Երկու Խօսք՝ «Արարատ» Երգչախմբի Տարեկան Ելոյթի Մասին

1130araratchoir

1130araratchoir

ՌՈԲԵՐՏ ՄԱՐԳԱՐԵԱՆ

 

Արուեստի ցանկացած աշխատանքի մասին կարծիք ու տեսակէտ յայտնելիս կարելի է առաջնորդուել մաքսիմալիստական մօտեցմամբ, որպէս չափանիշ՝ ընդունել լաւագոյնն ու գերագոյնը, եւ համապատասխան դրան գնահատական տալ կատարուած աշխատանքին ու ստեղծագործութեանը: Սակայն, արդար լինելու եւ արուեստի ցանկացած ստեղծագործութեան մասին անաչառ կարծիք յայտնելու համար, գերադասելի է նկատի ունենալ այն պայմանները, որոնց ներքոյ ստեղծուել ու յօրինուել է տուեալ գեղարուեստական աշխատանքը:

Կիրակի, Նոյեմբերի 19ին, ՀՄԸՄի Գլենդելի «Արարատ» մասնաճիւղի երգչախումբը հանդէս եկաւ իր անդրանիկ տարեկան համերգով:

Այս տարի իր հիմնադրման 39ամեակը նշող ՀՄԸՄի Գլենդելի «Արարատ» մասնաճիւղի «Արարատ» երգչախումբն ընդամէնը երկուս ու կէս տարուայ պատմութիւն ունի: Երգչախումբն իրար շուրջ է համախմբել երգ ու երաժշտութեան մի խումբ սիրահարների, ովքեր մի կողմ դրած առօրեայ հոգսերն ու մտահոգութիւնները՝ շաբաթական մի քանի ժամ իրենց հոգու խաղաղութիւնն ու անդորրը գտնում են ՀՄԸՄի Գլենդելի «Արարատ» մասնաճիւղի յարկի ներքոյ՝ տրուելով արուեստին ու երաժշտութեանը:

Դատելով երգչախմբի վերջին համերգին ներկայ հանդիսատեսի կողմից հնչած գնահատանքի արտայայտութիւններից՝ պիտի՛ հաստատել, որ չնայած երգչախմբի սիրողական մակարդակին, ներկայացուած աշխատանքը գերազանցեց ակնկալիքները՝ յաւակնելով արհեստավարժ մակարդակի ելոյթի:

Վերջին առնուազն մէկ ու կէս տարուայ ընթացքում մօտիկից հետեւելով երգչախմբի աշխատանքին՝ կարող եմ վկայել, որ երգչախմբի անդամների ու մասնաւորապէս դրա շնորհաշատ ղեկավար Լիլիան Աւագի տքնաջան ու հետեւողական աշխատանքի, ինչպէս նաեւ «Արարատ» մասնաճիւղի մշակութային բաժանմունքի հովանաւորութեան, այսօր «Արարատ» երգչախումբը կարելի է համարել կայացա՛ծ:

«Արարատ» երգչախմբի երգացանկը վկայում է նրա հետաքրքրութեան ու ճաշակի մասին՝ ընդգրկելով տարբեր ժանրերի պատկանող երաժշտութիւն՝ սկսած Կոմիտասից ու Կարա Մուրզայից մինչեւ Կանաչեան ու Գալանդարեան, հայկական դասական ու ժողովրդական երաժշտութիւնից մինչեւ արեւմտեան երաժշտութիւնն ու արգենտինական տանգօն:

Արուեստի նոյնիսկ ամենակատարեալ աշխատանք մասնագէտ քննադատի ակնոցով դիտուելիս չի կարող անթերի լինել: Նոյնը կարելի է ասել նաեւ «Արարատ» երգչախմբի անդրանիկ ելոյթի մասին: Բայց ինչպէս իրանական առածն է ասում՝ «Միայն չգրուած թելադրութիւնն է, որ անսխալ է լինում»: Նոյն տրամաբանութեամբ եթէ մեր դատողութեան կշիռքի երկու նժարներին դնենք մեր ակնկալիքներն ու ներկայացուած աշխատանքը, ապա ցանկացած անաչառ ու արդար հանդիսատես կարող է վկայել, որ ներկայացուած աշխատանքն իր ծանրութեամբ գերազանցեց ակնկալիքները:

«Արարատ» երգչախումբն իր առջեւ բացուած ու դէպի հայ երգարուեստի գագաթները տանող ճամբին առաջին, սակայն հաստատո՛ւն ու ամուր քայլերն է վերցրել, ինչն ուրախալի ու ոգեւորիչ լինելով հանդերձ նաեւ բարձրացնում է երգչախմբի յառաջիկայ համերգներից մեր ակնկալիքների մակարդակը:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top