Լոս Անճելըսի Հայ Քոյրերու Վարժարանի Ծննդեան Ձեռնարկները

0000ASA Xmas1

0000ASA Xmas1

ԼԻՆՏԱ ԳԱՆՏԻԼԵԱՆ

 

Դեկտեմբեր ամիսը իր տօնական զգեստաւորումով եւ քրիստոնէական ներշնչումով զարդարած էր Հայ Քոյրերու վարժարանը: Հոն հանգամանօրէն տեղադրուած էր գեղեցիկ կանաչ եւ պսպղուն եղեւնին՝ մանուկ Յիսուսի մսուրով, ամէն կողմէ հնչող Ծննդեան շարականներով եւ ամանորեան խանդավառ երգերով: Այս բոլորը դրոշմուեցան աշակերտներու միտքին ու հոգիին մէջ, որպէսզի այդ մթնոլորտը փոխանցեն նաեւ իրենց տուները եւ դառնան Ծնունդի ու Նոր Տարուան ընտանեկան սեղաններու վրայ արտասանուող եւ փոխանցուող պատգամ՝ մանուկներու եւ պատանիներու բերանով:

Այս մթնոլորտին մէջ, վարժարանը իր քրիստոնէական դաստիարակութեան գործնական աշխատանքը իրագործեց զանազան ելոյթներով եւ հանդէսներով՝ աւետելով Յիսուսի ծնունդը:

Դեկտեմբեր 12ին, վարժարանի սրահէն ներս տեղի ունեցաւ տօնածառի լուսաւորումը, առաւօտեան աղօթքի արարողութենէն անմիջապէս ետք, երբ մանկապարտէզի աշակերտները Ծննդեան շարականով աւետեցին Յիսուսի ծնունդը եւ ծափողջիւններով լուսաւորեցին տօնածառն ու մսուրը:

0000ASA Xmas2

Այս տարի, Հայ Քոյրերու վարժարանը գերազանցեց ինքզինք՝ ներկայացնելով Հենտըլի «Մըսայա»ն՝ «Christmas Messiah for junior voices» գործին հետեւողութեամբ:

4-6րդ դասարաններու աշակերտները ամբողջ ամսուան փորձերէն ետք ներկայացան հանրութեան՝ բացառիկ ելոյթով մը: Դեկտեմբեր 17ի առաւօտեան, յաւարտ Ս. պատարագի, Կլենտէյլի Հայ կաթողիկէ Ս. Գրիգոր Լուսաւորիչ աթոռանիստ եկեղեցւոյ մէջ, ներկայութեամբ հիւսիսային Ամերիկայի եւ Գանատայի Կաթողիկէ հայոց առաջնորդ Միքայէլ եպս. Մուրատեանի, եկեղեցւոյ ժողովրդապետ հայր Բարսեղ Պաղտասարեանի, առաքինազարդ քոյրերու, ուսուցիչներու, ծնողներու եւ հոծ բազմութեան՝ տեղի ունեցաւ բացառիկ եւ տպաւորիչ ելոյթ մը:

Եկեղեցիէն ներս խորհրդաւոր կերպով մուտք գործեցին չորրորդ դասարանի աշակերտները, որոնք բոցավառող մոմերու լոյսին ներքեւ, շարականի երգեցողութեամբ՝ իրենց տեղերը առին խորանին վրայ: Ամբողջ երեսուն վայրկեան եկեղեցին ցնծաց Ծննդեան շարականներով. երգերով իրենց մեղմիկ եւ անմեղ մեկնաբանութիւններով աւետեցին Յիսուսի ծնունդը՝ ներկաներու հոգիները պարուրելով խաղաղութեան եւ հաճութեան զգացումով, ապա նոյն ձեւով մեկնեցան՝ ներկաներուն փսփսալով «Քրիստոս ծնաւ եւ յայտնեցաւ» անժամանցելի աւետիսը:

Խորանը անմիջապէս տեղի տուաւ յաջորդ խումբին, որ ներկայացուց «Մըսայա»ն: Իւրաքանչիւր աշակերտ իր բաժինը այնքան կատարեալ սորված էր, այնքա՛ն լաւ կ՛արտայայտուէր եւ իւրաքանչիւր մեներգող այնքա՛ն լաւ կը մեկնաբանէր իր բաժինը, որ ամբողջութիւնը ներկայացաւ իբրեւ անթերի ներայացումը հազարաւոր տարիներ առաջ պատահած, բայց այժմէական երկնային խորհրդաւոր դէպքի մը՝ Յիսուսի ծննդեան, որ միաժամանակ զարմացուց եւ հիացուց ներկաները:

Արցունքը կարելի չէր զսպել ի տես տասնամեայ պատանիներուն՝ հաւատքով ու անմեղութեամբ արտասանած բառերուն. կարծես այդ տօնական մթնոլորտին մէջ մէյ մէկ հրեշտակներ ըլլային՝ երկինքէն իջած, աւետելու համար Քրիստոսի մարդեղութիւնը:

Ելոյթի աւարտին, ներկաները լիցքաւորուած քրիստոնէական խորհուրդով եւ բաւարարուած տօնական օրերու շունչով՝ վերադարձան տուն, բազմապատկուած հաւատքով ու գոհունակութեամբ՝ վարժարանին ջամբած քրիստոնէական գործնական դաստիարակութեան նկատմամբ:

Ապրի՛ն պատանիները, որոնք ներկայացուցին երժշտական այս գործը, ինչպէս պիտի ընէին երաժշտանոցի մը աշակերտները: Այս բոլորը կը պարտին իրենց երաժշտութեան ուսուցչուհի Վարդուհի Պաղտասարեանին, որ իր երաժշտական հմտութեամբ եւ կազմակերպչական կարելիութիւններով այս տարի եւս ներկայացաւ գերազանց յայտագիրով:

Դեկտեմբեր 21ի յետմիջօրէին տեղի ունեցաւ մանկապարտէզի Ծննդեան աւանդական հանդէսը՝ վարժարանիս «Դանիէլեան» սրահէն ներս, ծնողներու եւ տնօրէնութեան ներկայութեան: Աշակերտները մեծ հմտութեամբ ներկայացուցին ոչ միայն քրիստոնէական երգեր, շարականներ եւ աղօթքներ, այլ նաեւ Յիսուսի ծննդեան պատմութիւնը, որուն գլխաւոր մասը կը ներկայացնէր մանկապարտէզի աւարտական դասարանը: Հիանալի պատկեր մըն էր դիտել մանուկներու անմեղ եւ  հարազատ ներկայացումը Ծնունդին։ Այս տարուան «Մարիամ»ը կը ներկայացնէր Վանիա Սամուէլեան, «Յովսէփ»ը՝ Մայքլ Թովմասեան, իսկ «Եղիսաբէ»չը՝ Էլիզապէթ Ֆրաթ, որոնք տպաւորիչ էին իրենց խօսակցութեամբ, շարժուձեւերով, արտայայտութեամբ եւ բեմական հմտութեամբ։ Նոյնը կարելի է ըսել պատմութիւնը ամբողջացնող բոլոր միւս դերակատարներուն՝ հրեշտակներուն, մոգերուն, հովիւներուն մասին, որոնք պահ մը ներկաները փոխադրեցին Նազարէթ: Հրեշտակներու ծննդեան աւետումէն ետք, մանկապարտէզի բոլոր աշակերտներուն միասնական երգեցողութիւնը ամբողջացուց պատկերը: Երգերու պատրաստութիւնը արդիւնք էր երաժշտութեան ուսուցչուհի Վարդուհի Պաղտասարեանի եւ  դասարանի ուսուցչուհիներուն հետեւողական ու բծախնդիր աշխատանքին:

Նոյն օրը, մանկապարտէզի հանդէսին յաջորդեց նախակրթարանի աշակերտներու ելոյթները։ Անոնք դասարան առ դասարան ներկայացան եւ տօնական օրերու ուրախ մթնոլորտին մէջ երգեցին, արտասանեցին, պարեցին, գործածեցին երաժշտական այլազան գործիքներ եւ իբրեւ գեղեցիկ ծաղկեփունջ՝ նուիրեցին իրենց ծնողներուն:

Յաջորդ օրը, վարժարանի «Դանիէլեան» սրահը աւելի խանդավառ եւ ուրախ էր. այս անգամ, մանկապարտէզի բոլոր փոքրիկները իրենց ծնողներուն հետ տօնական զգեստներով պատրաստ կը սպասէին նախաճաշելու Կաղանդ Պապային հետ: Հաճելի էր եւ ուրախութիւնը վարակիչ. ամէն կողմ ուտելիքներ, խաղալիքներ, երգ-պար եւ հայկական Կաղանդ. վստահ, որ փոքրիկներուն համար անմոռանալի փորձառութիւն մըն էր, իսկ ծնողներուն համար՝ բացառիկ օր։

Վարժարանի աւանդութիւնն է Դեկտեմբեր ամսուան գոծունէութինը նուիրել Ս. Ծնունդին։ Այսպիսով, 2017ի Դեկտեմբեր ամիսն ալ յաջողութեամբ պսակուեցաւ՝ վարժարանէն ներս ծրագրուած յայտագիրներու լիարժէք իրականացումով:

Վարձքը կատար բոլոր նուիրեալներուն: Շնորհակալութիւն բոլոր ծնողներուն եւ նուիրատուներուն:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top