Կրօնական Ժողովը Ընդունեց Աթէշեանը Պատրիարքի Փոխանորդ Պահելու Թրքական Որոշումը

0210Atesh

0210AteshՊՈԼԻՍ, «Ժամանակ».- Պոլսոյ Հայոց պատրիարքի ընտրութեան տագնապին կապակցութեամբ Թուրքիոյ ներքին գործոց նախարար Սիւլէյման Սոյլուի հետ հայ համայնքի ներկայացուցիչներու հանդիպման լոյսին տակ, Փետրուար 9ին, պատրիարքարանին մէջ նիստ մը գումարուեցաւ՝ Կրօնական ժողովի ատենապետ Սահակ եպս. Մաշալեանի հրաւէրով։

Անցեալ տարի, նոյն մարմինին կողմէ պատրիարքի տեղապահ ընտրուած Գարեգին արք. Պէքճեանը, նախքան նիստը, Սահակ սրբազանին բանաւոր յայտնած էր, թէ պիտի չմասնակցի հաւաքին, որուն ընթացքին որոշուեցաւ տեղի տալ պետութեան պահանջներուն՝ պատրիարքական ընդհանուր փոխանորդ պահելով Արամ արք. Աթէշեանը, որովհետեւ՝ «Պատրիարքական ընտրութիւնը կը կատարուի եւ կը վերջանայ եկեղեցւոյ եւ պետութեան համակամ ընթացքով»:

«Պետութեան կամքը յայտնուած է այն շեշտադրութեամբ, թէ 85րդ պատրիարքը ընտրելու պայմանները գոյացած չեն տակաւին, հետեւաբար տեղապահի մը ընտրութիւնը անհիմն կը նկատուի: Ուստի, Մեսրոպ պատրիարք հայրը կարելի չէ հանգստեան կոչելով՝ աթոռը թափուր հռչակել, ըստ օրինաց», նշուած է ժողովի զեկոյցին մէջ, ուր նաեւ կ՛ըսուի. «Ժողովական հայրերը հարկաւոր նկատեցին ընդառաջել պաշտօնագիրի պարունակութեան, վասն բարւոք ընթացման՝ ապագայի մէջ ցանկալի պատրիարքական ընտրութեան համար: Ժողովական հայրերը շեշտեցին նաեւ ի պատեհ ժամանակի պատրիարքի ընտրութիւն կատարելու անհրաժեշտութիւնը»:

Զեկոյցը կ՛աւարտի հետեւեալ տողերով. «Մեր համայնքի զաւակները կը հրաւիրենք, որ համայնքային մեր խաղաղութիւնը գերադասեն ամէն տեսակի անձնական նկատառումներէ ու մտածումներէ, եւ հեռու կենան վիրաւորիչ, պառակտիչ եւ արդէն իսկ փխրուն վիճակի մէջ գտնուող համայնքային խաղաղութիւնը խանգարող նախաձեռնութիւններէ ու արտայայտութիւններէ»:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top