Գերմանիոյ Խորհրդարանական Ընտրութիւններ. Մերքել՝ 4րդ Անգամ Ըլլալով Գերմանիոյ Վարչապետ

0926merkel1

0926merkel1

Գերմանիոյ մէջ անցեալ Կիրակի, 24 Սեպտեմբերին, տեղի ունեցան խորհրդարանական ընտրութիւններ: Գերմանիոյ տարածքին 88,000 քուէարկութեան կեդրոններ իրենց դռները բացին առաւօտեան ժամը 8ին: Շուրջ 61.5 միլիոն քուէարկողներ իրաւասու էին մասնակցելու քուէարկութեան:

Պունտեսթակի ընտրութիւններու նախնական արդիւնքներուն համաձայն՝ Անկելա Մերքելի գլխաւորած Քրիստոնեայ ժողովրդավարական միութիւն-Քրիստոնեայ ընկերային միութիւն դաշինքը ապահոված է քուէներուն 33.1 առ հարիւրը, Ընկերվար ժողովրդավարական կուսակցութիւնը՝ 20.4 առ հարիւրը, Ազատ ժողովրդավարական կուսակցութիւնը՝ 10.4 առ հարիւրը, ծայրայեղական աջակողմեան Գերմանիոյ համար այլընտրանք կուսակցութիւնը՝ 13.2 առ հարիւրը, Կանաչներ կուսակցութիւնը՝ 9.3 առ հարիւրը, իսկ Ձախերը՝ 8.9 առ հարիւրը:

Մասնակցութեան համեմատութիւնը 75.6 առ հարիւր էր, ինչ որ բարձր է չորս տարի առաջ արձանագրուած արդիւնքէն:

Այսպիսով, Անկելա Մերքել չորրորդ անգամ ըլլալով դարձաւ Գերմանիոյ վարչապետ՝ հաւասարելով Հելմութ Քոլի մրցանիշին: Այժմ անոր կը սպասեն կառավարութեան կազմութեան դժուար բանակցութիւններ, որոնք կրնան ամիսներ երկարիլ: Նշենք, որ ան ընտրապայքարին ընթացքին յայտնած էր, թէ իր նախընտրութիւնը Ազատ ժողովրդավարական կուսակցութեան ու Կանաչներուն հետ համախմբական կառավարութիւն մը կազմելն է:

Ընկերվար ժողովրդավարական կուսակցութեան ղեկավար Մարթին Շուլց յայտարարեց, որ իր կուսակցութիւնը այլեւս մաս պիտի չկազմէ համախոհական կառավարութեան եւ պիտի դառնայ ընդդիմութիւն:

Բոլոր կուսակցութիւններու ղեկավարները մտահոգութիւն յայտնեցին ծայրայեղ աջակողմեան Գերմանիոյ համար այլընտրանք կուսակցութեան՝ խորհրդարանին մէջ յայտնուելու երեւոյթին նկատմամբ:

Հարցախոյզները ցոյց կու տային, թէ Քրիստոնեայ ժողովրդավարական միութիւն-Քրիստոնեայ ընկերային միութիւն դաշինքին ժողովրդականութիւնը 34-36 առ հարիւր է, իսկ Ընկերվար ժողովրդավարականներունը՝ 21-22 առ հարիւր: Հարցախոյզները նաեւ ցոյց կու տային, թէ ծայրայեղ աջակողմեան Գերմանիոյ համար այլընտրանք կուսակցութիւնը առաջին անգամ ըլլալով մուտք պիտի գործէ Պունտեսթակ:

Գերմանիոյ արտաքին գործոց նախկին նախարար Ֆրանք-Վալթեր Շթայնմայեր երէկ «Հիլտ ամ Սոննթակ» օրաթերթով լոյս տեսած իր յօդուածին մէջ քաղաքացիներուն կոչ ուղղեց ընտրութեան մասնակցելու՝ գրելով. «Քուէարկութիւնը քաղաքացիական պարտականութիւն է: Գացէ՛ք եւ քուէարկեցէ՛ք»:

«Իւրաքանչիւր քուէ կարեւոր է, ձեր քուէն կարեւո՛ր է», նշեց Շթայնմայեր՝ աւելցնելով. «Այն մարդիկը, որոնք չեն քուէարկեր, կ՛արտօնեն, որ ուրիշներ որոշեն մեր երկրի ապագան»:

Նախքան ընտրութիւնը արդէն իսկ կը նախատեսուէր, որ մասնակցութիւնը աւելի բարձր ըլլար, քան 2013ի խորհրդարանական ընտրութիւններուն ընթացքին արձանագրուած 71.5 առ հարիւրը:

 

ՊՈՒՆՏԵՍԹԱԿԻ ՆՈՐԸՆՏԻՐ

ՊԱՏԳԱՄԱՒՈՐՆԵՐԷՆ 14Ը ԹՐՔԱԿԱՆ ԾԱԳՈՒՄ ՈՒՆԻՆ

 

Գերմանիոյ խորհրդարանական այս ընտրութիւններուն, ծագումով թուրք 14 թեկնածուներ անցան խորհրդարան: «Էրմենիհապեր»ի համաձայն՝ քուէներու 20.4 տոկոսով Պունտեսթակ անցած Ընկերվար ժողովրդավարական կուսակցութեան անդամներէն պատգամաւոր դարձած են թուրք թեկնածուներ Այտան Օզօղուզ, Մեթին Հաքուէրտի, Մահմուտ Օզըեմիր, Ճանսել Քըզըլթեփէ, Կիւլիստան Եուքսել եւ Էլվան Քորքմազ:

Ձայներու 8.9 տոկոսը ստացած Կանաչներու կուսակցութենէն պատգամաւոր ընտրուած են Ճեմ Օզտեմիր, Տանիալ Պէյազ, Էքին Տելիկէօքոզ, Ճանան Պայրամ եւ Ֆիլիզ Փոլաթ: Իսկ Ձախերու կուսակցութենէն պատգամաւոր դարձած են Էվրիմ Զոմմեր, Սեւիմ Տաղտելեն եւ Կէօքայ Աքպուլութ:

Յիշենք, որ նախորդ՝ 2013ի խորհրդարանական ընտրութիւններուն, Պունտեսթակի պատգամաւոր դարձած էին թրքական ծագումով 11 թեկնածուներ:

 

ՃԵՄ ՕԶՏԵՄԻՐԻ

ԿՈՒՍԱԿՑՈՒԹԻՒՆԸ ԿՐՆԱՅ ԴԱՌՆԱԼ ՄԵՐՔԵԼԻ

ՆՈՐ ԴԱՇՆԱԿԻՑԸ

 

Թրքական «Տիքեն» լրատուական կայքը կը յայտնէ, որ Գերմանիոյ խորհրդարանին կողմէ 2016ին Հայոց Ցեղասպանութեան մասին բանաձեւի վաւերացման գործին մէջ մեծ ներդրում ունեցած՝ Կանաչներ կուսակցութեան համանախագահ եւ թրքական ծագում ունեցող Ճեմ Օզտեմիրը, այժմ կրնայ դառնալ վարչապետ Անկելա Մերքելի գլխաւորած Քրիստոնեայ ժողովրդավարական միութիւն-Քրիստոնեայ ընկերային միութիւն դաշինքի նոր գործընկերը:

Ըստ կայքին՝ ընտրութիւններուն կրկին յաղթած Մերքելը այժմ պէտք է համախոհական կառավարութիւն կազմէ, եւ այս հարցով ան ունի քանի մը տարբերակ, որոնցմէ բացառուած են ընդդիմութիւն դարձած Ընկերվար ժողովրդավարական կուսակցութիւնը եւ ծայրայեղ աջակողմեան ուժերը: Հետեւաբար, ամենայն հաւանականութեամբ, Մերքելի նոր գործընկերները ըլլան Կանաչներ կուսակցութիւնը եւ Ազատ ժողովրդավարական կուսակցութիւնը:

Կանաչներ կուսակցութիւնը, իր կարգին, Ճեմ Օզտեմիրի գլխաւորութեամբ յայտարարած է, թէ պատրաստ է իշխանութիւններուն հետ երկխօսութեան:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top