ՀՅԴ Յունաստանի Երիտասարդական Միութեան 69րդ Պատգամաւորական Ժողովը

0000HOUNASDAN

 

0000HOUNASDAN

ԱԹԷՆՔ, «Ազատ Օր».- Շաբաթ, 7 եւ Կիրակի, 8 Հոկտեմբերին, Ֆիքսի «Արամ Մանուկեան» ակումբի «Աւետիքեան» սրահին մէջ գումարուեցաւ ՀՅԴ Յունաստանի Երիտասարդական Միութեան Պատգամաւորական 69րդ ժողովը:

Ներկայ էին միութեան երեք շրջաններէն՝ Ֆիքսի «Դրօ», Քոքինիոյ »«Փոթորիկ» եւ Թեսաղոնիկէի «Սողոմոն Թեհլիրեան» խումբերէն ընտրուած պատգամաւորներ, խորհրդակցական ձայնով մասնակցողներ եւ հրաւիրեալներ:

Ժողովին կը մասնակցէր ՀՅԴ Յունաստանի Կեդրոնական կոմիտէի ներկայացուցիչ Յարութ Սերոբեան, Հայ Դատի յանձնախումբի ատենապետ Սերգօ Գույումճեան, շրջաններու կոմիտէներու ներկայացուցիչները եւ ՀՅԴ Պատանեկան Միութեան Ընդհանուր վարիչ մարմինի ներկայացուցիչ Սարին Աւետիսեան:

Ժողովին բացումը կատարեց շրջանաւարտ Կեդրոնական վարչութեան ատենապետ Ռազմիկ Էրջէնեան: Ապա, առժամեայ դիւանին կողմէ հաստատուեցաւ ժողովին օրինաւորութիւնը եւ յստակացաւ ներկաներու ցանկը:

Ժողովը անցաւ իր աշխատանքներուն՝ նախապէս ընտրելով ժողովի մնայուն դիւանը: Նախագահներ ընտրուեցան Սերգօ Տէօքմէճեան եւ Սեւակ Գազարեան, իսկ քարտուղարուհիներ՝ Նարօտ Շահինեան եւ Լուսի Եզեկիէլեան, որմէ ետք ընտրուեցան բանաձեւի եւ հաշուեքննիչ յանձնախումբերը։

Խօսք առաւ ՀՅԴ Կեդրոնական կոմիտէի ներկայացուցիչ Յարութ Սերոբեան, որ յաջողութիւն մաղթեց աշխատանքներուն: Ան ըսաւ, թէ Երիտասարդական Միութիւնը գաղութի ապագան է: Նոր սերունդի աշխուժութիւնը, խանդավառութիւնը եւ պատրաստակամութիւնը մղիչ ուժ են գաղութի գոյատեւման եւ յառաջդիմութեան:

Շրջանաւարտ Կեդրոնական վարչութիւնը ընթերցեց իր միամեայ գործունէութեան տեղեկագիրը:

Կեդրոնական վարչութեան տեղեկագիրէն ի յայտ եկաւ, թէ միութիւնը գործած է երեք խումբերով՝ Թեսաղոնիկէի «Սողոմոն Թեհլիրեան»ը, Ֆիքսի «Դրօ»ն եւ Քոքինիոյ »«Փոթորիկ»ը:

Կեդրոնական վարչութիւնը, որ ընտրուած էր նախորդ Պատգամաւորական ժողովէն, կը բաղկանար Ռազմիկ Էրջէնեանէ, Արման Գրիգորեանէ, Արմէն Աճէմեանէ, Վազգէն Սավուլեանէ եւ Արտաւազդ Սիմոնեանէ:

Տարուան ընթացքին կազմակերպուած են խումբերու հերթական եւ միջխմբային ժողովներ, ընկերային երեկոներ, արշաւներ եւ պար-հաւաքոյթներ:

Արցախին եւ Սումկայթին նուիրուած նկարներու ցուցադրութիւն կազմակերպուած է Աթէնքի եւ Թեսաղոնիկէի մէջ:

Միութիւնը ներկայ գտնուած է գաղութի միութեանց կազմակերպած ձեռնարկներուն եւ գործօն իր մասնակցութիւնը բերած է Ապրիլեան պահանջատիրութեան ցոյցերուն: Անիկա Կատարած է հոգեհանգիստ-ոգեկոչում Լիզպոնի հինգ տղոց յիշատակին:

Օգոստոսին տեղի ունեցած է Երիտասարդական Միութեան բանակում open-camp-ը Խալքիտիքիի մէջ, Յունաստանի բոլոր հայ երիտասարդներուն համար:

Կեդրոնական վարչութիւնը, ինչպէս նաեւ խումբերու վարչութիւնները եւ անդամները ներկայ գտնուած են ՀՅԴ Կեդրոնական կոմիտէի, կոմիտէներու, ուղեկից միութիւններու կազմակերպած ձեռնարկներուն, ընդառաջած են իրենց ուղղուած բոլոր հրաւէրներուն:

Միութիւնը հետեւողութեամբ զբաղած է միութեան կայքով, որ լայն արձագանգ ունեցած է:

Կեդրոնական վարչութեան տեղեկագրի ընթերցումը ամբողջանալէ ետք  ներկայացուեցան երեք խումբերու տեղեկագիրներու բաժինները, որոնց մէջ կ՛արտացոլար միութեան ընդհանուր պատկերը:

Ժողովին ներկայացուեցաւ նաեւ նիւթական հաշուեկշիռը:

Տեղեկագիրի ընթերցումէն ետք տեղի ունեցաւ միութեան գործունէութեան քննարկումը, ապա ժողովը զբաղեցաւ օրակարգներու քննարկումով: Կազմակերպչականի օրակարգին մէջ զրոյցներու նիւթ դարձան ժողովական կեանքը, դաստիարակչական շարքը, նոր անդամներու ներգրաւումը, արշաւներ-բանակումները, նիւթական գործունէութիւնը, երիտասարդական եւ պատանեկան խումբերու ստեղծումը՝ Հիւսիսային Յունաստանի քաղաքներուն մէջ:

Հաստատուեցաւ անհրաժեշտութիւնը յարաբերութիւն ունենալու Եւրոպայի, Ամերիկայի եւ Միջին Արեւելքի մէջ գործող Երիտասարդական Միութիւններուն հետ, «Սքայփ»ի միջոցաւ կապ հաստատելու եւ կարծիքներ փոխանակելու անոնց հետ:

Հայ Դատ-քարոզչական օրակարգին մէջ, ժողովականները իրենց պատրաստակամութիւնը յայտնեցին աւելի շատ եւ տարբեր ձեռնարկներ կազմակերպելու Ապրիլեան աշխատանքներու ծիրին մէջ: Նաեւ որոշեցին յունական համալսարաններու մէջ գրքոյքներ բաժնել՝ լայնօրէն ծանօթացնելու համար Հայ Դատը յոյն ուսանողներուն: Շատ մեծ կարեւորութիւն տրուեցաւ Արցախի հարցը ծանօթացնելու հանրութեան: Նաեւ՝ առաջնահերթ մտահոգութիւն էր Արցախի ազատամարտիկներու եւ անոնց ընտանիքներուն օգնութիւն ապահովելու հարցը: Առաջարկուեցաւ, որ հնարաւորութեան պարագային, արիւնատուութիւն կազմակերպել՝ արիւնի պահեստ ապահովելու համար Արցախի ազատամարտիկներուն, նաեւ հաւաքել դեղեր եւ կարեւոր իրեր, զանոնք ուղարկելու համար անոնց ընտանիքներուն:

Ընթերցուեցաւ նաեւ Պատանեկան Միութեան միամեայ տեղեկագիրը, ուր կը ներկայացուէին գործունէութեան հիմնական բաժինները:

Լայնօրէն քննարկուեցան Պատանեկան Միութեան հետ Եերիտասարդականի առնչուող հարցերը՝ կարծիքներ յայտնելով եւ առաջարկներ կատարելով միութեան գործունէութեան վերաբերեալ:

Պատգամաւորական ժողովի երկու օրուան նիստերը ընթացան շատ առողջ եւ բեղմնաւոր մթնոլորտի մէջ։ Աւարտին տեղի ունեցաւ ՀՅԴ Երիտասարդական Միութեան Կեդրոնական վարչութեան նոր կազմի ընտրութիւնը. ընտրուեցաւ հինգանդամ նոր կազմ, որ կազմեց իր դիւանը հետեւեալկերպով. Արմէն Աճէմեան՝ ատենապեt, Լոռի Գույումճեան՝ քարտուղար, Արմէն Աճէմեան՝ գանձապահ, Վազգէն Սավուլեան՝ խորհրդական եւ Խաչիկ Մարուքեան՝ խորհրդական։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top