175 Հայուհիներ Ուխտեցին Ծառայել Լիբանանահայ Օգնութեան Խաչին

0000LIPANAN (5)

 

0000LIPANAN (5)

ՊԷՅՐՈՒԹ.- Հովանաւորութեամբ Լիբանանահայ Օգնութեան Խաչի (ԼՕԽ) Շրջանային վարչութեան եւ կազմակերպութեամբ Շրջանային կազմակերպչական յանձնախումբին, Շաբաթ, 3 Փետրուարի առաւօտեան, «Ազդակ»ի «Փիւնիկ» սրահին մէջ տեղի ունեցաւ ԼՕԽի երդման յատուկ արարողութիւն, որուն ընթացքին 175 հայուհիներ ուխտեցին սիրայօժար կերպով ցմահ ծառայել ԼՕԽին: Ձեռնարկին ներկայ էին ԼՕԽի մօտ Հայ Օգնութեան Միութեան (ՀՕՄ) Կեդրոնական վարչութեան ներկայացուցիչ Նելլի Վեքիլեան, ԼՕԽի մօտ ՀՅԴ Լիբանանի Կեդրոնական կոմիտէի ներկայացուցիչ Յակոբ Հաւաթեան, ԼՕԽի Շրջանային վարչութեան անդամներ, մասնաճիւղերու վարչականներ, ԼՕԽուհիներ եւ համակիրներ:

Լիբանանի, Հայաստանի եւ ՀՕՄի քայլերգներու յոտնկայս ունկնդրութենէն ետք, ԼՕԽի Շրջանային կազմակերպչական յանձնախումբին անունով Զեփիւռ Յովհաննէսեան ողջունեց ներկաները՝ նշելով օրուան ուխտի խորհուրդն ու իմաստը՝ միութենական թէ այլ բնագաւառներու մէջ, ապա թուեց յայտագիրին գլխաւոր մասերը: Յովհաննէսեան այս առիթով ամփոփ գիծերու մէջ ներկայացուց կազմակերպչական յանձնախումբին կողմէ պատրաստուած եւ Կարօ Յովհաննէսեանի կողմէ խմբագրուած «Կենսատու Աւիշ՝ ԼՕԽի Կամաւոր Բանակին» խորագրեալ գրքոյկը, որմէ մէկական օրինակ բաժնուեցաւ ներկաներուն:

Կնքամայրութեամբ ԼՕԽի բազմավաստակ անդամներէն Թագուհի Ատալեանի, 175 նորագիրներ յոտնկայս ուխտեցին կամաւոր ու սիրայօժար կերպով ծառայել ԼՕԽն՝ հաւատարիմ մնալ ԼՕԽի սկզբունքներուն, իրագործել անոր հետապնդած նպատակները եւ յարգել ծրագիր-կանոնագրի բոլոր տրամադրութիւնները:

Օրուան պատգամախօսն էր Սօսէ Ճինպաշեան, որ շնորհաւորելէ ետք նորագիրները, սեղմ գիծերու մէջ ներկայացուց ՀՕՄի հիմնադրութեան պատմականը՝ ՀՅԴի հիմնադիրներէն Ռոստոմի (Ստեփան Զօրեան) «Հայ Կարմիր Խաչը» խորագրեալ յօդուածի նախաձեռնութենէն մինչեւ Էտկար Ակնունիի (Խաչատուր Մալումեան) 1910ին ՀՅԴի կողմէ գործուղուիլը Միացեալ Նահանգներ՝ հիմը դնելու համար Հայ Կարմիր Խաչին:

ԼՕԽի Շրջանային վարչութեան խօսքը ուղղեց, Շրջանային վարչութեան անդամ Մարալ Յովհաննէսեան, որ ողջունելէ ետք պատկան մարմիններու ներկայացուցիչները, ԼՕԽի Շրջանային վարչութեան անունով շնորհաւորեց ուխտեալ ԼՕԽական ընկերուհիները:

Այս առիթով ներկայացուեցաւ գեղարուեստական յայտագիր, որուն ընթացքին Համազգայինի «Բ. Կանաչեան» երաժշտանոցի աշակերտուհիներէն Մարիա Եագուպեան քանոնի վրայ նուագեց Սայաթ Նովայի սիրերգներէն «Էշխեմետ»ը: Յաւերժ Շխրտըմեան ասմունքեց բանաստեղծ Ժագ Ս. Յակոբեանի «Այս Քոյրերը» խորագրեալ բանաստեղծութիւնը: Տուտուկահար Յակոբ Քէլուկեան նուագեց «Հայրենիքի ջուր», «Իմ հայրենիք» եւ Սայաթ Նովայի սիրերգային փունջէն շարան մը:

Այս առիթով կազմակերպչական յանձնախումբին անունով Սանդուխտ Հերկելեան բեմ հրաւիրեց եւ յատուկ յուշանուէրով պատուեց օրուան կնքամայր Թագուհի Ատալեանն ու պատգամախօս Սօսէ Ճինպաշեանը: Ձեռնարկը փակուեցաւ «Սարդարապատ» յաղթերգին ունկնդրութեամբ, որմէ ետք ներկաները հրաւիրուեցան յատուկ հիւրասիրութեան:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top