Պաշտօնազրկուած Պատրիարքական Տեղապահ Գարեգին Արք. Պէքճեան Կը Հեռանայ Պոլիսէն

0214bekjian

 

0214bekjian

ՊՈԼԻՍ.- Գարեգին արք. Պէքճեան, զոր թրքական իշխանութիւնները պաշտօնապէս հրաժարեցան ճանչնալէ իբրեւ Պոլսոյ Հայոց պատրիարքական տեղապահ, նախքան Թուրքիայէն հեռանալը հրապարակեց հրաժեշտի նամակ մը: Այս մասին կը յայտնէ «Ակօս» թերթը:

Նամակին մէջ, Պէքճեան կը յիշեցնէ, որ 25 Հոկտեմբեր 2016ին, նկատի ունենալով Մեսրոպ պատրիարք Մութաֆեանի առողջական վիճակը՝ Հոգեւոր խորհուրդը որոշեց պատրիարքական աթոռը «թափուր» յայտարարել, եւ այսպիսով Պոլսոյ Հայոց 85րդ պատրիարքի ընտրութեան հարցը դարձեալ յայտնուեցաւ օրակարգի վրայ: Ան կը պատմէ, որ պատրիարքական փոխանորդ Արամ արք. Աթէշեանի հրաւէրով՝ պատրիարքական տեղապահի ընտրութիւններուն մասնակցելու նպատակով, ան ժամանեց Պոլիս, ուր 15 Մարտ 2017ին, 23 կողմ եւ 11 դէմ ձայնով տեղապահ ընտրուեցաւ:

«Աւելի քան 50 տարի արտերկրի մէջ ծառայութենէ ետք, Թուրքիա գալուս պատճառը ինը տարի շարունակուող անցումային շրջանին վերջ տալն էր: Կը կարծէի, որ այս հարցով բաւական պիտի ըլլար շարժիլ հաւատքով եւ խիղճով, որպէսզի մեր եկեղեցին ու ժողովուրդը պատրիարքի ընտրութեան համար յաջողութեան հասնէր: Միայն հիմա կը հասկնամ, թէ որքան սխալած եմ», նամակին մէջ կը գրէ Պէքճեան սրբազանը:

Ան կը պատմէ, որ պաշտօնը ստանձնելէն անմիջապէս ետք, առերեսուեցաւ ապշեցնող իրականութեան հետ: «Ատոնցմէ ամենակարեւորը այն էր, որ արդէն առաջին իսկ օրուընէ պարզ դարձաւ, որ ընտրական գործընթացը կարելի պիտի չըլլայ յառաջ տանիլ թափանցիկ՝ արդար ընտրական կանոններով: Անհրաժեշտ չեմ համարեր թուարկել բոլոր օրինակները: Այդ ցաւալի եւ վշտացնող օրինակները ո՛չ կը փափաքիմ յիշել, ոչ ալ յիշեցնել», կը գրէ սրբազանը:

Իբրեւ այլ տխրեցնող փաստ մը, որուն ան դէմ յանդիման գտնուած է, Պէքչեան կը յայտնէ, որ զգալիօրէն նուազած են համայնքին մէջ այն հոգեւորականներն ու աշխարհիկ անձերը, որոնք մեծ կամքի տէր են, շատ լաւ գիտեն մեր պատմութեան ու համայնքին արժէքները:

«Վերջին իրադարձութիւնները մէկ օրուան հետեւանք չեն: Ափսոս, որ այս գործընթացը, որ կարծես զիս թիրախ ընտրած էր, իրականութեան մէջ նպատակ ունէր խափանելու 85րդ պատրիարքի ընտրութիւնները: Ասիկա երկարատեւ եւ ծրագրուած արշաւի արդիւնք էր, որ սկսաւ տեղապահ ընտրուելուս առաջին իսկ օրէն: Կրկին գործի դրուեցան տխրեցնող, ցաւցնող հնարքներ: Այս մութ արշաւները շատ տգեղ չափերու հասան: Կը վախնամ, որ այս բոլորը աւելի պիտի մասնատէ մեր համայնքը», կը գրէ Պէքճեան սրբազանը:

Միւս կողմէ, ան կը յատնէ, թէ յոյս ունի, որ կատարուածը համայնքին համար ուսանելի կ՛ըլլայ:

Գարեգին արք. Պէքճեան կը նշէ, որ մասնաւորապէս Թուրքիոյ ներքին գործոց նախարարութենէն եկած գրութենէն ետք ստիպուած եղած է հեռանալու Պոլիսէն՝ ընդգծելով, որ էութեամբ հակամարտող մարդ չէ:

«Մեր կրօնը խոնարհութիւն եւ համբերութիւն քարոզելէ բացի, սիրոյ եւ խաղաղութեան կրօն է: Իմ ներկայութիւնը պէտք չէ որեւէ կերպով առաւել վնաս արէն իսկմեծ վնասներ կրած հայ համայնքին», նամակին կը բացատրէ սրբազանը՝ ընդգծելով, որ ղեկավարներն ու համայնքը պէտք է կարենան ապագային առնչուող քայլերը առնել առանց իրեն:

«Որոշեցի հեռանալ երկրէն՝ գալիք շրջանին նոր ծառայութեան անցնելու նպատակով, աղօթելով երկար ժամանակ հիւանդութեան մէջ գտնուող Մեսրոպ արք. Մութաֆեան եղբօրս, անոր թանկագին մօր՝ Մարի Մութաֆեանին եւ ձեր՝ իմ սիրելի հոգեւոր եղբայրներուս համար», կ՛եզրակացնէ է Գարեգին արք. Պէքճեան:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top