ՀԲԸՄի Վաչէ Եւ Թամար Մանուկեան Վարժարանի Դէպի Սարդարապատ Ձեռնարկը

1122agbuschool

2018 Մայիսին կ՛ամբողջանայ հարիւրամեակը Հայաստանի Ա. Հանրապետութեան կազմութեան եւ հայոց պայքարի վճռակամութեան, որ կը բնորոշուի Սարդարապատի փառապանծ յաղթանակով։

Առ այդ, Հինգշաբթի, 9 Նոյեմբեր 2016ի երեկոյեան, կազմակերպութեամբ ՀԲԸՄի Վաչէ եւ Թամար Մանուկեան երկրորդական վարժարանի Հայկական բաժանմուքին եւ աշակերտական խորհուրդին, վարժարանիս «Պոյաճեան» սրահին մէջ տեղի ունեցաւ աւանդութիւն դարձած ընտանեկան հաւաք-ընթրիք-հանգանականութիւնը՝ «Դէպի Սարդարապատ» բնաբանով, որուն ընթացքին գործադրուեցաւ աշակերտական գեղարուեստական հարուստ յայտագիր:

Պատուոյ հիւրերէ, ծնողներէ եւ ՀԲԸՄի համակիրներէ բաղկացած հոծ բազմութիւն մը կը լեցնէր սրահը: Երեկոյի հանդիսավարութիւնը ձեռնհասօրէն կատարեց եւ ներկաները իր յաճախակի խօսքերով ու օրուան խորհուրդով ոգեւորեց վարժարանիս Հայկական բաժանմունքի պատասխանատու ուսուցչուհի Լորա Գույումճեան:

Ներկաները, խանդավառ մթնոլորտի մէջ, նախ վայելեցին ընթրիքը՝ նոյնինքն դպրոցի աշակերտներուն կողմէ սպասարկուած: Ապա, ընթրիքի աւարտին, աշակերտները ներկայացուցին գեղարուեստական ճոխ յայտագիր: Գեղարուեստական բաժինով ելոյթ ունեցան վարժարանիս նուագախումբը, երգչախումբը՝ խմբավարութեամբ Պարթեւ Կիւլիւմեանի եւ դաշնակի ընկերակցութեամբ Էլմիրա Սիմոնեանի, նաեւ պարախումբը՝ առաջնորդութեամբ Թագուհի Պէզաթեանի: Յայտագիրը կ՛ընդգրկէր հայրենասիրական երգեր ու պարեր, առաջին մասը նուիրուած Արցախին ու Հայաստանին, իսկ երկրորդ մասը՝ Սարդարապատին:

Վարժարանիս «Հայ Թատրոն» ընտրովի դասարանի դերակատարները, ղեկավարութեամբ Լորա Գույումճեանի, ներկայացուցին ընտանեկան եւ դպրոցական առօրեայ կեանքէն քաղուած ծիծաղաշարժ տեսարաններ, որոնք արժանացան ներկաներու ջերմ ծափողջոյններուն ու բարձր գնահատանքին:

Ամբողջ երեկոն հոգեկան խոր լիցք եւ մեծ ուրախութիւն պատճառեց բոլոր ներկաներուն, որոնք իրենց կարգին իրենց սրտաբուխ նուիրատուութիւններով լրումին հասցուցին կազմակերպուած հանդէսը:

Վարձքը կատար մեր սքանչելի աշակերտներուն, կազմակերպիչ ուսուցիչներուն եւ ձեռնարկը քաջալերող ներկաներուն:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top