Զայրացած Էրտողան «Օսմանեան Ապտակի Ուժգնութեամբ» Կը Սպառնայ Թուրքիոյ Սպառնացողներուն

1223Erdogan

1223Erdogan

ԵՐԵՒԱՆ, «Ազատութիւն».- «Եթէ Միացեալ Նահանգներու իշխանութիւնները շարունակեն օժանդակութիւն ցուցաբերել սուրիացի քիւրտերուն, ապա այդ մէկը անխուսափելիօրէն պիտի ազդէ Թուրքիոյ քաղաքական քայլերուն վրայ», Փետրուար 13ին Անգարայի մէջ յայտարարեց Թուրքիոյ նախագահ Ռեչեփ Թայիփ Էրտողան, իշխող Արդարութիւն եւ բարգաւաճում կուսակցութեան խորհրդարանական խմբակցութեան անդամներուն հետ հանդիպման ընթացքին։

Սուրիոյ քիւրտերուն տրամադրուող ամերիկեան օժանդակութեան գծով Թուրքիոյ համբերութիւնը յորդելու աստիճանին հասած կը թուի ըլլալ, յատկապէս որովհետեւ Փետրուար 12ին հաղորդուեցաւ, թէ Փենթակոնը հարիւարաւոր միլիոն տոլարի նոր յատկացում մը նախատեսած է 2019ի ամավարկին մէջ՝ քիւրտերը մարզելու եւ սպառազինութիւն տրամադրելու համար: Տարբեր աղբիւրներ օժանդակութեան արժէքը կը գնահատեն 300էն 550 միլիոն տոլարի միջեւ։

Անգարա կը պնդէ, թէ Սուրիոյ քիւրտ զինեալները Թուրքիոյ մէջ ահաբեկչական նկատուող Քիւրտիստանի բանուորական կուսակցութեան մէկ մասնաճիւղի անդամներն են։

«Մեր ռազմավարական դաշնակիցին այս որոշումը՝ նիւթական օժանդակութիւն ցուցաբերել քրտական Ժողովրդավարական միութիւն կուսակցութեան ու Ժողովուրդի պաշտպանութեան ջոկատներուն, անխուսափելիօրէն պիտի ազդէ մեր ապագայ որոշումներուն վրայ։ Անոնք, որոնք կը կանգնին Քիւրտիստանի բանուորական կուսակցութեան համակիր զինեալներուն կողքին, իսկ ապա կը յայտարարեն, թէ որեւէ նշոյլ չկայ, որ անոնք այդ կառոյցի անդամներ են՝ կա՛մ մոլորութեան մէջ են, կա՛մ կոյր են, կա՛մ ալ՝ յիմար: Ես շատ յստակօրէն կրնամ ըսել, որ անոնք, որոնք կը պնդեն, թէ մեր հարուածներուն ի պատասխան կրնան բիրտ հակահարուածներու դիմել, երբեք չեն զգացած օսմանեան ապտակին ուժգնութիւնը», ըսաւ Էրտողան՝ հակադարձելով Սուրիոյ մէջ ամերիկեան ուժերու հրամանատար զօր. Փօլ Ֆանքի անցեալ շաբաթ կատարած ազդարարութեան։

Յիշեցնենք, որ Անգարա կը սպառնայ Աֆրինէն ետք յարձակիլ նաեւ հիւսիսային Սուրիոյ Մընպեճ քաղաքին վրայ, որ քիւրտերու հակակշիռին տակ կը գտնուի այժմ եւ ուր հաստատուած են նաեւ ամերիկացի զինուորներ։ Ֆանք Փետրուար 7ին Մընպեճ այցելած էր՝ հակադարձելով ամերիկեան ուժերը այնտեղէն հեռացնելու թրքական կոչերուն։ Ակնարկելով թրքական սպառնալիքին՝ Մընպեճի մէջ Ֆանք յայտարարած էր. «Եթէ անոնք յարձակին՝ մենք ցնցի՛չ հակահարուած պիտի տանք»։

Իր կարգին, Թուրքիոյ արտաքին գործոց նախարար Մեւլուտ Չաւուշօղլու, Միացեալ Նահանգներու արտաքին գործոց նախարար Ռեքս Թիլըրսընի Թուրքիա այցելութեան նախօրեակին յայտարարած է, որ Միացեալ Նահանգներու հետ յարաբերութիւնները պէտք է կարգաւորուին, այլապէս ամբողջութեամբ պիտի վատթարանան:

Թրքական «Հիւրրիյէ»չ օրաթերթը կը գրէ, թէ նախարարը ընդգծած է, որ իրենք շատ յստակ ու պարզ ակնկալիքներ ունին Միացեալ Նահանգներէն: «Մեզի խոստումներ անհրաժեշտ չեն, մենք յստա՛կ քայլեր կ՛ուզենք: Անհրաժեշտ է վերականգնել խարխլած վստահութիւնը, որպէսզի կարելի ըլլայ խօսիլ որոշ նիւթերու մասին», ըսած է Չաւուշօղլու: Ան նշած է, որ Միացեալ Նահանգներու կողմէ լուրջ սխալներ գործուած են: «Միացեալ Նահանգները չի յարգեր մեզի տուած իր խոստումները: Բնական է, որ թէ՛ մեր ժողովուրդը, թէ՛ մենք՝ ղեկավարներս, կորսնցուցած ենք հաւատքը այդ երկրին հանդէպ», ըսած է Չաւուշօղլու:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top