիրքեր կը հրատարակէին:

0926musuem1

Կարեւոր ցուցանմուշ ունինք: 1848 թուականին Շամախի՝ ներկայիս Ատրպէյճանի տարածքին մէջ, երեք հայ ընկերներ տպարան հիմնած են: Առաջին հրատարակութիւնը չունինք, բայց կայ 1851 թուականին տպագրուած «Գիտութիւն Շնորհաց»ը: Այդ տպարանին մէջ բաւական շատ հայերէն գիրքեր տպագրուած են», կ՛ըսէ Ազգային գրադարանի փոխտնօրէն Հայկանոյշ Ղազարեան:

Սրահներէն մէկուն մէջ կը ներկայացուին գրահրատարակչական արհեստագիտական միջոցներու զարգացման փուլերը՝ տպագրական հաստոցներէն մինչեւ ժամանակակից կրիչ սարքերը:

«Տպագրական երկու եզակի մեքենայ ունինք. անոնք շուրջ 100 տարեկան են՝ մէկը արտադրուած է Խորհրդային Միութեան մէջ, միւսը գերմանական է: Մեր տպարաններէն ձեռք բերած ենք, հազիւ կրցած ենք փրկել զանոնք, որպէսզի իբրեւ մետաղի ջարդօն չօգտագործուին», կը յայտնէէ Ազգային գրադարանի տնօրէն Տիգրան Զարգարեան:

Թանգարանին մէջ կը ցուցադրուին նաեւ Հայաստանի եւ Արցախի մամուլի եզակի նմուշներ եւ ազգային փոքրամասնութիւններու Հայաստանի մէջ տպագրուող մամուլի օրինակներ:

Ցուցանմուշներու հիմնական մասը վերցուած է հայատառ տպագիր նիւթի ամենամեծ պահոցի՝ Ազգային գրադարանի հաւաքածոներէն:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top