Իմանալո՛վ Կողմնորոշուիլ

ARF127_Full_Page_Asbarez color

ARF127_Full_Page_Asbarez color

ԱԲՕ ՊՈՂԻԿԵԱՆ

Հինգշաբթի օրուան «Ասպարէզ»ը Կլենտէյլի, Պըրպենքի ու Լա Քրեսենթայի մէջ մեծ թիւով կը տարածուի: Անվճար տարածման այս քաղաքականութեան հետապնդած նպատակներէն մէկը հասնիլն է որոշ զանգուածի մը, որ Դաշնակցութեան անմիջական շրջանակէն դուրս կը գտնուի:

127 տարուան պատմութիւն կերտած այս ազգային կուսակցութիւնը աջէն ու ձախէն միշտ ենթարկուած է ցեխարձակումներու եւ սուր յարձակումներու: Գործի ու պայքարի կուսակցութեան մը համար բնակա՛ն է թշնամական ու թունաւոր սլաքներու թիրախ դառնալ: Ի վերջոյ, իւրայատուկ՝ յեղափոխակա՛ն նկարագիրով Դաշնակցութիւնը, չէր կրնար մէկ կողմէ պահպանողականներու, իսկ միւս կողմէ ծայրայեղ ձախերու ճաշակով աշխատիլ, հետեւաբարար, սպասելի է, որ այդ զոյգ ճամբարներու մարտկոցներու հարուածներուն արժանանայ:

Դաշնակցութեան պատմական դերակատարութիւնը նենգափոխելու ամէնէն հետեւողական ու ամէնէն լայն քարոզչութեան, անշուշտ, խորհրդային վարչակարգին ու անոր լծակից դարձած ուժերուն կողմէ ձեռնարկուած էր: Այս քարոզչութեան զոհերը առաւելապէս Հայաստանի բնակիչներն էին, որոնց մօտ Դաշնակցութեան մասին ստեղծուած է բացասական պատկերացում մը, որուն իբրեւ հետեւանք՝ այսօր, Հայաստանէն Քալիֆորնիա հասած հսկայ զանգուած մը նախապաշարուած ու վերապահ կը մնայ Դաշնակցութեան հանդէպ:

Հայաստանեան զանգուածին մօտ Դաշնակցութեան հանդէպ ստեղծուած բացասական կարծրատիպը կոտրելու ճիգ մըն է «Ասպարէզ»ի լայն տարածումը, մանաւանդ՝ հայաստանեան զանգուածին հասնելու: Գիտակից ենք, որ դիւրաւ իրագործելի առաջադրանք մը չէ՛ այդ, եւ պէտք է անոր կողքին այլ ծրագիրներ մշակել ու երկխօսութեան սկսիլ, եթէ ոչ թիւր պատկերացումներ քանդելու համար, ապա գոնէ՝ շահագրգռուած անձերուն յստակացումներու առիթ ընծայելու:

Դաշնակցութեան օրուան տօնակատարութիւնը նման ծրագիրներու շարքին է: Այդ ձեռնարկին ներկայ եղողը կրնայ բաւարար տեղեկութիւն ստանալ Դաշնակցութեան գործունէութենէն ու անոր քաղաքական դիրքորոշումներէն, եւ ըստ այնմ՝ գնահատել ու կողմնորոշուիլ:

Այսու, մեր հայրենակիցներուն կ՛առաջարկենք ներկայ ըլլալ այս Կիրակի երեկոյեան, Կլենտէյլի Հայ Սքուլին մէջ տեղի ունենալիք Դաշնակցութեան Օրուան տօնակատարութեան:

Հրամմեցէ՛ք եւ ըստ այնմ կողմնորոշուեցէ՛ք:

 

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top