Յառաջիկայ Տարիներուն Երեւանի 160 Մանկապարտէզներ Պիտի Վերանորոգուին. Տարօն Մարգարեան

 

ԵՐԵՒԱՆ.- Երեւան քաղաքի 160 մանկապարտէզներ յառաջիկայ հինգ տարիներուն ընթացքին պիտի վերանորոգուին: Ըստ «Արմէնփրէս»ի՝ Էրեբունի վարչական շրջանին մէջ հիմնանորոգուած թիւ 70 մանկապարտէզի բացման արարողութեան ընթացքին լրագրողներու հետ ճեպազրոյցի մը ընթացքին յայտնեց Երեւանի քաղաքապետ Տարօն Մարգարեան:

Ըստ անոր՝ Երեւանի քաղաքապետարանը ու Եւրոպական ներդրումային դրամատունը ստորագրած են համաձայնագիր մը, որմով յաջորդ երեք տարիներուն ընթացքին Երեւանի շուրջ 40 մանկապարտէզներ վերանորոգուած են: «Երեւանի քաղաքապետարանի պիւտճէով եւ բարերարներու աջակցութեամբ մեր միւս մանկապարտէզները եւս պիտի վերանորոգենք: Մեր նպատակը այն է, որ մեր երեխաներն ու մեր մանկապարտէզի աշխատակազմը բնական պայմաններու մէջ աշխատին», ըսաւ Մարգարեան:

Շրջելով թիւ 70 հիմնանորոգուած մանկապարտէզին մէջ, Երեւանի քաղաքապետը շնորհակալութիւն յայտնեց առաջին տիկնոջ՝ Ռիտա Սարգսեանի հովանաւորութեան համար: «Մենք կը փափաքինք, որ Երեւան քաղաքի բոլոր մանկապարտէզները այսպիսի պայմաններ ունենան : Յաջորդող տարիներուն, Երեւան քաղաքի մանկապարտէզներուն մէջ պիտի սկսին լայնածաւալ վերանորոգման աշխատանքներ եւ միւս երեխաներն ալ ետ պիտի չմնան եւ պիտի ունենան վերանորոգուած լաւ պայմաններով մանկապարտէզ», աւելցուց քաղաքապետը:

Էրեբունի վարչական շրջանի թիւ 70՝ «Լապտերիկ» մանկապարտէզը հիմնանորոգուած եւ նոր գոյքով պիտի ընդունի իր 197 սաները: Հայաստանի առաջին տիկին Ռիտա Սարգսեանի նախաձեռնութեամբ եւ հովանաւորութեամբ հիմնանորոգուած մանկապարտէզին մէջ ամէն ինչ ստեղծուած էր երեխաներուն օրը հեքիաթ դարձնելու համար՝ նոր գոյք, պատերէն կախուած գունազարդ նկարներ, գորգեր, խաղալիքներ: Առաջին տիկինը լրագրողներուն յայտնեց, որ ուրախ է աւելի շատ ոչ թէ երեխաներուն, այլ ծնողներուն համար: «Մենք գիտենք, ծնողքը հանգիստ է այն ժամանակ, երբ գիտէ, որ իր երեխան լաւ պայմաններու մէջ կ՛ապրի: Ինչու կ՛ըսեմ կ՛ապրի, կը մեծնայ, որովհետեւ օրուան ամէնամեծ մասը անոնք կ՛անցնեն այս շէնքին մէջ»,- ըսաւ ան:

Երեւանի քաղաքապետարանը մանկապարտէզին 778 հատ գոյք նուիրած է, բարեկարգած է բակը, տեղադրած զրուցատաղաւարներ եւ խաղեր:

Մանկապարտէզը ներգրաւուած էր «Լոյս» եւ «Բիայնա» բարեգործական հիմնադրամներու վերանորոգման 2017 ծրագիրին մէջ: Նախադպրոցական այս հաստատութեան մէջ կը գործեն 6 խումբեր: Երեխաներուն հետ տարուող կրթադաստիարակչական աշխատանքները կ՛իրականացնեն 28 աշխատողներ:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top