Իրան Կը Քննադատէ Սահմանապահ Ուժեր Ստեղծելու Ամերիկեան Ծրագիրը

ԹԵՀՐԱՆ, «Ռոյթըրզ».- Իրանի արտաքին գործոց նախարարութեան բանբեր Պահրամ Ղասեմի յայտնեց, որ Սուրիոյ մէջ սահմանապահ ուժեր ստեղծելու ամերիկեան յայտարարութիւնը՝ «Սուրիոյ ներքին հարցերուն բացայայտ միջամտութիւն մըն է եւ տագնապը պիտի բարդացնէ»:

«Այդ որոշումը տրուեցաւ այնպիսի պահու մը, երբ սուրիական բանակն ու դաշնակից ուժերը ահաբեկչական «Իսլամական պետութեան» եւ «Ճապհաթ Նուսրա»ի դէմ մեծ յաղթանակներ կ՛արձանագրէին», ըսաւ Ղասեմի:

«Իրան, Ռուսիա եւ Թուրքիա պիտի շարունակեն լարուածութեան մեղմացման գօտիները ամրապնդելու եւ այս տագնապին բոցերը մարելու ջանքերը, եւ այդ ծիրէն ներս նկատառելի ձեռքբերումներ ու յաջողութիւններ արձանագրած են արդէն։ Ժամանակը հասած է, որ ամերիկեան վարչակազմը շրջանի հարցերուն միջամտելու եւ խանգարելու քաղաքականութիւնը փոխէ ու իր ուժերը կարելի եղածին չափ շուտ դուրս բերէ Սուրիայէն, որպէսզի արտօնէ, որ սուրիացի ժողովուրդը իր ճակատագիրն ու ապագան ճշդէ մեծամասնութեան կարծիքին հիմամբ», աւելցուց Իրանի արտաքին գործոց նախարարութեան բանբերը:

Իր կարգին, Սուրիոյ արտաքին գործոց նախարարութիւնը, մեկնաբանելով Միացեալ Նահանգներու կողմէ Սուրիոյ հիւսիս- արեւելքը սահմանապահ ուժեր ստեղծելու մասին յայտարարութիւնը՝ ըսաւ. «Ամերիկեան հովանաւորութեամբ զինեալ շարժումներու անդամակցող իւրաքանչիւր սուրիացի, իր ժողովուրդին ու հայրենիքին հանդէպ դաւաճան է, եւ անոր հետ պիտի վերաբերինք իբրեւ այդպիսի՛ն»:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top