Միջին Արեւելքի Մէջ Գլխաւոր Դերակատարը Ամերիկան Չէ՛, Այլ՝ Ռուսիան. Իսրայէլի Փոխվարչապետ

0214Oren

0214Oren

ԹԵԼ ԱՒԻՒ.- Իսրայէլի դիւանագիտական հարցերով փոխվարչապետ Միքայէլ Օրեն ամերիկեան «Պլումպըրկ» լրատու գործակալութեան հետ հարցազրոյցի մը ընթացքին յայտարարեց. «Ներկայիս, Միջին Արեւելքի մէջ գլխաւոր դերակատարը Ամերիկան չէ, այլ Ռուսիան, որ Իսրայէլի, Սուրիոյ եւ Իրանի միջեւ շրջանի կացութեան քարտերը ունի իր ձեռքը»:

«Ներկայ հաւասարակշռութեան մէջ, ամերիկեան կողմը մեզի աջակցութիւն տրամադրող կողմն է, սակայն ներկայիս Միացեալ Նահանգները Սուրիոյ մէջ գրեթէ որեւէ ազդեցութիւն չունի եւ խաղէն դուրս է, որովհետեւ որեւէ ներդրում չկատարեց», ըսաւ Օրեն՝ աւելցնելով. «Ռուսիա՛ն է, որ կրնայ սահմանին վրայ յառաջացած ճակատումը դադրեցնել։ Նախատեսութիւններու համաձայն՝ Ռուսիան պիտի կասեցնէ ճակատումը, որովհետեւ վստահ չեմ, որ ոեւէ մէկը ներկայիս շահագրգռուած է պատերազմի ծագումով»:

Օրեն նաեւ յայտնեց, որ Ռուսիա կրնայ ուժեղ ճնշում բանեցնել Սուրիոյ եւ Իրանի վրայ եւ՝ զանոնք նեղի մատնել: «Կը կարծենք, որ Մոսկուա այդպիսի առիթներ ունի. տեսնենք՝ ի՛նչ պիտի ընէ», պնդեց ան:

Նշենք, որ Իսրայէլի բնակեցման նախարար Եոաֆ Կալանթ իսրայէլեան ձայնասփիւռի կայանին հետ հարցազրոյցի մը ընթացքին յայտարարած էր. «Պէտք է կազմաքանդել Իրան-Սուրիա-«Հըզպալլա» չարիքի եռանկիւնը»՝ հակադարձելով իսրայէլեան «Էֆ. 16» ռազմական օդանաւի զգետնումին:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top