Աֆրինում Ապրող Վերջին Հայը

0000AFRIN

 

0000AFRIN

Թուրքալեզու Mezopotamyaa-jansi.com քրդական լրատուական գործակալութիւնն անդրադարձել է Աֆրինում մնացած վերջին հայի՝ Յարութ Գէորգի պատմութեանը, որը նաեւ Հայոց Ցեղասպանութիւնից մազապուրծ հայերի յետնորդներից է, հաղորդում է «Ակունք»ը:

Աղբիւրի համաձայն՝ արդէն 19 օր է, ինչ շարունակւում է Աֆրինի գործողութիւնը: Այստեղ մնացած միակ հայը՝ Յարութ Գէորգը, այս գործողութեան հետեւանքով վերստին յիշում է Մեծ Եղեռնը: 61 տարեկան Յարութ Գէորգի ընտանիքը Ցեղասպանութիւնից յետոյ տեղափոխուել է նախ Էզազ, ապա՝ Հալէպ: 50 տարի առաջ Աֆրին փոխադրուած Գէորգը մասնագիտութեամբ դարբին է: Նա 4 զաւակ ունի:

Յարութ Գէորգը գործակալութեան թղթակցի հետ զրոյցում մասնաւորապէս ասել է. «Ես Այնթափի հայերից եմ: 1915թ. ենք այնտեղից աքսորուել: Ցեղասպանութեան ժամանակ եկանք Հալէպ, աւելի ուշ տեղափոխուեցինք Աֆրին: Ինձ հետ բազմաթիւ հայ ընտանիքներ կային: Նրանց մեծ մասը զոհուեց, մի մասն էլ պատերազմի հետեւանքով արտագաղթեց: Աֆրինում միայն ես եմ մնացել: Այստեղ բնակուող միւս բոլոր ժողովուրդների հետ միասին տէր ենք կանգնում մեր քաղաքին: Թուրքիան 100 տարի է, ինչ շարունակում է իր յարձակումները: Ինչպէս որ այն ժամանակ է կանանց ու երեխաներին սպանում, հիմա էլ է նոյն բանն անում: Ցեղասպանութիւնը մի դար յետոյ վերստին գտաւ մեզ»:

Գէորգը Թուրքիայից պահանջելով վերջ տալ այդ յարձակումներին՝ նաեւ ընդգծել է, որ Աֆրինը միակ քաղաքն էր, որ պատերազմ չէր տեսել, եւ յաւելել է. «Այլեւս հերի՛ք է: Արիւն մի՛ հեղէք: Մարդկանց վրայ մի՛ յարձակուէք: Աֆրինը Սիրիայում պատերազմ չտեսած միակ վայրն էր: Ինչո՞ւ էք ձգտում աւիրել մարդկանց ապաստարանը դարձած այս քաղաքը»:

Հարցազրոյցի վերջում Գէորգը նաեւ մի քանի խօսք է ասել իր մայրենիով՝ հայերէնով, ապա նշել. «Մենք մեր հայրենի տնից-տեղից աքսորուեցինք Թուրքիայում: Եկանք այստեղ: Հիմա ջանում են մեզ այստեղից էլ հանել: Մենք պահանջում ենք, որ այս պատերազմն ու յարձակումները դադարեցուեն: Թող բոլորը անսան մեր ձայնը: Մեր կոչն ուղղուած է աշխարհի բոլոր ժողովուրդներին»:

 

Թարգմանեց՝

ՄԵԼԻՆԷ ԱՆՈՒՄԵԱՆ

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top