«ՀԱՅՈՑ ԱՇԽԱՐՀ»Ի ՀԱՐՑԱԶՐՈՅՑԸ ՀՅԴ ՀԱՅԱՍՏԱՆԻ ԳԵՐԱԳՈՅՆ ՄԱՐՄՆԻ ԱՆԴԱՄ ԱՐՍԷՆ ՀԱՄԲԱՐՁՈՒՄԵԱՆԻ ՀԵՏ

0210arsenhampartsoumian

«Մարդկանց Մէջ Վստահութիւնը Վերականգնելու Խնդիր Կայ»

 

Ա. ՍԻՄՈՆԵԱՆ

 

0210arsenhampartsoumianԱ. ՍԻՄՈՆԵԱՆ.- ՀՅԴ Բիւրոյի եւ Հայաստանի Գերագոյն մարմնի նիստում գնահատուել է  քաղաքական կոալիցիայի մէկամեայ գործունէութիւնը. խօսելով ձեռքբերումներից՝ չէք շրջանցել  նաեւ բացթողումներն ու թերութիւնները:

ԱՐՍԷՆ ՀԱՄԲԱՐՁՈՒՄԵԱՆ.- Մենք փորձում ենք խստապահանջ լինել առաջին հերթին ինքներս մեր նկատմամբ: Եւ նշում ենք, որ վերջին մէկ-երկու տարում արձանագրուած դրական ձեռքբերումների կողքին միաժամանակ ունենք բազմաթիւ չլուծուած խնդիրներ, ծանր սոցիալ-տնտեսական իրավիճակ, անվստահութեան մթնոլորտ, իսկ դրանց յաղթահարման ուղղութեամբ պէտք է հետեւողական աշխատանք տանել:

Մենք նաեւ չենք ակնկալում, որ տարիներով կուտակուած լրջագոյն խնդիրները այս կարճ ժամակահատուածում կարող են միանգամից լուծուել ու հանրային յուսահատութիւնը փարատել, բայց նաեւ չենք հանդուրժում եղած թերացումները եւ մեր հնարաւորութեան չափով ու այն դերակատարութեամբ, որն ունի Դաշնակցութիւնն այս իշխանութեան մէջ, փորձելու ենք մշտապէս հետամուտ լինել, որպէսզի բոլոր խնդիրները ըստ տրամաբանութեան իրենց լուծումը ստանան:

 

Ա. ՍԻՄՈՆԵԱՆ.- Դաշնակցութեանը չի՞ բաւարարում երկրում գոյութիւն ունեցող թերութիւնների մասին կառավարութեան բացախօսութեան աստիճանը:

ԱՐՍԷՆ ՀԱՄԲԱՐՁՈՒՄԵԱՆ.- Կարծում եմ, որ կառավարութիւնը փորձում է իր գործունէութիւնը հրապարակային դարձնել որքանով հնարաւոր է: Սակայն կան հարցեր, որոնց առնչութեամբ հաշուետուողականութիւնը պէտք է աւելի բարձր լինի, եւ մեր ժողովրդին աւելի հասկանալի  ներկայացուեն առկայ  խնդիրներն ու այն մարտահրաւէրները, որոնց մեր երկիրը դիմագրաւում է:

Եւ ամենակարեւորը երկրի ապագայի տեսլականն է, մարդիկ ցանկանում են յստակ պատկերացում կազմել, թէ որդեգրուած քաղաքականութեան շնորհիւ ինչպիսի՞ Հայաստան են ունենում, ինչպիսի՞ նոր կառուցակարգեր են պատկերացնում սոցիալական, տնտեսական քաղաքականութեան մէջ:

Վերջին մէկ տարում լուրջ քայլեր են կատարուել տնտեսական կեանքը աշխուժացնելու, տարածքային կառավարման, տեղական ինքնակառավարման մարմինների մակարդակում իրավիճակ շտկելու ուղղութեամբ, ինչպէս նաեւ աշխատատեղերի ստեղծման հարցում: Եւ մենք կարծում ենք, որ պատկան լիազօր մարմինները արժէ, որ այդ ամէնը ներկայացնեն մեր  հանրութեանը, մարդիկ պէտք է իմանան, թէ կատարուած աշխատանքի շնորհիւ տնտեսութեան ո՞ր ճիւղերում ի՞նչ արդիւնքներ են արձանագրուել, որքա՞ն աշխատատեղեր են ստեղծուել, ու թէ ի՞նչ քայլ են առաջիկայում նախատեսւում:

Այսինքն՝ կատարուած աշխատանքի արդիւնքները ճիշդ եւ օպերատիւ (գործնական կերպով-Խմբ.) ներկայացնելու խնդիր ունենք: Մինչդեռ շատ դէպքերում անհրաժեշտ տեղեկատուութիւն չի տրամադրւում, ու հանրային դժգոհութիւնների մի մասը նաեւ սրանով է պայմանաւորուած:

Նորանկախ Հայստանն իր  պատմութեան ընթացքում մշտապէս ունեցել է վստահութեան  խնդիր, դրա համար կան օբյեկտիւ (առարկայական-Խմբ.) պատճառներ, որովհետեւ տեւական ժամանակ՝ հազարամեակներ շարունակ, գտնուելով օտար լծի տակ, մեր ժողովուրդը ըստ էութեան միշտ իշխանութեանը վերաբերուել է ինչպէս օտարի: Այդ իներցիան (անշարժութիւնը-Խմբ.) նաեւ այսօր գոյութիւն ունի:  Ու այս երեւոյթը  յաղթահարելու լրջագոյն խնդիր կայ, որովհետեւ անվստահութիւնը համատարած է, թէ՛ իշխանութեան նկատմամբ է, թէ՛ ընդդիմութեան, թէ՛ ամենատարբեր ասպարէզներում, թէ անգամ ամենափոքր օղակներում մեզանում կայ  վստահութեան ճգնաժամ:

Եւ մարդկանց մէջ վստահութեան վերականգնման ընթացքը մեզ հեշտ չի տրուելու: Ու  ակնկալել, որ հնարաւոր է բարեփոխումների ճանապարհով լուրջ արդիւնքներ արձանագրել թէ՛ պետական շինարարութեան, թէ՛ բիզնես ոլորտում, միամտութիւն է: Դրա համար վերափոխուելու, ճիշդ ներկայանալու, ճիշդ վարքագիծ դրսեւորելու եւ սեփական աշխատանքով սեփական կեցուածքով եւ վարքագծով օրինակ ծառայելու խնդիր կայ:

Շատ կարեւոր է անկախ ու անաչառ դատական համակարգի գոյութիւնը, ինչի մասին մենք մշտապէս խօսում ենք: Առանց դրա որեւէ բարեփոխում, կապ չունի՝ այն որ ոլորտին է վերաբերում, դատապարտուած է ձախողման:

Նոր սահմանադրութեամբ ճիշդ մեխանիզմի (մեքենակառոյցի-Խմբ.) վրայ է դրուած դատական  անկախութեան երաշխաւորման հարցը: Եւ մշակուող ու շրջանառութեան մէջ գտնուող օրգանական օրէնքներով այդ ամէնն ամրագրւում է, ու այլեւս 7 սարերի հետեւում չէ այն  ժամանակը, երբ կարող ենք արձանագրել, որ Հայաստանի պետական իշխանութեան ասպարէզում լուրջ փոփոխութիւն է տեղի ունեցել:

 

Ա. ՍԻՄՈՆԵԱՆ.- ՀՅԴն շեշտում է արդար, թափանցիկ կադրային քաղաքականութեան մասին, ուր տեղ կը գտնեն բարձր որակաւորում ունեցող, մրցունակ ու վստահելի մարդիկ:

ԱՐՍԷՆ ՀԱՄԲԱՐՁՈՒՄԵԱՆ.- Գաղտնիք չէ, որ մեր երկրում շատ յաճախ պետական պաշտօնեաները նշանակւում եւ ազատւում են առանց հանրութեանը դրա պատճառները պատշաճ ձեւով ներկայացնելու: Եւ շատ դէպքերում հարցականներ են մնում տուեալ պաշտօնեայի պրոֆեսիոնալիզմի, բարոյական նկարագրի, ունակութիւնների եւ գիտելիքների հետ կապուած:  Այս առումով, կարծում ենք, ամէն ինչ պէտք է լինի հասարակութեան համար պարզ, հասկանալի ու տեսանելի: Եթէ պաշտօնեան ձախողուել է, դրա մասին պէտք է բացայայտ ասուի:

Նաեւ անհրաժեշտ է սահմանել յստակ չափորոշիչներ, թէ այս կամ այն աշխատանքն ինչ սկզբունքներով է գնահատւում: Այս առումով, կարծում  եմ, այն գործընթացը որ Հայաստանում սկսուած է, խօսքս մարզպետների աշխատանքի գնահատման յստակ չափորոշիչների մասին է, շատ ճիշդ է ու մենք պէտք է կարողանանք ամբողջ պետական համակարգում նման  չափորոշիչներ սահմանել, որպէսզի հասարակութեան համար տեսանելի ու հասկանալի լինի՝ տուեալ պաշտօնեան յաջողե՞լ է, թէ ձախողել: Ու այդ դէպքում այլեւս չեն աշխատի միջանձնային յարաբերութիւնները, ծանօթ-խնամիական կապերը:

Պէտք է արձանագրենք, որ իշխանութեան որդեգրած կադրային քաղաքականութիւնը թէպէտ դանդաղ քայլերով, սակայն դրական տեղաշարժ է արձանագրում: Ակնկալել, որ այս բոլոր հարցերն արագ կը ստանան իրենց լուծումը, որ իդէալական վիճակ կ՛ունենանք բոլոր ասպարէզներում՝ ճիշդ չի լինի, բայց որ այս ուղղութեամբ կատարուող քայլերը պէտք է  շարունակուեն, միանշանակ է: Այստեղ շատ կարեւոր է, որ մեր հասարակութիւնը լինի պահանջատէր:

 

Ա. ՍԻՄՈՆԵԱՆ.- Դաշնակցութիւնը առաջարկում է նաեւ իրականացուող սոցիալական քաղաքականութեան վերանայում:

ԱՐՍԷՆ ՀԱՄԲԱՐՁՈՒՄԵԱՆ.- Անշուշտ: Սահմանադրական փոփոխութիւնները ենթադրում են փոփոխութիւններ մեր հանրային պետական կեանքի բոլոր ասպարէզներում,  այդ թւում՝ սոցիալական քաղաքականութեան ասպարէզում, որովհետեւ սոցիալական քաղաքականութիւնը չի կարող ածանցուել տնտեսական քաղաքականութեանը, չի կարելի նսեմացնել սոցիալական քաղաքականութեան դերն ու նշանակութիւնը:

Երկրի տնտեսական ու սոցիալական քաղաքականութիւնները պէտք է համահունչ լինեն, որովհետեւ ինչպէս սխալ հիմքերի վրայ դրուած սոցիալական քաղաքականութիւնը կարող է վնասել տնտեսական առաջընթացին եւ զարգացմանը, այնպէս էլ ճիշդ հակառակը:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top