Արցախեան Շարժման 30ամեակին Նուիրուած Տօնական Հանրահաւաք

0214artsakhcelebration7

ՍՏԵՓԱՆԱԿԵՐՏ.- Երեքշաբթի, 13 Փետրուարին, Ստեփանակերտի մէջ տեղի ունեցան Արցախեան շարժման 30ամեակին նուիրուած տօնական երթ եւ հանրահաւաք:

Ըստ «Արցախփրէս»ի՝ երթի մասնակիցները պաստառներով, դրօշներով, կոչերով՝ «միացում» վանկարկելով մայրաքաղաքի կեդրոնական փողոցներէն շարժեցան դէպի Ստեփանակերտի Վերածնունդի հրապարակ, ուր տեղի ունեցաւ Ղարաբաղեան շարժման 30ամեակին նուիրուած տօնական ձեռնարկը:

Հանրահաւաքին օրհնութեան խօսք յղեց Արցախի թեմի առաջնորդ Պարգեւ արք. Մարտիրոսեան:

Ձեռնարկի ընթացքին ցուցադրուեցան Ղարաբաղեան շարժման մասին պատմող վաւերագրական ֆիլմեր:

Հանրահաւաքին, շնորհաւորական ելոյթով հանդէս եկաւ Արցախի Հանրապետութեան նախագահ Բակօ Սահակեան, որ ըսաւ, թէ 1988 թուականը բեկումնային եղաւ հայ ժողովուրդի պատմութեան մէջ: «Երեք տասնամեակ առաջ, այս օրերուն, համայն հայութիւնը համախմբուեցաւ, դարձաւ մէկ բռունցք՝ ամբողջ աշխարհին ազդարարելով սեփական բնօրրանին մէջ ազատ ու անվտանգ ապրելու համար մաքառելու իր պատրաստակամութեան մասին: Համաժողովրդային այս պոռթկումը մարտահրաւէր էր բռնատիրութեան, հալածանքներու, մարդու իրաւունքներու խախտումներու, բոլոր այն արհաւիրքներուն, որոնց մէջէն անցած է մեր ժողովուրդը իր բազմադարեայ պատմութեան ընթացքին: Եւ այս շարժման պսակը դարձաւ հայոց անկախ պետականութեան վերականգնումը: Այս գոյապայքարին մէջ, դժբախտաբար, մենք ունեցանք նաեւ անդառնալի կորուստներ: Հայրենիքի պաշտպանութեան սուրբ գործին իրենց կեանքը նուիրաբերեցին մեր ժողովուրդի լաւագոյն զաւակները: Անոնք զոհ չեն, անոնք մարտիրոսուած հերոսներ են, որոնք անմահացան եւ կը շարունակեն իրականացնել հայրենիքի պաշտպանի իրենց սուրբ առաքելութիւնը՝ ոգեշնչելով եւ պարտաւորեցնելով անմնացորդ ծառայելու հայրենիքին, աշխատելու ի փառս անոր զարգացման ու զօրացման: Այս բոլոր տարիներուն ընթացքին մենք միշտ զգացած ենք Մայր Հայաստանի յատուկ հոգատարութիւնը Արցախի նկատմամբ: Անհնար է պատկերացնել մեր ձեռքբերումներն ու յաղթանակները առանց Հայաստանի գործօն եւ անմիջական մասնակցութեան: Այսօր ալ միասին կը լուծենք մեծ ու պատասխանատու հարցեր: Բոլորս հաստատակամ ենք եւ պիտի կատարենք ամէն ինչ, որպէսզի ապագան ըլլայ յուսալի, մեր հայրենիքը՝ աւելի հզօր ու բարեկեցիկ: Հակառակորդը միշտ պէտք է գիտնայ, որ մեզի հետ ուժի լեզուով խօսիլը դատապարտուած է ձախողութեան: Մեր ժողովուրդը, մեր բանակը եւ ամբողջ հայութիւնը որեւէ պահու արժանի հակահարուած պիտի տայ մեր ազատութեան ու անվտանգութեան սպառնացող իւրաքանչիւր ոտնձգութեան», յայտնեց նախագահը:

0214artsakhcelebration7

Ղարաբաղեան շարժման առաջամարտիկներէն Համլետ Գրիգորեան, իր ելոյթին մէջ նշեց, որ Ղարաբաղեան շարժման 30ամեակը համահայկական փառապանծ տօն է: «Վերյիշենք անոնց, որոնք 20րդ դարուն հայկական հիմնահարցը անթեղուած չձգեցին եւ քայլ առ քայլ մօտեցուցին մեր հինաւուրց երկրամասի անկախութեան: Ճիշտ է, որ մեր հանրապետութիւնը դեռ ճանչցուած չէ, սակայն միջազգային ո՛չ մէկ ատեանի մէջ, առայսօր, չեն կասկածիր մեր հանրապետութեան օրինականութեան: Մենք՝ Արցախեան ազատամարտի տարեց վկաներս, կը հպարտանանք 1980-90ական թուականներու սերունդով եւ կը յորդորենք երիտասարդները, որ մեր յաջողութիւններուն կրկնապատկողը ըլլան, որովհետեւ երկար ճանապարհ ունինք կտրելիք՝ Արցախը Մայր Հայաստանին վերամիաւորելու սուրբ գործին մէջ եւ իրականացնելու 30 տարի առաջ հայ ժողովուրդի սիրտէն ծնած՝ «մէկ ազգ, մէկ հայրենիք ու մէկ պետութիւն» կարգախօսը», ըսաւ Հ. Գրիգորեան:

Ղարաբաղեան շարժման գործիչ եւ Արցախի հերոս Ժաննա Գալստեան, վերյիշելով 1988ի հանրահաւաքը՝ ըսաւ. «Այդ օրերուն մենք ճնշուած էինք: 1988ին մեզմէ իւրաքանչիւրը հրապարակ ելաւ պարզ նպատակով մը՝ շրջելու հայոց պատմութեան վերջին 100ամեակի շեղած անիւը: Դուրս եկաւ՝ գիտակցելով, որ ինք հզօր կայսրութեան պատժիչ մեքենայի անիւներուն տակ կրնար մնալ: Իսկ այսօր, բարեբախտաբար, մեզ կը պաշտպանէ հայոց հզօր բանակը: Այսօր մենք հաւաքուած ենք այստեղ ո՛չ միայն յարգանքի տուրք մատուցելու Ղարաբաղեան շարժման առաջամարտիկներուն, այլ նաեւ ազդարարելու պայքարի նոր փուլ, որ կը կոչուի զարգացման փուլ: 30 տարի ետք, մենք պէտք է 1988ի դասերը քաղենք, իսկ մեր ամենամեծ դասը Հայաստան-Արցախ-Սփիւռք եռամիասնութիւնն է, իսկ երկրորդ դասը՝ հետեւողական ըլլալը եւ երրորդը՝ մեր յոյսերը մի՛այն մեր վրայ դնելը, այն ատեն միայն յաղթանակները անխուսափելի պիտի ըլլան: Մենք կը տեսնենք, որ մեր թշնամին ոչ մէկ ձեւով կը փոխէ իր գործելակերպը. անոր ձեռագիրը նոյնը մնացած է մինչեւ այսօր: Կեցցէ՛ հայ ժողուուրդը, հայոց բանակը եւ այն ժողովուրդը, որ պիտի ապրի ազատ, անկախ եւ միացեալ Հայաստանի մէջ»:

Ձեռնարկին ընթացքին, տեսակապի միջոցով, իրենց շնորհաւորական ուղերձները յղեցին նաեւ Հայաստանի, Ռուսիոյ, Ֆրանսայի, Մեծն Բրիտանիոյ, Միացեալ Նահանգներու, Եւրոպական խորհրդարանի քաղաքական ուժերու ներկայացուցիչներ ու մշակութային յայտնի գործիչներ:

Աւարտին հնչեցին ազգային երգեր, պարեղանակներ՝ Վերածնունդի հրապարակը վերածելով ազգային մեծ տօնախմբութեան հարթակի:

Հանրահաւաքին ներկայ էին Արցախի երկրորդ նախագահ Արկադի Ղուկասեան, Արցախի Ազգային ժողովի նախագահ Աշոտ Ղուլեան, պետական նախարար Արայիկ Յարութիւնեան, պատգամաւորներ, Արցախեան շարժման առաջամարտիկներ եւ անոնց գործը այսօր շարունակող երիտասարդներ եւ հիւրեր:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top