Հայ Ամերիկեան Հաշմանդամ Կարիքաւոր Երեխաներու Հիմնադրամի Տարեկան 18րդ Թելեթոնը Շնորհաւորելի Արդիւնք Արձանագրեց

goghk

 

ՍԱՐԳԻՍ ՄԱՃԱՌԵԱՆ

 

Հայաստանի անկախութեան 26րդ տարեդարձին օրը՝ Հինգշաբթի, 21 Սեպտեմբերին, կէսօրէն ետք ժամը 5էն սկսեալ մինչեւ կէս գիշերուան ժամը 12, Հայ Ամերիկեան հաշմանդամ կարիքաւոր երեխաներու հիմնադրամի տարեկան 18րդ թելեթոնը հասաւ իր յաղթական աւարտին՝ շնորհիւ Լոս Անճելըսի, Կլենտէյլի, Փասատինայի, Լա Քանիատայի, Լա Քրեսենթայի, Թահանկայի, Պըրպենքի, Նորթ Հոլիվուտի, Վեն Նայսի, Էնսինոյի, Նորթրիճի, Ռեսիտայի, Օրենճ Քաունթիի, Սեն Տիէկոյի, Ֆրեզնոյի եւ Քալիֆորնիոյ այլ շրջաններու հայկական համայնքներու, ինչպէս նաեւ Արեւելեան Ամերիկայի զանազան նահանգներու՝ Քոլորատոյի, Շիքակոյի, Տիթրոյիթի, Միշիկընի, Օհայոյի, Ֆլորիտայի, Նիւ Եորք-Նիւ Ճըրզիի ու Պոսթընի եւ Գանատայի հայկական համայնքներու աշխոյժ մասնակցութեան:

Հայրենի մեր սիրասուն բալիկներու բարեկեցութեան սատարող, անոնց առօրեայ կեանքը հաճելի ու գեղեցիկ միջավայրի մը մէջ անցընելու նպատակով վերանորոգուող ու վերականգնուող դպրոց-մանկատուները, մէյմէկ հայրենանուէր ու աստուածահաճոյ իրագործումներ են մեր լուսաւոր ու պայծառ ապագայի կերտման ճանապարհին վրայ: Արդարեւ, հայրենի կրթութեան եւ ուսման անթիւ ոսկեշղթային մէկ օղակը հանդիսացող այդ մանկատուն-դպրոցները, Հայաստանի եւ Արցախի պաշտպանութեան նուիրուած հերոս զաւակներ հասցնելու զուգահեռ՝ պիտի դառնան նաեւ ուսման, գիտութեան, արուեստի, մշակոյթի եւ ժամանակակից համակարգչային գիտարուեստի մեր փայլուն աստղերը պատրաստողներ:

Նախորդ 17 թելեթոններուն հետ համեմատած, Հայ Ամերիկեան հաշմանդամ կարիքաւոր երեխաներու հիմնադրամի 18րդ թելեթոնը կարճ՝ եօթը ժամ տեւեց, նկատի առնելով յաջորդող՝ Ուրբաթ օրուան աշխատանքային օր ըլլալը: Այսուհանդերձ, Լոս Անճելըսի հայկական ARTN-385, AABC-384 եւ HighVision-382 կայաններէն հեռասփռուող 18րդ թելեթոնը, որուն հասոյթը պիտի յատկացուէր Հայաստանի Սպիտակ քաղաքի մանկադպրոցի, երիտասարդական ակումբի մարմնամարզական դաշտի եւ մասնաւորաբար պասքեթպոլի աւերուած սրահի հիմնական նորոգութեանց, վերջ գտաւ շուրջ 200,000 տոլարի յաղթական ու շնորհաւորելի արդիւնքով: Արդիւնք մը, որուն երախտարժան ու շնորհաւորելի կերտիչները հանդիսացան՝ իրենց մեծ ու պզտիկ խոստումներով ու նուիրատուութիւններով նախ մեր համայնքներու մեծագոյն զանգուածը՝ արհեստաւոր դասակարգի հայրենասէր ժողովուրդը, ապա վեհոգի ու առատաձեռն անհատ բարերարները, միութիւններն ու առեւտրական հաստատութիւնները, որոնց շնորհակալութիւն պիտի յայտնուի մամուլով եւ հեռատեսիլով:

Հինգշաբթի, Սեպտեմբեր 21ի ժամը 5ին սկսելու սահմանուած 18րդ թելեթոնին հեռաձայնի զանգերը սկսան հնչելու աւելի կանուխ՝ ձեւով մը լաւատեսութիւն ներշնչող նախերգանք մը համարուելով հեռաձայններուն պատասխանող շուրջ քսանեակ մը երկսեռ պատանիներուն ու երիտասարդներուն, ինչպէս նաեւ հիմնադրամի նախագահ Յովհաննէս Բալայեանին, հիւրընկալ հաղորդավարներուն ու գործադիր մարմինի անդամներուն կողմէ։

Հայ առաքելական եկեղեցւոյ Արեւմտեան Ամերիկայի առաջնորդ Յովնան արք. Տէրտէրեանի օրհնութեան ու գնահատանքի բացման խօսքով ընթացք առաւ Հայ Ամերիկեան հաշմանդամ կարիքաւոր երեխաներու հիմնադրամի տարեկան 18րդ թելեթոնը: Սրբազան հայրը բարձրօրէն գնահատեց հայրենի երեխաներուն կեանքը բարելաւելու ուղղութեամբ 18 տարիներէ ի վեր հիմնադրամի նախագահ Յովհաննէս Բալայեանի տարած յարատեւ, օրինակելի աշխատանքը, հրաւիրեց ժողովուրդը, որ նիւթական թէ բարոյական աջակցութիւնը չզլանայ այս ազգանուէր նպատակներով նախաձեռնուած 18րդ թելեթոնին եւ օրհնութեան մաղթանքներով աւարտեց իր խօսքը:

Մեծի Տանն Կիլիկիոյ Արեւմտեան թեմի առաջնորդ Մուշեղ արք. Մարտիրոսեանի պատգամը փոխանցող Արտակ քհնյ. Տէմիրճեան, իր կարգին, գնահատական ու քաջալերական խօսքեր ուղղելէ ետք Յովհաննէս Բալայեանին ու կարգադիր յանձնախումբին՝ կոչ ըրաւ հեռուստադիտողներուն, որ լիաբուռն նուիրատուութիւններով մասնակցին հայրենի մեր քաղցրիկ երեխաներու առօրեայ կեանքի բարելաւման նպատակով կազմակերպուած այս թելեթոնին: Ապա, օրհնութեան ու յաջողութեան մաղթանքներով եզրափակեց իր պատգամը:

18րդ թելեթոնի հիմնական հաղորդավարներէն Ալֆրէդ Նազարեան, Լուիզ Կիլ Մարտիրոսեան եւ Հայաստանէն հիւրաբար Լոս Անճելըս գտնուող Անահիտ Մատոյեան, յաջորդական եօթը ժամերու ընթացքին հեռատե-սիլի ակնդիրները՝ իրենց լումաները նուիրելու հրաւիրեցին, միաժամանակ՝ ARTN-ի սթիւտիօն այցելող նահանգային ու քաղաքային անձնաւորութիւններու, ինչպէս նաեւ հայ ազգային հասարակական, մշակութային կազմակերպութիւններու եւ մամուլի ներկայացուցիչներու հետ շարունակական հարցազրոյցներով աշխոյժ պահեցին բեմահարթակը: Անշուշտ, այդ հարցազրոյցներուն յաճախ կը միանար Յովհաննէս Բալայեան: Ան թելեթոնի ընթացքին իր յատուկ շնորհակալութիւններն ու երախտագիտութիւնը յայտնեց գլխաւոր բարերարներ՝ իրաքահայ Գրիգոր Այվազեանին, իրանահայ Գագիկ Գալստեան գերդաստանին, լիբանանահայ «Գրաճեան» ընկերութեան տէր ու տնօրէն Րաֆֆի եւ Վիգէն Գրաճեաններուն եւ այլ ընտանիքներու, ինչպէս նաեւ՝ «Երեւան» տպարանի սեփականատէր Սարգիս Թօփալեանին, որ այդ օր ոչ միայն ARTN-ի սթիւտիօն այցելելով նուիրատուութիւն կատարողներու գումարները կ՛արձանագրէր ու համապատասխան ստացականները կը յանձնէր, այլեւ «Երեւան» տպարանի յարմարութիւնները Հայ Ամերիկեան հաշմանդամ կարիքաւոր երեխաներու հիմնադրամին տրամադրելով՝ կը սատարէր անոր գոյութեան ամրացման ու յարատեւման:

Սահող եօթը ժամերուն ընթացքին, ARTN-ի սթիւտիօն այցելելով՝ ակնդիրներուն իրենց պատգամները ուղղեցին նահանգային, քաղաքային, ազգային-հասարակական, մշակութային, բարեսիրական, երիտասարդական, մամուլի եւ պիզնեսի ներկայացուցիչներ՝

_ Լորա Ֆրիտմըն՝ նահանգային խորհրդարանի անդամ

_ Լի Պաքա՝ Լոս Անճելըսի նախկին շերիֆը եւ իր կինը

_ Վարդան Կարապետեան՝ Կլենտէյլի քաղաքապետ

_ Դոկտ. Արմինէ Կարպետեան՝ Կլենտէյլի Միացեալ կրթ. վարչութեան նախագահ

_ Փօլա Տիվայն՝ Կենտէյլի քաղաքապետական խորհուրդի անդամ

_ Զարեհ Սինանեան՝ Կլենտէյլի քաղաքապետական խորհուրդի անդամ

_ Յովիկ Գաբիգեան՝ Իրանահայ միութեան նախագահ

_ Դոկտ. Կարպիս Տէր Եղիայեան՝ «Մաշտոց» քոլեճի նախագահ

_ Դոկտ. Վահան Ալադադեան՝ Կլենտէյլի «Վեստ Ֆարմասի»

_ Արութին Յարութիւնեան՝ Միացեալ երիտասարդների միութեան նախագահ, եւ միութեան վարչական կազմի անդամուհիներ

_ Սարօ Գիւմրեցի՝ բանաստեղծ, «Համայնապատկեր»ի հրատարակիչ

_ Արփինէ Բէգջանեան՝ երգչուհի

_ Մարգարիտա Խլղաթեան՝ երգչուհի, եւ Ռոբերթա Արեւեան՝ երգչուհի, որոնք իրենց ելոյթներով սատարեցին թելեթոնի յաջողութեան

_ Էլանորա Տէրտէրեան

_ Գոհար Պետրոսեան

_ «Սադաֆ» առեւտուրի հաստատութեան ներկայացուցիչ Վարդգէս Ալավերդեան

_ Յովհաննէս Շահբազեան՝ ժողովրդական երգիչ

_ Արա Ահարոնեան՝ «Նոր Օր» շաբաթաթերթի աշխատակից

_ Վարդան Կարապետեան՝ մանկավարժ, հոգեբան

_ Խաչիկ Ճանոյեան՝ Իրաքահայ միութեան նախագահ

_ Յարութ Տէր Դաւիթեան՝ «Նոր Սերունդ» մշակութային միութեան նախագահ

_ Սարգիս Մաճառեան՝ լրագրող, թղթակից

_ Ռոզիկ Քէշիշեան՝ գրող, մտաւորական

Թելեթոնի ընդմիջումներու ընթացքին, ինչպէս ամէն տարի, այս տարի եւս հնչեցին լիբանանահայ Խաչատուրեան եղբայրներուն կողմէ հիմնուած «Գոհար» երգչախումբի երգերը՝ գեղարուեստական բարձր մակարդակով, սքանչելի ներդաշնակութեամբ, բեմական եզակի գեղեցկութեամբ ներկայացուող եւ համասփիւռքեան տարողութեամբ ուշադրութեան ու սիրոյ արժանացած: Իսկապէ՛ս, «Գոհար» երգչախումբին կատարումները ունին լսատեսողական այնպիսի մագնիսականութիւն մը, որ դժուար է բառերով բացատրել. աւելի լաւ է զգալու կախարդական հմայքին ապաւինիլ:

Թելեթոնի ընթացքին, ի հաճոյս ակնդիրներուն, կատարուեցաւ նաեւ ութ ֆիլմերու ցուցադրութիւն:

Յատուկ շնորհակալութիւն՝ թելեթոնի թեքնիքական երիտասարդ, անխոնջ աշխատակազմին՝ գլխաւորութեամբ Ալեքս Քոջաբաբեանին, Մեսրոպ Թօփալեանին եւ Վարդան Կարապետեանին, որոնք առիւծի բաժին ունեցան թելեթոնի յաջողութեան մէջ:

Այսպէս, գիշերուան ժամը 12ին իր աւարտը ապրած Հայ Ամերիկեան հաշմանդամ կարիքաւոր երեխաներու հիմնադրամի տարեկան 18րդ թելեթոնն ալ, իր 191,000 տոլարի արդիւնքով, հնարաւոր պիտի դարձնէ հայրենի Սպիտակ քաղաքի մանկադպրոցի, երիտասարդական ակումբի մարմնամարզական դաշտի եւ մասնաւորաբար պասքեթպոլի աւերուած սրահի նորոգութիւնները՝ Հայաստան-Սփիւռք միասնութեան ոսկեշղթան մէկ փոքրիկ, բայց ո՛չ անկարեւոր շղթայով մը եւս ամրացնելով:

Չմոռնա՛նք, մեծութիւնը ուրիշ բան չէ, եթէ ոչ՝ փոքր բաներու գումարումը…

 

 

 

Ձեր նուիրատուութիւնները կամ փոխան ծաղկեպսակի նուիրատուութիւնները կրնաք կատարել Հայաստանի Ծնողազուրկ եւ հաշմանդամ Երեխաներու Ֆոնտին։

All donations can be made to

Armenian American Orphans

Disabled Children’s Fund

Tax Exempt 501 (c) (3) Charity.

Address: 626 W. Colorado Blvd., Glendale, CA 91204

Tel: (818)239-6880 or (818)246-2070

Email: forourkids99@gmail.com

Website: forourkids99.com

Direct Deposits at any

Wells Fargo Bank

 

 

Սպիտակ քաղաքի մանկադպրոցի, երիտասարդական ակումբի մարմնամարզական դաշտի եւ պասքեթպոլի սրահի ներկայ իրավիճակը

 

 

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top