Չգնահատենք Դասալիքը

1202samanta

ԱԲՕ ՊՈՂԻԿԵԱՆ1202samanta

Անցեալ շաբաթ օր, «Ասպարէզ» տեղ տուաւ IDeA հիմնադրամին կողմէ հրապարակուած հաղորդագրութեան, ուր կը յայտարարուէր Սըմենթա Փաուըրի «Օրորա» մրցանակի դատակազմին միանալու մասին:

Հայոց Ցեղասպանութեան վերապրողներուն հանդէպ մարդասիրական մօտեցում ցուցաբերողներուն երախտագիտութիւն յայտնելու ընդհանուր գաղափարով ճամբայ ելած «Օրորա»ն, ամէն տարի կը պատուէ մեծ մարդասէր մը եւ անոր բարեսիրական  հիմնադրամին կը տրամադրէ մէկ միլիոն տոլար՝ իր գործունէութիւնը աւելի արդիւնաւէտօրէն յառաջ տանելու համար: Մեր ժողովուրդին կողմէ երախտագիտական արտայայտութիւն խորհրդանշող այս ձեռնարկը իրապէս ողջունելի է եւ արժանի ամէն տեսակ գուրգուրանքի ու քաջալերանքի:

Բարոյական բարձր սկզբունքով ճամբայ ելած «Օրորա»ն պարտի բծախնդրօրէն վերաբերիլ իր դատակազմի անդամներու ընտրութեան ընթացքին հետ: Այս սկզբունքը խախտուած է Սըմենթա Փաուըրի պարագային, որովհետեւ այս անձնաւորութիւնը, որ անցեալին մեծ յոյսեր ներշնչած էր հայութեան՝ ցեղասպանութեանց դէմ իբրեւ պայքարող, երբ Օպամայի նախագահութեան օրօք դարձաւ ՄԱԿի մօտ Ամերիկայի դեսպան, Հայոց Ցեղասպանութեան հանդէպ ցուցաբերեց դասալիքի մօտեցում՝ խուսափելով իր նեցուկը տրամադրելէ՝ ամերիկեան պաշտօնական դիրքորոշումը յօգուտ ցեղասպանութեան ճանաչման փոխելու ճիգերուն: Ընդհակառակը, իր լռութեամբ ան մեղսակից դարձաւ Հայոց Ցեղասպանութիւնը ուրացողներուն ու հերքողներուն:

Մեր ընթերցողներէն շատերը ընդվզած են այս լուրը կարդալով: Ահա՛ վկայութիւն մը այդ ընդվզումներէն. մեր ընթերցողներէն Սարգիս Տաղտեվիրեան կը գրէ. «Սըմենթա Փաուըր այն անձերէն է, որ կը «հաւատայ», բայց անկարող է իր սկզբունքները որոշումի վերածել տալու իր գործակիցներուն կողմէ: Ան 8 տարի շարունակ Պ. Օպամայի բարձրագոյն վարչակազմին մաս կազմելով, հակառակ իր պաշտօնավարութեան աւարտի օրերուն (2016) յիշելուն Հայոց Ցեղասպանութիւնը՝ այլ մարդկային զանգուածային աղէտներու շարքին, եւ հակառակ ներկայ գտնուելուն Նիւ Եորքի՝ Հայոց Ցեղասպանութեան նուիրուած հայկական եկեղեցւոյ մէջ պատարագին ու անոր յաջորդող ոգեկոչման հաւաքին, իրեն նման նախապէս հաւատացողներ Պ. Օպամայի ու Հ. Քլինթընի հետ ձախողեցաւ Հայոց Ցեղասպանութեան ճանաչումը պետականօրէն վաւերականացնել եւ հաստատել: Զինք «հիփոքրիթ» չեմ ուզեր կոչել, բայց կը ցաւիմ «Օրորա»ի որոշումին համար»:

Մե՛նք ալ…

 

 

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

4 Comments

  1. Bagratuni said:

    Այո ես էլ համաձ եմ: Նա արժանի չէ այդ պաշտոնին ու պատվին:

  2. Bagratuni said:

    Այո ես էլ համաձայն եմ: Նա արժանի չէ այդ պաշտոնին ու պատվին:

  3. Andy K said:

    Absolutely and wholeheartedly agree with this editorial. Aurora has shot itself in the foot with this decision. Shame.

*

Top