Սուրբ Ծննդեան Տօնը Սրբոց Ղեւոնդեանց Մայր Տաճարին Մէջ

0000Dioxmas2

0000Dioxmas2

ՊԸՐՊԵՆՔ.- Ուրբաթ, Յունուար 5ի երեկոյեան, Ս. Ծննդեան տօնի Ճրագալոյցին, առաջնորդանիստ Սրբոց Ղեւոնդեանց Մայր տաճարին մէջ արարողութեան հանդիսապետեց թեմակալ առաջնորդ Յովնան արք. Տէրտէրեան: Երեկոյեան ժամերգութենէն եւ Սուրբ Գրային ընթերցումներէն ետք, Ս. պատարագ մատուցեց եւ քարոզեց ծուխի հոգեւոր հովիւ Խաժակ քհնյ. Շահպազեան, իսկ դպրաց դասի երգեցողութիւնը կատարեց տաճարի երգչախումբը՝ ղեկավարութեամբ Ալենուշ Եղնազարի եւ երգեհոնահարութեամբ Գեղամ Աշճեանի:

Պատարագի աւարտին, սրբազանին հանդիսապետութեամբ կատարուեցաւ նախատօնակ Ս. Ծննդեան եւ Աստուածայայտնութեան: Ապա սրբազանն ու Խաժակ քհնյ. Շահպազեանը հաւատացեալներուն մոմերը վառեցին եւ աւետեցին Յիսուսի Ս. Ծնունդը:

Ս. Ծննդեան տօնին օրը՝ Շաբաթ, Յունուար 6ին, նոյն տաճարին մէջ, առաջնորդին հանդիսապետութեամբ կատարուեցաւ ժամերգութիւն՝ դասապետութեամբ տաճարի «Խաչատուրեան» դպրաց դաս երգչախումբի ղեկավար Ստեփան սրկ. Կէօզիւմեանի:

Ս. սեղանին սպասարկեցին ծուխի հոգեւոր հովիւը, Հարաւային Քալիֆորնիոյ առաջնորդական փոխանորդ Մանուկ Ա. քհնյ. Մարգարեանն ու սարկաւագները: Արարողութեան մասնակցեցան Լոս Անճելըսի շրջանի կարգ մը հոգեւորականներ։ Արարողութեան ներկայ էին թեմական խորհուրդի ատենապետ Ժոզէֆ Կանիմեան, ինչպէս նաեւ Կլենտէյլի մէջ պաշտօնավարող Հայաստանի գլխաւոր հիւպատոսի տեղակալ Վալերի Մկրտումեան ու Գանատայի մօտ Հայաստանի պատուոյ հիւպատոս Պերճ Սվազլեան, Մեծն Լոս Անճելըսի Կաթոլիկ եկեղեցւոյ առաջնորդի ներկայացուցիչ հայր Ալեքսէյ Սմիթ եւ պետական կարգ մը պաշտօնեաներ, թեմի բարերարներ եւ կնքահայրեր։ Առաջնորդը ողջունեց անոնց ներկայութիւնը եւ գնահատեց անոնց մատուցած նուիրեալ ծառայութիւնները:

0000dioxmas1

Ապա ընթերցուեցաւ Գարեգին Բ. կաթողիկոսի յղած պատգամը, որմէ ետք քարոզեց առաջնորդը՝ բնաբան ունենալով «Կատարեսցուք զսրբութիւն ահիւն Աստուծոյ»ն։ Մեծ թիւով հաւատացեալներ Ս. հաղորդութիւն ստացան՝ ձեռամբ սրբազանին եւ հոգեւորականներու։

Պատարագի աւարտին, սրբազան հօր հանդիսապետութեամբ կատարուեցաւ Ջրօրհնէքի արարողութիւն, որուն մասնակցեցան հոգեւորականները, սարկաւագներն ու երգչախումբը: Խաչի կնքահայրն էր Մարտիկ Վարդումեան, որ արժանացաւ սրբազան հօր օրհնութեան: Հիւրաբար, Ս. Աւետարանէն անգլերէն ընթերցումով մասնակցեցաւ հայր Սմիթը։

Արարողութեան աւարտին, հաւատացեալները ստացան օրհնուած ջուրէն եւ համբուրեցին Ս. խաչը: Ապա սրբազանը առաջնորդուեցաւ դէպի «Արմէն Համբար» դահլիճ, ուր դարձեալ շնորհաւորեց բոլորին Նոր Տարին եւ Սուրբ Ծնունդը եւ բարեմաղթութիւններ կատարեց:

Յունուար 6ի երեկոյեան, առաջնորդը, Վաչէ արք. Յովսէփեան եւ Լոս Անճելըսի շրջանի հոգեւորականները, առաջնորդարանի «Գալայճեան» սրահին մէջ կատարեցին Տնօրհնէքի աւանդական արարողութիւնը։ Բացման խօսքը կատարեցին Մայր տաճարի հոգեւոր հովիւ եւ երեկոյի հանդիսավար Խաժակ քհնյ. Շահպազեան (հայերէն), իսկ անգլերէնով բարի գալստեան խօսք կատարեց Տլայլա Շահպազեան։ Սեղաններու օրհնութիւնը կատարեց առաջնորդը։

Հոգեւոր երգերով եւ յայտուկ յայտագիրով ելոյթ ունեցաւ Թահանկայի Սրբոց Առաքելոց Հայց. եկեղեցւոյ «Երուանդ Պապայեան» շաբաթօրեայ դպրոցի աշակերտութիւնը։ Սքանչելի կատարումներով ելոյթ ունեցաւ նաեւ երգիչ Հիպըրթ Լիօ Սարեան։

Սրբազանը իր հոգեւոր պատգամին մէջ ըսաւ. «Անցեալ տարի Ամերիկայի Արեւելեան թեմի առաջնորդարանին մէջ գումարուած Գերագոյն հոգեւոր խորհուրդի ժողովին ընթացքին, Գարեգին Բ. Ամենայն Հայոց կաթողիկոսը մտայղացումը ունեցաւ 2018 թուականը հռչակել որպէս Համահայկական-համաերիտասարդական տարի։ Երիտասարդութիւնը միշտ եղած է մեր հոգեւոր ծառայութեան կիզակէտը, մեզի թեւեր պարգեւող, յոյս ներշնչող, հոգեւոր սխրանքներու մղող զօրաւոր ուժը։ Սակայն, 2001էն ասդին, երբ վեհափառ հայրապետին օրհնութեամբ կազմակերպեցինք 1700ամեակին նուիրուած երիտասարդական աննախադէպ ուխտագնացութիւնը դէպի Ս. Էջմիածին եւ հիմերը դրինք Հայ եկեղեցւոյ երիտասարդաց միաւորման (ՀԵԵՄ), իւրայատուկ կապուածութեան զգացումով մը համակերպուեցանք, ինչ որ կը նմանի հոգեւոր ժառանգի վերագտնումի։ Քաջ գիտակցութեամբ մեր թեմը եւս կը միանայ այս համահայկական-համաերիտասարդական շարժումին, որուն գագաթնակէտը պիտի ըլլայ 2018ի Յուլիսին կայանալիք ուխտագնացութիւնը դէպի Ս. Էջմիածին»։

Սրբազան հայրը փակման խօսքին մէջ անգամ մը եւս շնորհաւորեց բոլորին Նոր Տարին եւ Սուրբ Ծնունդը եւ օրհնեց զանոնք, ապա շնորհակալութիւն յայտնեց նաեւ գեղարուեստական յայտագիրին մաս կազմողներուն։

Յայտագիրի աւարտին սրբազան հօր կողմէ իւրաքանչիւր ընտանիքի բաժնուեցաւ գեղեցիկ ծրարով պատրաստուած նուէր մը: Ընդունելութեան ներկայ գտնուեցան աւելի քան 300 հիւրեր։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

One Comment;

*

Top