Երեսփոխան Կարօ Փայլանի Հանդիպումը Ֆրանսայի Հայ Կազմակերպութիւններու Ներկայացուցիչներուն Հետ

Untitled

 

UntitledՓԱՐԻԶ.- Երկուշաբթի, 29 Յունուարին, Հայկական Բարեգործական Ընդհանուր Միութեան «Ալեք Մանուկեան» կեդրոնին մէջ, Թուրքիոյ Խորհրդարանի երեսփոխան Կարօ Փայլան հանդիպում ունեցաւ Հայկական կազմակերպութիւններու համակարգող խորհուրդին (CCAF) մաս կազմող կազմակերպութեանց անդամներուն հետ, նախքան մասնակցիլը յաջորդ օր՝ 30 Յունուարի տարեկան ընթրիքին, զոր կը հովանաւորէր Ֆրանսայի նախագահ Էմանիւէլ Մաքրոն:

Հայ երեսփոխանը յատկապէս այդ առիթով հրաւիրուած էր Ֆրանսա: Ան տեսակցութիւններ կ՛ունենար նախագահին եւ քաղաքական զանազան պատասխանատուներու հետ:

Անակնկալ այս հանդիպումին շուրջ 30 հոգի ներկայ էր, մեծամասնութեամբ երիտասարդներ, որոնք աւելի քան ժամ մը տեւած մտերմիկ զրոյցին ընթացքին ուղղեցին հարցումներ եւ տեսակէտներ փոխանակեցին երեսփոխանին հետ: Հարցադրումները կը վերաբերէին այսօրուան միջազգային քաղաքականութեան եւ մասնաւորաբար Իրաքի եւ Սուրիոյ մէջ տեղի ունեցող ռազմական գործողութիւններուն: Ընդհանրապէս Միջին Արեւելքի այս թոհուբոհին մէջ, Կարօ Փայլանի նման անձնաւորութիւն մը հայաշխարհի ուշադրութիւնը իր վրայ կը սեւեռէ, նկատի ունենալով որ ան իւրաքանչիւր օր, իր խորհրդարանական գործունէութեան ծիրին մէջ, դէմ յանդիման կը գտնուի թրքական պետութեան որդեգրած քաղաքականութեան հետեւանքներուն, որոնց նկատմամբ յստակ ընդդիմադիր կեցուածք կը ցուցաբերէ եւ մնացած է գրեթէ մինակ, նկատի ունենալով որ նոյնիսկ իր կուսակիցներէն շատեր անարդար կերպով բանտակուած են:

Երիտասարդներուն մեծ մասին հարցադրումները բնականաբար կը վերաբերէին Թուրքիոյ ռազմական լայնածաւալ յարձակումներուն եւ Սուրիոյ նկատմամբ վարած քաղաքականութեան, նկատի ունենալով, որ նախագահ Էրտողանի ինքնագլուխ եւ սանձարձակ քայլերուն առջեւ ո՛չ մէկ խոչընդոտ գոյութիւն ունի եւ ո՛չ մէկ արտաքին ուժ ցարդ այս արարքները արգիլող միջոցներու դիմած է: Իսկ անդին քիւրտերը եւ ազգային այլ փոքրամասնութիւնները ցաւալի եւ ահաւոր կացութեան մէջ կը գտնուին:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top