Հայաստանի Անկախութեան Տօնակատարութիւններ ՀԲԸՄ Մանուկեան-Տեմիրճեան Վարժարանէն Ներս

0000AGBUArmenianIndpendenceDay

ՔԱՆՈԿԱ ՓԱՐՔ.- Հայաստանի անկախութեան 26րդ տարեդարձին առիթով, Սեպտեմբեր 21ին եւ 24ին տօնական հագուստ հագած էր ՀԲԸՄ Մանուկեան-Տեմիրճեան վարժարանը: Դպրոցը զարդարուած էր եռագոյն դրօշակներով եւ փուչիկներով՝ շնորհիւ «Հայ Ոգի» յանձնախումբին. հայկական երաժշտութիւն կը հնչէր եւ տրամադրութիւնները բարձր էին:

Նախակրթարանի ա-շակերտները հաւաքուեցան «Աղաճանեան» սրահ, ուր տեղի ունեցաւ անկախութեան նուիրուած միջոցառումը: Հայաստանի քայլերգը կատարեց ամբողջ աշակերտութիւնը՝ դաշնամուրի ընկերակցութեամբ երաժշտութեան ուսուցչուհի Արուս Անդրէասեանի: Բացման խօսքով հանդէս եկաւ Զեփիւռ Տէմիրճեան, իսկ հանդիսավարն էր Հրաչ Սեփեթճեան: Ցուցադրուեցաւ տեսանիւթ մը՝ 11րդ դասարանին Հայաստան կատարած այցելութենէն, որմէ ետք բոլոր դասարանները մէկ առ մէկ հանդէս եկան Հայաստանի նուիրուած խմբային բանաստեղծութիւններով:

9րդ դասարանէն ինը աղջիկներ «Սասնայ աղջիկ» պարով խանդավառեցին երեխաները. յաջորդեց Հայաստանի մասին ճանաչողական տեսանիւթ մը: Հանդիսութեան աւարտին, «Glee Club»ը հանդէս եկաւ հայրենասիրական երկու երգերով, որոնց յաջորդեց խմբերգ մը՝ բոլորին մասնակցութեամբ: Փակման խօսքը կատարեց տնօրէնուհի Արփի Աւանէսեան:

Նախակրթարանի աշակերտները դուրս գալով սրահէն, դպրոցի տարածուն բակին մէջ գունաւոր կաւիճներով, Հայաստանի անկախութեան առիթով գծեցին ու ստեղծագործեցին: Ապա, կարճ դադարէ մը ետք, նախակրթարանի աշակերտները միասնաբար պատրաստեցին հսկայական հայկական Եռագոյնը:

Յետմիջօրէին տեղի ունեցաւ 6-12րդ դասարաններու տօնակատարութիւնը: Հայաստանի քայլերգը կատարեց 7րդ դասարանի երգչախումբը՝ ընկերակցութեամբ դպրոցի նուագախումբին եւ ղեկավարութեամբ երաժշտութեան ուսուցչուհի Քրիսթին Խոջայեանի: 7րդ դասարանի երգչախումբը երգեց նաեւ «Ջան Երեւան»ը: 6րդ դասարանէն Լիլիա Անտոնեանի մեներգը խանդավառեց բոլորը, իսկ «Glee Club»ը հանդէս եկաւ «Գետաշէն» երգով:

Օրուան խորհուրդը փոխանցեց տնօրէնուհի Արփի Աւանէսեան, որ այս տարի 11րդ դասարանին հետ այցելած էր Հայաստան։

Հայաստանի տեսարժան վայրերու, հայրենի հողին ու կարօտին մասին ներկաները լսեցին անցած Յունիսին Հայաստան այցելած բոլոր աշակերտներուն խօսքերէն հատուածներ, զորս ընթերցեցին Քրիսթին Յակոբեանն ու Նանօր Պետրոսեանը: Աւարտական դասարանէն Լիլիա Եարալեանի գրած տպաւորութիւնները ընթերցեց իր դասընկերուհին՝ Անահիտ Արըճեան, իսկ Հայկ Մխսեան պատմեց, թէ ինչպէս օգնեց «Օրրան» մանկատան փոքրիկներուն: Վերջապէս, ներկաները վայելեցին Հայաստան այցելութեան տեսանիւթը, որմէ ետք Հրաչ Սեփեթճեանի փակման խօսքով վերջ գտաւ հանդիսութիւնը: Հանդիսավարն էր 11րդ դասարանէն Արսինէ Գոլանջեան:

Հանդիսութեան աւարտին, ամբողջ դպրոցը ներկայ գտնուեցաւ հանրածանօթ եւ սիրուած երգիչ Յարութ Յակոբեանի համերգին՝ դպրոցի շրջափակը: Աշակերտութիւնը ազգագրական եւ ժողովրդական պարեղանակներու տակ պարեց երկար ժամանակ՝ խանդավառութիւնը հասցնելով գագաթնակէտին:

Նշենք, թէ կէսօրուան ճաշը՝ հայկական հերիսան, պատրաստուած եւ հրամցուած էր «Esso Bistro»ին կողմէ:

Նաեւ, կազմակերպութեամբ ծնողաուսուցչական մարմինին, Կիրակի, Սեպտեմբեր 24ի յետմիջօրէին, վարժարանին մէջ տեղի ունեցաւ տօնակատարութիւն-խրախճանք՝ նուիրուած Հայաստանի անկախութեան 26րդ տարեդարձին:

ՀԲԸՄ-ՀԵԸի Սան Ֆերնանտօ Հովիտի մասնաճիւղի փողերախումբը հանդէս եկաւ դրօշակի արարողութեամբ ու քայլերգներով: Զուգերգ կատարեցին Գարին Ուրունճաքճիէլ եւ Ալեքսա Սվաճեան, դաշնամուրի ընկերակցութեամբ՝ Արուս Անդրէասեանի:

Շնորհք Ա. քհնյ. Տէմիրճեանի աղօթքէն եւ ճաշի օրհնութենէն ետք, օրուան հանդիսավար Հրաչ Սեփեթճեանը հրաւիրեց կազմակերպիչ մարմինի համաատենապետուհիներ Ալին Ուրունճաքճիէլն ու Լիզ Զօրեանը, որոնք հանդէս եկան հայերէն եւ անգլերէն բացման խօսքերով: Խօսք առաւ նաեւ վարժարանիս հոգաբարձական կազմի անդամ տոքթ. Ալէն Գարակէօզեանը:

Գեղեցկօրէն զարդարուած էր բեմը, ուրկէ ելոյթ ունեցան հանրածանօթ երաժիշտ Արա Տապանճեանն ու իր նուագախումբը: Վարժարանիս եւ «Ara Dance Studio»ի զոյգ պարախումբերը գեղեցիկ ելոյթներ պարգեւեցին ներկաներուն՝ առաջնորդութեամբ պարուսոյցներ Անայիս Աւանէսեանի եւ Արա Մելքոնեանի:

Օրուան ճաշը սպասարկեցին աշակերտական խորհուրդի անդամները, իսկ օրուան վերջաւորութեան ներկաները հայկական երաժշտութեան տակ շարունակեցին խանդավառ մթնոլորտը:

Նշենք, որ «Արտեմիս Նազարեան» ծաղկոցի աշակերտները եւս տօնեցին Հայաստանի անկախութեան տարեդարձը։ Սեպտեմբեր 21ին, ազգային եռագոյնի երանգներով տարազներ հագած աշակերտներուն մատչելի լեզուով խօսեցաւ Անի Պատաքեանը՝ հայ ըլլալու, հայկական արժէքներու, լեզուին ու սովորութիւններուն մասին:

Աշակերտները հանդէս եկան հայերէն երգերով եւ երթ կատարեցին դպրոցին շուրջ՝ բարձր բռնած Հայաստանի դրօշակներ, որոնք իրենց կողմէ պատրաստուած էին: Կէսօրէն ետք, ծաղկոցի աշակերտները միացան ամբողջ դպրոցին՝ վայելելով երգիչ Յարութ Յակոբեանի համերգը:

 

(Թղթակցութիւնը՝

Վարժարանէն)

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top