«Արցախցին Նոր Կառավարութիւնից Ազնուութիւն Է Ակնկալում»

0927armensargsyan

0927armensargsyan

«ԹԵՐԹ»Ի ՀԱՐՑԱԶՐՈՅՑԸ ԱՐՑԱԽԻ ԽՈՐՀՐԴԱՐԱՆԻ «ԴԱՇՆԱԿՑՈՒԹԻՒՆ» ԽՄԲԱԿՑՈՒԹԵԱՆ ՊԱՏԳԱՄԱՒՈՐ ԱՐՄԷՆ ՍԱՐԳՍԵԱՆԻ ՀԵՏ

 

 

Արցախի ժողովուրդը բոլոր ժամանակների կառավարութիւններից նոյն ակնկալիքներն ունի՝  առաջընթացի բոլոր ոլորտներում: «Թերթ»ի հետ զրոյցում ասաց Արցախի խորհրդարանի «Դաշնակցութիւն» խմբակցութեան պատգամաւոր Արմէն Սարգսեանը:

Նա նշեց, որ Արցախի կառավարութեան նոր կազմը, որը բաղկացած է նախորդ նախարարներից եւ նոր նշանակուած երիտասարդներից, կը տայ իր արդիւնքը, որովհետեւ փորձառութիւնը կը համատեղուի եռանդի հետ:

 

«ԹԵՐԹ».- Արցախի կառավարութեան նոր կազմը յայտնի է:  Ի՞նչ սպասումներ ունի բնակչութիւնը, ի՞նչ է ակնկալում նոր կառավարութիւնից:

ԱՐՄԷՆ ՍԱՐԳՍԵԱՆ.- Արցախցիները կառավարութիւնից բոլոր ժամանակներում էլ մէկ բան են սպասում՝ ազնուութիւն, տնտեսական նոր աստիճանի զարգացում: Միշտ էլ ակնկալիքները դրանք են եղել, հիմա էլ՝ ժողովուրդը առաջընթացի է սպասում բոլոր ոլորտներում:

 

«ԹԵՐԹ».- Հաւանաբար, արցախցին նաեւ սոցիալական վիճակի բարելաւումների էլ է սպասում:

ԱՐՄԷՆ ՍԱՐԳՍԵԱՆ.- Ինչո՞ւ միայն սոցիալական: Մարդիկ բոլոր ոլորտներում էլ առաջընթաց են ակնկալում: Կառավարութիւն է ձեւաւորուել, նոր կազմ է, միայն սոցիալական ոլորտի նախարար չէ, որ նշանակուել է: Արցախն ակնկալում է մէկ աստիճան աւել բարձրանալ, աւելի բարձր մակարդակում լինել, հզօրացնել երկիրը, հզօրացնել տնտեսութիւնը, այլ ելք չկայ:

 

«ԹԵՐԹ».- Իսկ նոր նշանակուած կառավարութիւնը համապատասխանո՞ւմ է ժողովրդի սպասումներին, կարո՞ղ է արդարացնել ակնկալիքները:

ԱՐՄԷՆ ՍԱՐԳՍԵԱՆ.- Նոր կառավարութեան կազմը պայմանականօրէն կարելի է բաժանել երկու մասի: Առաջինը նախկին նախարարներն են, ովքեր վերանշանակուել են իրենց պաշտօններում, հարուստ փորձ ունեն, երկրորդը՝ նոր նշանակուած նախարարներն են, ովքեր հիմնականում երիտասարդներ են: Գնահատելի է, որ աստիճանաբար սերնդափոխութիւն է կատարւում կառավարման ոլորտում եւ դա շատ ուրախալի է, որ նոր գաղափարներն ու փորձառութիւնն աշխատելու են յանուն մէկ նպատակի: Շատ լաւ է, որ հանգիստ, խաղաղ սերնդափոխութիւն է կատարւում: Ժամանակի պահանջները տարբեր են, մարտահրաւէրները, ռեֆորմները (բարեփոխումները-Խմբ.), մօտեցումները տարբեր են ու փորձում ենք վստահ լինել, որ երիտասարդներն աւելի եռանդուն կ՛աշխատեն: Ամենակարեւորն այն է, որ փորձառութիւնն ու երիտասարդութիւնն իրար լրացնելով կ՛աշխատեն:

 

«ԹԵՐԹ».- Որպէս պատգամաւոր՝ տնտեսական զարգացում ապահովելուն միտուած ի՞նչ ոլորտ կ՛առանձնացնենք, որի նկատմամբ նոր կառավարութիւնը պէտք է առաւել ուշադիր լինի:

ԱՐՄԷՆ ՍԱՐԳՍԵԱՆ.- Դժուար է այդ հարցին միանշանակ պատասխանել: Ղարաբաղը գտնւում է պատերազմական վիճակում, Ղարաբաղի համար թիւ մէկ հարցն, իհարկէ, պաշտպանութիւնն է, ժողովրդի անվտանգութիւնն ապահովելն է: Իհարկէ, պաշտպանութիւնը օգուտ չի կարող ունենալ, եթէ տնտեսական լուրջ բարեփոխումներ չլինեն: Բոլոր հարցերը շաղկապուած են իրար: Հոգեւոր-մշակութային արժէքներն էլ կարեւոր են, դրանք են ձեւաւորում երիտասարդների ոգին, ընկալումները, ովքեր կռւում են մարտի դաշտում, ովքեր ապահովում են մեր պաշտպանութիւնը: Այնպէս որ բոլոր հարցերն էլ կարեւոր են, իրար հետ են կապուած ու իրարից են կախուած, եթէ մէկը միւսին գերագնահատենք, կը սխալուենք: Մենք պատերազմը յաղթեցինք հոգեւորով: Դրա համար ես կ՛ուզէի, որ կառավարութիւնը համաչափ աշխատէր բոլոր ոլորտների ուղղութեամբ, չկենտրոնանար մէկ ուղղութեան վրայ ու մոռացութեան մատներ միւսները: 2րդ Համաշխարհային Պատերազմի ժամանակ անգլիացի ղեկավարներից մէկն ասում է՝ բա ո՞ւր է մշակոյթի բիւջէն, ասում են՝ ինչ մշակոյթ, պատերազմ է, ինքն էլ պատասխանում է՝ բա ինչի՞ համար ենք կռւում: Ղարաբաղում փոքր-ինչ այլ է, եթէ քննադատում ենք՝ քննադատում ենք յանուն յաջողութեան, ոչ թէ խօսելու համար, եթէ քննադատում ենք՝ քննադատում ենք բովանդակային: Մենք փորձում ենք պահել միասնականութիւնը:

 

«ԹԵՐԹ».- Եթէ յետ հայեացք նետենք այն բոլոր փոփոխութիւններին, որոնք տեղի ունեցան Արցախում՝ խօսքս սահմանադրութեան փոփոխութիւնից բխող փոփոխութիւնների մասին է, ի՞նչ եզրակացութեան եկաք՝ տեղի ունեցողը նպաստո՞ւմ է Արցախի զարգացմանը: Հարցս տալիս եմ այն համատեքստում, որ շատերը կարծում են, որ տեղի ունեցող իրադարձութիւնները ոչ այլ ինչ են, քան իշխանութեան վերարտադրութիւն:

ԱՐՄԷՆ ՍԱՐԳՍԵԱՆ.- Արցախում մտածելակերպը տարբերւում է: Դուք գիտէք, որ հանրաքուէի ժամանակ ՀՅԴն դէմ էր նախագահական կառավարման այն համակարգին, որը ներկայացուել էր ժողովրդի դատին: ՀՅԴն կողմ էր կառավարման խորհրդարանական համակարգին, որպէսզի Հայաստանն ու Արցախը նոյն մոդելն (նախատիպը-Խմբ.) ունենան, նոյն դաշտում լինեն: Բայց ընտրուել է այլ տարբերակ, ժողովուրդն «այո» է ասել նախագահական կառավարմանը: Դրանից յետոյ մեզ մնում էր՝ կա՛մ պատերազմող երկրում քայքայիչ գործողութիւններ անել, շարունակել պնդել, որ խորհրդարանական կառավարման համակարգն աւելի լաւ էր, քան՝ նախագահականը, կա՛մ շարունակել ենթարկուել ժողովրդի որոշմանը՝ մնալով մեր տեսակէտին: Մենք պատմութիւն ենք կերտում, կերտում ենք մեր ամէնօրեայ կեանքով, եւ չի կարելի անզգոյշ լինել: Ես կարծում եմ, որ իշխանութիւնների վերարտադրութիւնը չի կարելի կապել անձի հետ: Եթէ ղեկավարները փոխուեն, նրանք բերեն նշանակեն իրենց մարդկանց, չի՞ նշանակում, որ վերարտադրւում է: Իշխանութիւնների վերարտադրութիւնը շատ աւելի խորն է, քան պարզապէս անձի խնդիրը: Անկախ նրանից՝ ովքեր են իշխանութեան, պէտք է այնպիսի մեխանիզմներ (մեքենակառոյցներ-Խմբ.) լինեն, որ առանձին անձեր չկարողանան համակարգ փոխել: Այդ անձերը պէտք է մեխանիզմներին ենթարկուեն: Դրա համար մենք ասում էինք, որ պէտք է խորհրդարանական կառավարման համակարգ: Բայց յանուն ժողովրդի պէտք է առաջ շարժուել, ամէն ինչ պէտք է անենք, որ ժողովուրդը շահի:

 

«ԹԵՐԹ».- Ղարաբաղի ներկայիս քաղաքական դասաւորումները արցախցու շահի՞ց են բխում:

ԱՐՄԷՆ ՍԱՐԳՍԵԱՆ.- Ղարաբաղում ժողովուրդն ու իշխանութիւնը իրար հակադրուած չեն: Իհարկէ, քաղաքացիների շահերից է բխում: Ղարաբաղում հակադրութիւն չկայ, պարզապէս որոշ մարդիկ մտածում են, որ զարգացմանը կարելի է հասնել մէկ ճանապարհով, միւսները մտածում են՝ մէկ այլ ճանապարհով:

 

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top