Յունաստանի Մէջ Նշուեցաւ «Արմէնիքա» Պարբերաթերթի 20ամեակը

0000GREECE

0000GREECE

Յունահայ իրականութեան մէջ իր տաքուկ անկիւնն ու հոգեհարազատ բեմը ստեղծած, յունարէնով լոյս տեսնող «Արմէնիքա» պարբերաթերթը տօնեց իր 20ամեակը:

Պարբերաթերթի 20 տարիներու անընդհատ հրատարակութիւնը հանդիսաւորապէս եւ մեծաթիւ գործակիցներու եւ համակիրներու ներկայութեան նշուեցաւ «Արմէնիքա»ի վարչութեան կազմակերպած յատուկ երեկոյին ընթացքին, որ տեղի ունեցաւ Շաբաթ, 27 Յունուարին, երեկոյեան ժամը 7:30ին, Քարէայի «Ազատամարտ» ակումբին մէջ:

Երեկոյին ներկայ էին «Արմէնիքա»ի քսանամեայ հրատարակութեան մէջ իրենց ներդրումը ունեցած 100է աւելի հայ եւ յոյն աշխատակիցներ:

Պարբերաթերթի խմբագրական կազմին կողմէ երեկոյի բացումը հայերէնով եւ յունարէնով կատարեց Յովհաննէս Ղազարեան:

«Արմէնիքա»ի 20 տարուան պատմութեան ընդհանուր ուրուագիծներուն ներկայացումը կատարելով՝ ան անդրադարձաւ նաեւ գիրքերու հրատարակութեանց, դասախօսական երեկոներու եւ լսարաններու կազմակերպումին, ինչպէս եւ կայքերու մատուցումին:

Յ. Ղազարեան նշեց, թէ ինչպէ՛ս կեանքի կոչուեցաւ պարբերաթերթը, որքանո՛վ անիկա արձագանգ գտաւ հայ եւ յոյն հասարակութեան մօտ եւ որքա՛ն նիւթական դժուարութիւններով կրցաւ գոյատեւել, զարգանալ ու բարելաւուիլ՝ պարունակութեան եւ տպագրական որակի տեսակէտէն:

Ներկայացման ընթացքին պաստառի վրայ կը ցուցադրուէին 20 տարի հրատարակուած «Արմէնիքա»ի թիւերուն կողքի էջերուն պատկերները ու զանազան առիթներով կազմակերպուած լսարաններէն նկարներ:

Խմբագրական կազմի անդամ Գուին Մինասեան ընթերցեց պարբերաթերթի արտօնատէր Գրիգոր Մխիկեանի (ներկայիս արտասահման ապրող) ողջոյնի խօսքը, որ ուղարկուած էր 20ամեակին առիթով:

Ան կը մաղթէր, որ «Արմէնիքա»ն երկար տարիներ գոյատեւէ՝ յաղթահարելով նիւթական դժուարութիւնները եւ խոստանալով, որ խմբագրական կազմին կողքին պիտի մնայ՝ տրամադրելով իր օժանդակութիւնը:

Գուին Մինասեան ընթերցեց նաեւ «Ակօս» պոլսահայ թերթի խմբագրութեան ողջոյնի խօսքը:

Հանդիսութեան ընթացքին բեմ հրաւիրուեցաւ «Արմէնիքա»ի տարիներու աշխատակիցներէն ազգագրագէտ Էլեֆթերիոս Ալեքսաքիս, որ հակիրճ ներկայացումը ըրաւ Հայաստանի եւ հայոց պատմութեան առնչուող իր հետազօտութեանց աշխատանքին եւ թերթին համար իր պատրաստած նիւթերուն վերաբերեալ:

«Արմէնիքա»ի մնայուն գործակիցներ՝ Ռիքարտօ Երկանեան եւ Սերգօ Աղապատեան, իրենց հերթին, խօսք ուղղեցին ներկաներուն՝ շնորհակալութիւն յայտնելով բոլոր անոնց, որոնք սատար կը հանդիսանան պարբերաթերթի գոյատեւման:

Յովհաննէս Ղազարեան իր շնորհակալութիւնը յայտնեց ՀԿ Խաչի Քարէա-Կեսարիանիի «Աղթամար» մասնաճիւղի վարչութեան, որ պատրաստած էր գաթան։

Յաջորդեց հիւրասիրութիւն. երեկոն վերջ գտաւ Լեֆթերիս Խավուծասի քանի մը երաժշտական կտորներու կիթառի վրայ մեկնաբանութեամբ:

 

(Թղթակից)

 

«ԱԶԱՏ ՕՐ»

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top