ՀԲԸՄի Վաչէ Եւ Թամար Մանուկեան Երկրորդական Վարժարանը Վարդանանց Տօնը Նշեց «Արարատ Տան» Մէջ

0223vartanank2

 

0223vartanank2

Սրբոց Վարդանանց Զօրավարաց տօնին առիթով, Երեքշաբթի, 6 Փետրուար 2018ին, Միշըն Հիլզի «Արարատ Տան» «Ճորճ Տէօքմէճեան» հանդիսասրահէն ներս տեղի ունեցաւ սիրոյ սեղան՝ կազմակերպութեամբ «Արարատ Տան» տիկնանց միութեան, ներկայութեամբ Արեւմտեան թեմի ողջ կրօնաւորաց դասին եւ բարեկամներու հոծ բազմութեան:

Գեղարուեստական յայտագիրով հանդէս եկան ՀԲԸՄի Վաչէ եւ Թամար Մանուկեան վարժարանի պարի եւ երգչախումբի աշակերտ-աշակերտուհիները, որոնք իրենց բծախնդիր պատրաստուածութեամբ ու ներկայացումով հմայեցին ներկաները՝ անոնց առթելով հպարտութեան յուզմունք եւ հոգեկան բաւարարութիւն:

0223vartanank1

Բացման խօսքը արտասանեց վարժարանիս հոգաբարձութեան հիմնադիր անդամ եւ կրթական յանձնախումբի ատենապետուհի դոկտ. Սիլվա Գարայեան: Ան շեշտեց, որ ՀԲԸՄի Վաչէ եւ Թամար Մանուկեան վարժարանը իսկակա՛ն հայկական վարժարան է իր նկարագիրով եւ էութեամբ: Այս վարժարանին նպատակն է աշակերտներուն հայեցի դաստիարակութիւն ջամբել եւ իրենց մէջ ազգային նկարագիրը զօրացնել: «Աշակերտներուն այսօրուան ներկայացնելիքը լաւագոյն վկան է սոյն հաստատումին», եզրակացուց Գարայեան, ապա բեմ հրաւիրեց վարժարանիս Հայկական բաժանմունքի վարիչ Լորա Գույումճեանը, որպէսզի վարէ օրուան հանդիսութիւնը:

Լորա Գույումճեան իր կարգին վեր առաւ վարժարանիս տարած հայկական առաքելութիւնը՝ յատկապէս շեշտելով կատարողական արուեստին հանդէպ անոր ցուցաբերած բծախնդրութիւնն ու նուիրումը։

Աշակերտական գեղարուեստական յայտագիրը սկսաւ «Վարդանի ճառ»ով, զոր ընթերցեց աշակերտ Ալեքս Աւաննէսեան: Ապա երգչախումբը հանդէս եկաւ «Պլպուլն Աւարայրի» եւ «Իմ Հայրենեաց հոգի Վարդան» երգերով. իսկ պարախումբը ներկայացուց «Տաւիղ» եւ «Զարթօնք» պարերը: Յաջորդաբար, Վահան Թէքէեանի «Խորհուրդ Վարդանանց»ը արտասանեց Քրիս Նազարեան, երգչախումբը երգեց «Վարդանի երգ»ը եւ «Մենք քաջ Վարդանի տոհմէն ենք» յաղթերգը, Արամ Խաչատրեանի «Մասքարատ»ը դաշնամուրի վրայ նուագեց Էտկար Էքշեան։ Յունական պարով հանդէս եկան պարախումբի աշակերտները, որմէ ետք բոլոր աշակերտները միատեղ երգեցին «Ղարաբաղ իմ» երգը եւ Ազգային օրհներգը։

Կազմակերպիչ յանձնախումբին անունով գնահատանքի ու շնորհակալութեան խօսք արտասանեց յանձնախումբի ատենապետուհի Ալիս Գաւաճեան, որ բոլոր ներկաներուն սրտի թարգմանը ըլլալով՝ շնորհակալութիւն յայտնեց ՀԲԸՄի Վաչէ եւ Թամար Մանուկեան վարժարանի տնօրէնութեան, երգի ու պարի ուսուցիչներուն՝ Պարթեւ Կիւլիւմեանին, Էլմիրա Սիմոնեանին եւ Թագուհի Պէզաթեանին, նաեւ յատկապէս՝ աշակերտներուն, իրենց սքանչելի կատարումին համար:

Հաւաքական լուսապատկեր առնելէ ետք, աշակերտները հոգեթով զգացումներով լեցուած՝ վերադարձան վարժարան:

 

(Թղթակցութիւնը՝

Վարժարանէն)

0223vartanank

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top