«Պետութիւնը Ուրիշներու Միջնորդութեամբ Չի Խօսիր»

1007bekjian

ՀԱՐՑԱԶՐՈՅՑ ՊՈԼՍՈՅ ՀԱՅՈՑ ՊԱՏՐԻԱՐՔԱԿԱՆ ՏԵՂԱՊԱՀ ԳԱՐԵԳԻՆ ԱՐՔ. ՊԷՔՃԵԱՆԻ ՀԵՏ

 

Վարեց՝ ՄԻՀՐԱՆ ՄԱՆՈՒԿԵԱՆ

 

1007bekjianՍամաթիոյ Սուրբ Գէորգ եկեղեցւոյ մատաղօրհնութիւնը եւ ապա հայկական Սահակեան-Նունեան վարժարանին ի նպաստ կազմակերպուած Սիրոյ սեղանը պատճառ եղան, որ Միհրան Մանուկեան զրոյց մը ունենայ Թուրքիոյ Հայոց պատրիարքական տեղապահ Գարեգին արքեպիսկոպոս Պէքճեանի հետ, անոր եպիսկոպոս ձեռնադրութեան 25ամեակին առթիւ: Արդարեւ, զրուցավարը նախ ողջունեց սրբազանին բազմամեայ վաստակը, ապա անոր ուղղեց հրատապ հարցումներ, որոնք վերջերս կը յուզեն բովանդակ պոլսահայութիւնը:

Ստորեւ կը ներկայացնենք նշեալ զրոյցը.

 

ՄԻՀՐԱՆ ՄԱՆՈՒԿԵԱՆ.- Սիրելի՛ սրբազան հայր, ինչպէ՞ս կը բնութագրէք ձեր եկեղեցանուէր ծառայութեան ուղին: Ինչպէ՞ս սկսաւ եւ ո՞ւր հասաւ:

ԳԱՐԵԳԻՆ ԱՐՔ. ՊԷՔՃԵԱՆ.- Իմ հոգեւոր կեանքը կը սկսի 1965ին, ժամանակի Շնորհք պատրիարք Գալուստեանի ձեռնադրութեամբ: Ուսումս շարունակելու համար մեկնեցայ Գերմանիա, ուր նոյն ժամանակ սկսաւ իմ հոգեւոր ծառայութիւնը: Այդտեղ, ուսումս աւարտելէ ետք պաշտօնակոչուեցայ Ֆրանսայի Մարսէյ քաղաքը, ուր ծառայեցի 18 տարիներ: Այդ շրջանին, Դպրեվանքի դասընկերոջս հետ հիմնեցինք տեղի երգչախումբը, որ գալիք ամիս պիտի տօնէ իր հիմնադրութեան 40ամեակը: Կազմակերպեցինք նաեւ հայերէնի դասընթացք, որ տուաւ 125 շրջանաւարտներ: 1991ին, վեհափառ Վազգէն Ա. կաթողիկոս զիս նշանակեց Գերմանիոյ Հայոց հոգեւոր հովիւ: Գերմանիոյ հայ համայնքի կարեւոր մէկ մասը կը կազմէին Թուրքիայէն աշխատանքի մեկնածներ, որոնք եւս կը դժուարանային հայերէնին տիրապետելու խնդիրին մէջ: Այս տարի թողուցի այդ պարտականութիւնս եւ հիմա կը փորձեմ պատրիարքական տեղապահ ըլլալով՝ ծառայել իմ ժողովուրդին:

 

ՄԻՀՐԱՆ ՄԱՆՈՒԿԵԱՆ.- Այս տարի կը նշուի ձեր եպիսկոպոս ձեռնադրուելու 25ամեակը. ինչպէ՞ս կը գնահատէք հայ համայնքը:

ԳԱՐԵԳԻՆ ԱՐՔ. ՊԷՔՃԵԱՆ.- Մեր համայնքը ունի թէ՛ դրական եւ թէ բացասական բազմաթիւ երեսակներ: Եթէ նախ դիտենք դրական հանգամանքը, ապա առաջին հերթին պիտի անդրադառնանք անոր եկեղեցասէր յատկութեան: Իսկապէ՛ս որ հայ ժողովուրդը կապուած է իր եկեղեցիին եւ 1700 տարիներէ ի վեր կանգուն կը պահէ զայն: Անցեալին մեր նախնեաց կառուցած հիմքը մինչեւ օրս կանգուն կը պահէ եկեղեցին եւ դպրոցը: Այլ գաղթօճախներու մէջ եւս, մեր կարեւորագո՛յն հողն է եկեղեցին: Մեր ժողովուրդը պետականութիւն ունեցած տարիներուն իսկ ունեցած է զանազան հաստատութիւններ, որոնք իրենց գոյութիւնը չեն կրցած պահել մինչեւ օրս: Միա՛յն եկեղեցին եւ անոր շուրջ կազմուած կառոյցներն են, որոնք կը շարունակեն իրենց գոյութիւնը: Մեր ժողովուրդը կը գիտակցի, թէ եկեղեցւոյ հանդէպ իր պարտականութիւնը սահմանուած չէ՛ միայն հաւատքով: Հայ մարդը, նոյնիսկ եթէ իր հաւատքին մէջ թերանայ, չի կրնար թերանալ եկեղեցւոյ հանդէպ իր պարտականութեան մէջ:

 

ՄԻՀՐԱՆ ՄԱՆՈՒԿԵԱՆ.- Կ՛ուզեմ անդրադառնալ պատրիարքական ընտրութեան գործընթացին: Ի՞նչ փուլի մէջ ենք այժմ:

ԳԱՐԵԳԻՆ ԱՐՔ. ՊԷՔՃԵԱՆ.- Նախաձեռնարկ մարմինը կը գործէ ու կ՛աշխատի ընտրողներու անուանացանկերը կատարումին հասցնել: Ունինք 11 բնական թեկնածուներ, որոնց դիմում կատարեցինք՝ իմանալու, թէ իրենց թեկնածութիւնը պիտի առաջադրե՞ն, կամ ոչ: Տակաւին անոնցմէ պատասխան չենք ստացած: Միւս կողմէ, պետութենէն կը սպասենք ընտրութեան կանոնները ճշդող կանոնագիրը: Կը յուսանք, որ շուտով կը հասնի անիկա. անկէ ետք է որ պիտի շարունակուի ընտրութեան գործընթացը:

 

ՄԻՀՐԱՆ ՄԱՆՈՒԿԵԱՆ.- Մինչեւ 9 Հոկտեմբեր պատասխան մը չգոյանալու պարագային՝ ընտրութիւնը անել վիճակի մատնուելու շուրջ համոզում մը գոյացած է հասարակութեան մօտ: Որքանո՞վ ճիշդ է այս մէկը:

ԳԱՐԵԳԻՆ ԱՐՔ. ՊԷՔՃԵԱՆ.- Ընտրութիւնը անպայմա՛ն պիտի կատարուի: Այս մասին ո՛չ մէկ կասկած: Վերջապէս, մեր այս համոզումը երաշխաւորողը նոյն ինքն Հանրապետութեան նախագահն է: Ան խոստացած էր 16 Ապրիլի հանրաքուէէն ետք անձամբ զբաղիլ այս խնդիրով: Գիտեմ, որ նախագահի մը բերանէն ելած խօսքը մի՛շտ երաշխիք է: Անշուշտ որ երկրի այս հսկայ խնդիրներուն մէջ, մեր փոքրաթիւ համայնքին նիւթերը կը մնան երկրորդական գետնի վրայ:

Գալով Կարգադիր յանձնախումբի կարգ մը անդամներուն հանդէպ պետութեան ունեցած որոշ վերապահութիւններուն շուրջ տարածուած խօսքերուն, ապա նշեմ, որ պետութիւնը անձերու հետ չի զբաղիր: Արդարեւ, այս մասին մեզի հասած պաշտօնական ակնարկութիւն մըն ալ գոյութիւն չունի: Ես կը հաւատամ, որ պետութիւնը իր լրջապահութեան մէջ, ի՛նչ ըսել կ՛ուզէ՝ կ՛ըսէ ուղղակիօրէն, այլ ոչ թէ կարգ մը անձերու միջնորդութեամբ: Եթէ մինչեւ 9 Հոկտեմբեր մեր ակնկալած պատասխանը չստացուի, ապա ըլլալիքը պա՛րզ է. կրկի՛ն կը դիմենք պետութեան:

 

miran.manukyan@gmail.com

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top