Ատրպէյճանի Անմիտ Քարոզիչը Կը Մեղադրէ Քալիֆորնիոյ Հայերը

Harout-Sassounian

ՅԱՐՈՒԹ ՍԱՍՈՒՆԵԱՆ

 

Harout-SassounianՇաբաթ մը չ՛անցնիր առանց նոր քարոզիչի մը, որ Ատրպէյճանի համար չգրէ հակահայկական ապատեղեկատուութիւն՝ ընդդէմ Հայաստանի կամ Սփիւռքի։

Այդպիսի վերջին յօդուածուածներէն մէկը գրած է Էնտրիւ Քորիպքօ՝ անյայտ անձնաւորութիւն մը, որ կը ներկայանայ իբրեւ «Մոսկուայի ամերիկացի քաղաքական վերլուծաբան»: Յայտնի չէ, թէ ինչ կրթութեան կամ հմտութիւններու հիման վրայ է, որ ան կ՛որակուի իբրեւ Հայկական Սփիւռքի «վերլուծաբան»՝ միայն իրեն յայտնի հիմնաւորումով այսպիսի կեղծ մեղադրանքներ ներկայացնելու համար: Այն տպաւորութիւնը կը ստեղծուի, որ Քորիպքոյի յօդուածը պարզապէս անտեղեակութեան հետեւանք չէ, այլ միտումնաւոր ջանք է կազմակերպուած այն մարդոց կողմէ, որոնց ինքնութիւնը դժ-ուար չէ կռահել…

Քորիպքոյի յօդուածը, որ հրապարակուած է Գանատայի Համաշխարհայնացման հետազօտական կեդրոնին կողմէ, վերնագրուած է «Միացեալ Նահանգներու Հայկական Լոպիի Առաքելութիւնն է՝ Սադրանքի Մէջ Ձգել Ատրպէյճանը Եւ Ռուսիան»: Նոյնիսկ վերնագիրէն ակնյայտ է, որ հեղինակը կը փորձէ բախում հրահրել Ռուսիոյ եւ հայերու միջեւ, երբ իրականութեան մէջ նման բան գոյություն չունի: Յօդուածի վերջաւորութեան կը նշուի, որ անիկա «նախապէս գրուած է Moscow-Baku.ru առցանց տեղեկատուական շքամուտքին (portal) համար», որ յստակ ապացոյցներ կը ներկայացնէ, թէ հեղինակը որո՞ւն կը փորձէ գոհացնել…

Իր առաջին պարբերութեան մէջ, Քորիպքօ կը յարձակի Քալիֆորնիոյ հայերուն վրայ՝ զանոնք մեղադրելով իրենց ծայրայեղ ազգայնականութեան եւ յանուն Միացեալ Նահանգներու, այլեւ ընդդէմ Հայաստանի շահերուն աշխատելու յանցանքով: Անշուշտ, այս յայտարարութիւններէն ոչ մէկը ճիշդ է…: Հեղինակին նպատակն է՝ անհիմն հակասութիւններ սերմանել: Ահա՝ Քորիպքոյի կեղծ մեկնաբանութեան առաջին պարբերութիւնը.

«Հայաստանի արտաքին քաղաքականութեան գործիքներու շարքին առաւել ազդեցիկ զէնքերէն մէկը Քալիֆորնիոյ մէջ Միացեալ Նահանգներու Հայկական Սփիւռքի լոպին է. լոպի մը, որ կը պաշտպանէ հայերու հայրենիքին առաւել ազգայնական եւ սադրիչ քաղաքականութիւնը: Հայաստանի իշխանութիւններուն համար իբրեւ պատասխանատու եւ գործնական գործիք ծառայելու փոխարէն, ինչ որ կրնար մեծ տէրութիւններու միջեւ ըլլալ հաշուարկուած, հաւասարակշռուած քաղաքականութիւն, հոս՝ դերերը շրջուած են, եւ Երեւանն է, որ  կ՛օգտագործուի իբրեւ գործիք ու միջոց՝ Միացեալ Նահանգներու հայկական լոպիին համար, աշխատելով հայկական շահերուն դէմ, ի նպաստ Միացեալ Նահանգներու յառաջխաղացման: Բոլոր պետութիւնները կը ձգտին, որ իրենց մարդիկը ստեղծեն ուժեղ եւ ազդեցիկ սփիւռքի համայնքներ, սակայն հայերը շատ քաղաքականացուած են եւ պարբերաբար բացասական ազդեցութիւն կ՛ունենան Երեւանի վրայ, որպէսզի վերջինս հետագային յայտնուի ամերիկեան վերահսկողութեան տակ»։

Նախ եւ առաջ, Քալիֆորնիոյ հայերը ոչ կը փորձեն Հայաստանի Հանրապետութեան քաղաքականութեան վրայ ազդել, ոչ ալ կարողութիւնը ունին ատոր: Երկրորդ, եթէ որեւէ մէկը նուազագոյն գիտելիք ունենար ամերիկահայերու մասին, ապա կ՛իմանար, որ անոնք յաճախ կը քննադատեն Միացեալ Նահանգներու յարաբերութիւնները Թուրքիոյ հետ, Արցախի վերաբերեալ անոր դիրքորոշումը եւ Թուրքիոյ անխոհեմ ազդեցութիւնը Միացեալ Նահանգներու կառավարութեան ղեկավարներուն վրայ, որոնք կը հրաժարին օգտագործել «Հայոց Ցեղասպանութիւն» եզրը: Հետեւաբար, ամբողջովին կեղծ է այն պնդումը, թէ Քալիֆորնիոյ հայերը կուրօրէն կը ծառայեն Միացեալ Նահանգներու շահերուն։

Այնուհետեւ Քորիպքօ կը մեղադրէ «Միացեալ Նահանգներու Հայկական Սփիւռքը»՝ Սեպտեմբերի կէսերուն քոնկրեսական պատուիրակութիւնը ոչ միայն Հայաստան տանելու, այլեւ՝ «լայնօրէն լուսաբանուած այցելութեան համար դէպի արեւմտեան Ատրպէյճանի գրաւեալ տարածքները»: Արցախի Հանրապետութիւնը ներկայացնելով իբրեւ «արեւմտեան Ատրպէյճանի գրաւեալ տարածքներ», Քորիպքօ կը յստակացնէ, թէ որո՞ւն շահերը կը պաշտպանէ…: Տարօրինակ է, որ հեղինակը, այդ քոնկրեսական այցելութիւնը կը ներկայացնէ ոչ միայն իբրեւ ամերիկամէտ քայլ, այլ նաեւ՝ «Ռուսիոյ հասցուած ընդհանուր ռազմավարական վնաս»: Այսպիսով, Քորիպքօ կը մեղադրէ ամերիկահայերը՝ ռուսական շահերը Հայաստանի մէջ ոտնահարելու յանցանքով, բան մը, որ ամբողջութեամբ չի համապատասխաներ իրականութեան, քանի որ անոնք ոչ ցանկութիւնը ունին, ոչ ալ հնարաւորութիւնը՝ Ռուսիոյ վնասելու…: Հեղինակը պարզապէս ցոյց կու տայ, թէ բացի Ատրպէյճանէն, ով է իր երկրորդ վճարող տէրը…

Ապա Քորիպքօ կը դիմէ ծայրայեղ չափազանցութեան՝ հնարելով ամերիկահայերու մասին հետեւեալ կեղծ դիպաշարը. «Իրականութեան մէջ, անոնք կը փափաքին հնարաւոր ամէն բան ընել՝ քանդելու համար հայ-ռուսական պատմական բարեկամութիւնը՝ ջղաձգօրէն փորձելով Երեւանը փրցնել Մոսկուայէն եւ բերել Ուաշինկթընի հովանիին տակ»։

Իր կեղծ պնդումը պաշտպանելու համար, հեղինակը կը նշէ, որ անցեալ ամիս Հայաստանի քաղաքացիներու բողոքները կառավարութեան պաշտօնեայի՝ ռուսերէնով ծրագիրներուն աւելի մեծ աջակցութիւն ցուցաբերելու յայտարարութեան վերաբերեալ, սերտօրէն կը համընկնի Միացեալ Նահանգներու Սփիւռքի որոշ տարրերուն եւ անոնց ամերիկեան գործընկերներուն յառաջ տարած տեսակէտին»: Իրականութեան մէջ, ոչ ոք՝ ամբողջ Սփիւռքի տարածքին, ոչ մէկ քննադատական խօսք ըսած է ռուսերէնի մասին:

Քորիպքօ կը դիմէ մէկ այլ անհիմն չափազանցութեան մը՝ պնդելով, թէ Հայաստանի կրթութեան եւ գիտութեան նախարարութիւնը «ճնշման ազդեցութեան տակ տեղի տուած է Սփիւռքի պահանջներուն եւ վերահաստատած է, որ երկրին մէջ միակ ազգային լեզուն հայերէնն է…: Արդեօք այդ մէկը մտադրուա՞ծ էր, թէ ոչ, սակայն (կրթութեան նախարար Լեւոն) Մկրտչեան ինկաւ տեղեկատուական պատերազմին ծուղակը, զոր անոր համար լարած էին Միացեալ Նահանգներու մէջ Սփիւռքի քաղաքական գործունէութիւնը կազմակերպող խորամանկ ուղեղները»: Ասիկա հեղինակի յերիւրանքն է…

Գերազանցելով տրամաբանութեան բոլոր սահմանները՝ Քորիպքօ կը պնդէ, որ «Միացեալ Նահանգներու հայկական լոպին շատ նման է Թուրքիոյ կիւլենիստներուն, այն բանով, որ անոնք նոյնպէս կը ներկայացնեն ստուերային իշխանութեան ցանց մը՝ սադրիչ միջոցներով յառաջ բերուած յստակ աշխարհաքաղաքական օրակարգով, եւ երկուքն ալ կը ծառայեն Ուաշինկթընի շահերուն, ընդդէմ իրենց հայրենիքներուն»: Քորիպքօ բոլորովին սխալ եզրակացութեամբ կը պնդէ, որ «Միացեալ Նահանգներու հայկական լոպին վտանգաւոր կերպով մօտ է լիակատար վերահսկողութեան տակ առնելու իր հայրենիքի արտաքին քաղաքականութիւնը»։

Քորիպքոյի յօդուածը լեցուն է բազմաթիւ այլ կեղծիքներով: Ան, որ պատուիրած է այս յօդուածը, պէտք է գիտակցի, որ նման հեղինակներ իրենց ծիծաղելի կեղծիքներով աւելի մեծ վնաս կը հասցնեն իրենց վճարող տէրերուն, քան թէ Քալիֆորնիոյ հայ համայնքի շահերուն…

 

ՅԱՐՈՒԹ ՍԱՍՈԻՆԵԱՆ

«Քալիֆորնիա Քուրիըր» թերթի հրատարակիչ եւ խմբագիր

 

Արեւելահայերէնի թարգմանեց՝

ՌՈՒԶԱՆՆԱ ԱՒԱԳԵԱՆ

Արեւմտահայերէնի վերածեց՝

ՍԵԴԱ ԳՐԻԳՈՐԵԱՆ

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top