Մեղմացումը Կը Բաւարարէ՞

Apo-Photo2-300x228-2

ԱԲՕ ՊՈՂԻԿԵԱՆ

 

Apo-Photo2-300x228-2Հայաստանի բնակիչը նոր տարին սկսաւ գնաճին ու թանկացումներուն պատճառած պրկումներով:

Յայտնի է, որ ժողովրդային դժգոհութեան ալիք մը կայ՝ ընդդէմ այս թանկացումներուն: Այդ ալիքը կը վերածուի՞ ժողովրդային բողոքի ցոյցերու, թէ պարզապէս կը դառնայ արտագաղթի մէկ նոր ազդակ: Յամենայնդէպս, ընդդիմութիւնը, յանձինս «Ելք» դաշինքին, որոշած է օգտուիլ պահէն եւ ժողովրդային բողոքի ցոյցերով իշխանութեան վրայ ճնշում բանեցնել: Իշխանութեան գլուխ կանգնողները, ներառեալ՝ նախագահը, այս անգամ որոշած են չանտեսել խնդիրը եւ առնուազն ձեւացնել, թէ կը փորձեն մեղմացնել թանկացումներու ծանր հետեւանքները: Նախագահին՝ այս հարցով տնտեսութեան պատասխանատուներու խորհրդակցական հանդիպում կատարելու նախաձեռնութիւնը, նոյնի՛սկ եթէ ձեւական է, կրնայ որոշ պաշտօնատարներ մղել, որ մեղմացման նպաստող քայլեր ձեռք առնեն:

Մեղմացումը, անշուշտ, ընկերվարական գաղափարախօսութիւն ունեցող կուսակցութեան մը համար նպատակ չի՛ կրնար ըլլալ: Իշխանութեան հետ համագործակցութեան դաշինք կնքած ըլլալու փաստը կրնայ «մեղմացման» ժամանակաւոր լուծումը հանդուրժելի դարձնել, եթէ անշուշտ այդ ժամանակաւորը հիմնականի վերածելու նախապայմանները տեսանելի ըլլան: Այս մեկնակէտէն է, որ Դաշնակցութիւնը իր մատը պիտի պահէ ժողովուրդի բազկերակին վրայ, մի՛շտ մտահոգ երկրի կայունութեամբ, սակայն նաեւ՝ հարեւան երկրի փորձէն հարստացած, պնդելով արդար համակարգի արագաքայլ իրականացման անհրաժեշտութիւնն ու առաջնահերթութիւնը:

Ի միջի այլոց, երկրի տնտեսական վիճակը մշտադիտարկող, խնդիրները ուսումնասիրող յատուկ յանձնախումբ մը ստեղծելու Դաշնակցութեան նախաձեռնութիւնը կարելի չէ չգնահատել: Այդ ոլորտը երբեք անտեսած չըլլալով՝ յատուկ մասնագիտական խումբ մը գործի լծելն ու զայն հրապարակային բեմ առաջ մղելը կրնան շատ աւելի արդիւնաւէտ ըլլալ։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top