«Էֆ. 16» Օդանաւ Մը Կորսնցուցած Նեթանիահուն Կը Սպառնայ Շարունակել Սուրիոյ Մէջ Իր Գործողութիւնները

0213isra

0213isra

ԹԵԼ ԱՒԻՒ, «Ռոյթըրզ».- Իսրայէլի վարչապետ Պենիամին Նեթանիահու Կիրակի, Փետրուար 11ին, Իսրայէլի նախարարաց խորհուրդի նիստին ընթացքին յայտնեց, որ իր երկիրը «Իրանի եւ սուրիական վարչակարգին ծանր հարուածներ հասցուցած է»:

«Բոլորին յստակ դարձուցինք, որ մեր գործողութիւններուն կանոնները բացարձակապէս չեն փոխուած. պիտի շարունակենք հարուածել բոլոր անոնք, որոնք կը փորձեն մեզի դէմ յարձակում գործել: Այս էր եւ այս պիտի մնայ մեր քաղաքականութիւնը», ըսաւ ան:

Նեթանիահու յայտնեց նաեւ, որ Շաբաթ օր սուրիական հակաօդային համակարգերուն կողմէ վար առնուած իսրայէլեան «Էֆ. 16» ռազմական օդանաւուն երկու օդաչուներէն մէկը, օդանաւի ջախջախումէն առաջ դուրս ցատկած եւ վիրաւորուած է:

Իսրայէլի բնակեցման հարցերու նախարար Եուաֆ Կալնեթ իր կարգին յայտնեց. «Միջին Արեւելքի խնդիրին հիմը Իրանն է»՝ աւելցնելով, որ վերջինս ստեղծած է «շիիական եռանկիւն մը՝ Իրան-«Հըզպալլա»-Սուրիա»:

«Ոեւէ մէկը, որ հարցերը լաւ կը դիտէ, կը գիտնայ, որ մենք միայն չենք խօսիր, այլեւ կը գործենք», ըսաւ Կալնեթ՝ ընդգծելով. «Անօդաչու կամ օդաչուով որեւէ թռչող սարքի ներթափանցումը անպատասխան պիտի չմնա՛յ: Զայն ուղարկողը ինքզինք վտանգի կ՛ենթարկէ»:

Իսրայէլի կրթութեան նախարար Նեֆթալի Պենեթ, իր կարգին, «Ետիոթ Ահրոնո»չ թերթին հետ ունեցած հարցազրոյցի մը ընթացքին յայտնեց. «Մենք այժմ Սուրիոյ մէջ իրանեան կեդրոնացումին դէմ համապարփակ ճակատումի մէջ ենք»:

Նշենք, որ սուրիական հակաօդային համակարգերը Շաբաթ օր դէմ դրին Հոմսի մէջ սուրիական բանակի ռազմակայաններէն մէկուն դէմ իսրայէլեան երկու յարձակումներու: Ըստ «Մայատին» արբանեակային պատկերասփիւռի կայանի տեղեկութեանց՝ Սուրիոյ հարաւը տեղակայուած հակաօդային պաշտպանութեան ուժերը, «Սեմ 5» տիպի աւելի քան 10 հրթիռներ արձակած են իսրայէլեան «Էֆ. 16»ին վրայ, որուն վար առնուելէն ետք՝ իսրայէլեան օդանաւերը չեն համարձակած մուտք գործել սուրիական օդային տարածք։ Աւելի ուշ, Սուրիոյ վրայ իսրայէլեան հրթիռներ արձակուած են Միջերկրական ծովէն:

Իսրայէլ կը պնդէ, թէ Սուրիոյ մէջ այս գործողութեան դիմած է՝ հակադարձելով Իսրայէլի սահմանը խախտած սուրիական անօդաչու թռչող սարքի մը, պնդում մը, որ հերքուեցաւ Դամասկոսի կողմէ, որ իր կարգին շեշտեց, թէ նշեալ սարքը «Իսլամական պետութիւն» ահաբեկչական կազմակերպութեան զինեալներուն դէմ գործողութեան մը կը մասնակցէր։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top