Իսրայէլ Կը Քննէ Արցախի Մէջ Անօդաչու Սարքեր Կիրառելու Փաստերը

1115drones

1115drones

Իսրայէլի ոստիկանութիւնը քրէական հետաքննութեան սկսած է անօդաչու թռչող սարք (ԱԹՍ) արտադրող այն իսրայէլական ընկերութեան դէմ, որուն արտադրանքին միջոցով Ատրպէյճան 2017ին ԱԹՍ փորձարկման ընթացքին ռմբակոծած էր հայկական դիրքերը:

«Տը Թայմզ աֆ Իսրայէլ»ը (The Times of Israel) կը յայտնէ, որ ոստիկանութեան յայտարարութեան մէջ կ՛ըսուի. «Aeronautics Defense Systems Ltd. ընկերութեան նկատմամբ հետաքննութիւն կ՛ընթանայ՝ յայտնի գնորդին հետ կատարուած գործարքի ծիրին մէջ»:

Հետաքննութիւնը կը վարէ Իսրայէլի ոստիկանութեան Միջազգային յանցագործութիւններու հետաքննութեան միութիւնը, որ յայտնի է եբրայերէն «Եահպալ» (Yahbal) անունով: Գործընթաց սկսելու մասին տեղեկութիւնները յայտնի դարձան 13 Նոյեմբերին, երբ իսրայէլական դատարանը թոյլատրած էր հետաքննութիւն իրականացնել՝ սահմանափակելով տեղեկատուութեան տրամադրումը այս ուղղութեամբ: Ոստիկանութիւնը, մասնաւորապէս, յայտնած է, որ պիտի չյստակացնէ, թէ ով է «յայտնի գնորդը»:

Aeronautics Defense Systems ընկերութիւնը յայտարարութիւն տարածած է՝ նշելով, որ իրենք կը պատրաստուին լիակատար աջակցութիւն ցուցաբերելու հետաքննութեան եւ «ընել առաւելագոյնը, որպէսզի հետաքննութիւնը կարելի եղածին չափ արագ արդիւնք տայ»:

Ատրպէյճանի պաշտպանութեան նախարարութեան պաշտպանական արտածման վերահսկման գործակալութիւնը Օգոստոսին Aeronautics Defense Systems ընկերութեան համար կասեցուցած էր Orbiter 1K տեսակի ԱԹՍ-ն «յայտնի գնորդին» արտածելու արտօնագիրը:

Aeronautics-ի տուեալներով՝ ընկերութիւնը մտադիր էր «յայտնի գնորդին» հետ յառաջիկայ երկու տարիներուն ընթացքին կնքել 20 միլիոն տոլար արժողութեամբ պայմանագիր: Այդ ժամանակ ընկերութեան տարածած հաղորդագրութեան մէջ կ՛ըսուէր, որ ԱԹՍ վաճառելու ՊՆ կասեցումը կը վերաբերի միայն «յայտնի գնորդին», իսկ միւս օտարերկրեայ գնորդներուն վրայ անիկա չի տարածուիր:

«Տը Թայմզ աֆ Իսրայէլ»ը կը գրէ, որ թէեւ իսրայէլեան կողմը չի յայտներ գնորդին անունը, սակայն յայտարարութիւններէն կարելի է ենթադրել, որ անիկա Ատրպէյճանն է: Արտօնագիրի կասեցումը եղաւ այն դէպքէն երկու շաբաթ անց, երբ նախարարութիւնը բողոք ստացած էր, որ Ատրպէյճանի պահանջով ընկերութիւնը իր Orbiter 1K տեսակի ԱԹՍը Լեռնային Ղարաբաղի մէջ կիրառած է հայկական ուժերուն դէմ:

ՊՆ ներկայացուած բողոքի մասին առաջին տեղեկութիւնները յայտնուած էին Maariv թերթին մէջ:  Զեկոյցին համաձայն՝ ընկերութիւնը խումբ ուղարկած է Ատրպէյճանի մայրաքաղաք Պաքու՝ ցուցադրելու ԱԹՍը, որ կրնայ բեռցուիլ 1-2 քիլոկրամնոց պայթուցիկով եւ ուղարկուիլ թշնամիին թիրախը «անձնասպանական» առաքելութեամբ:

Համաձայն ներկայացուած բողոքին՝ Orbiter 1K-ը Ատրպէյճանի զինուած ուժերուն ցուցադրելու ընթացքին ընկերութենէն խնդրած են հայկական ռազմական դիրքի վրայ փորձարկում իրականացնել: Իսրայէլի օրէնքներով՝ նման փորձարկումը հակաօրինական է, իրական թիրախներու վրայ անոր փորձարկման համար անհրաժեշտ է յատուկ թոյլտուութիւն: «Այս պարագային քիչ հաւանական է, որ Aeronautics Defense Systems-ը ստանար նման թոյլտուութիւն, որովհետեւ Իսրայէլ Հայաստանը թշնամի պետութիւն չի համարեր», կը գրէ «Տը Թայմզ աֆ Իսրայէլ»ը:

Maariv նախապէս հաղորդած էր, որ ԱԹՍը շահագործող երկու իսրայէլցիները հրաժարած էին նման յարձակում իրականացնելէ՝ հակառակ անոր, որ սպառնալիքներ ստացած էին իրենց ղեկավարներէն: Աւելի ուշ, Պաքուի մէջ գտնուող Aeronautics Defense Systems-ի պատուիրակութեան երկու բարձրաստիճան պաշտօնեաներ փորձած էին կատարել Ատրպէյճանի պահանջը, սակայն անհրաժեշտ փորձառութեան բացակայութեան պատճառով չէին կրցած ճիշդ խոցել թիրախները:

Իսրայէլի պաշտպանութեան նախարարութենէն յայտնած էին, որ իրենք կը քննեն դէպքը, սակայն այս հարցով աւելին չեն կրնար ըսել:

«Տը Թայմզ աֆ Իսրայէլ»ը կը յիշեցնէ, որ 2016ին Ատրպէյճան օգտագործած էր այլ արտադրութեան իսրայէլական «ինքնասպան» ԱԹՍ մը՝ կիրառելով զայն հանրակառքի մը վրայ յարձակման ընթացքին, որուն հետեւանքով սպաննուած էին եօթը հայեր:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

One Comment;

  1. Mardig Madenjian said:

    Կատա՞կ է թէ իրականութիւն, վերջէն կ’իմանանք, եթէ իմացանք: 20 ամիս անցած է եւ նոր հետաքննութիւն պիտի կատարուի:

*

Top