«ԱԶԱՏՈՒԹԻՒՆ» ԿԱՅԱՆԻ ՀԱՐՑԱԶՐՈՅՑԸ ՆԱԽԱԳԱՀԻ ԹԵԿՆԱԾՈՒ ԱՌԱՋԱՐԿՈՒԱԾ ԱՐՄԷՆ ՍԱՐԳՍԵԱՆԻ ՀԵՏ

0223armensarkissian

0223armensarkissian

«Շատ Լաւ Տեղեակ Եմ, Թէ Ինչ Է Կատարւում Հայաստանում»

 

Հայաստանի Հանրապետական կուսակցութեան կողմէ Հայաստանի նախագահի թեկնածու առաջադրուած թեկնածու Արմէն Սարգսեան բացառիկ հարցազրոյց մը ունեցած է «Ազատութիւն» կայանի Հայաստանի բաժինի տնօրէն Հրայր Թամրազեանի հետ: Ստորեւ՝ սոյն հարցազրոյցը.

 

«ԱԶԱՏՈՒԹԻՒՆ».- Բոլորին հանդիպեցիք՝ քաղհասարակութիւն, կուսակցութիւններ: Կախուա՞ծ էր ձեր պատասխանը նաեւ այս հանդիպումներից: Ի՞նչը ձեզ համոզէք, որ դուք ընդունէք այդ առաջարկը:

ԱՐՄԷՆ ՍԱՐԳՍԵԱՆ.- Նախ, իհարկէ, բոլորի հետ չհանդիպեցի: Ծրագրում եմ շարունակել իմ հանդիպումները: Եւ, ճիշդն ասած, մինչ խորհրդարանում Հանրապետութեան նախագահի ընտրութեան օրը, քանի որ թիւը շատ մեծ է, յոյս ունեմ, դրանից յետոյ շարունակեմ: Ճիշդն ասած, այս պահին հետաքրքրութիւնը իմ մէջ այնքան մեծ է, որ եթէ նոյնիսկ չընտրուեմ, կ՛ուզենամ աւելի խորը հասկանամ, թէ ինչ է կատարւում երկրում, որտեղ ենք մենք եւ ուր ենք գնալու: Կա՞ր արդեօք մէկ բան, որ ինձ դրդեց ասել «այո»: Գործօնները շատ են. սկսած մեծ պատասխանատուութիւնից, որ իմ առջեւ դրուեց, որին «ոչ» ասելը ինչ-որ իմաստով դասալքութեան նման կեցուածք կը լինէր: Երկրորդը, շատ լաւ տեղեակ եմ, թէ ինչ է կատարւում Հայաստանում: Սակայն, երբ դու Հանրապետութեան նախագահի թեկնածու ես, եւ մարդկանց ես հանդիպում, լինի քաղաքական (գործչին) կամ պարզ գիւղացուն կամ արդիւնաբերողին, Արցախում լինի, Գիւմրիում, լրիւ ուրիշ մօտեցում կայ ե՛ւ քո մէջ, ե՛ւ այն մարդկանց, որոնց հանդիպում ես: Աւելի բաց ցանկութեամբ շփւում են հետդ եւ իրենց սպասելիքն են քեզ ասում: Իհարկէ, սպասելիքների ասպեկտը (երեւոյթը-Խմբ.) շատ անսպասելիօրէն կամ սպասելի, շատ մեծ է: Շատերը կարծում են, որ Հանրապետութեան յաջորդ նախագահը՝ չորրորդ նախագահը լիազօրութիւններ չի ունենալու, հետեւաբար նրանից սպասելիքներ պէտք չի ունենալ: Եւ կայ միւս ծայրայեղութիւնը, որ,  Հանրապետութեան նախագահը ամէն ինչ կարող է: Իրականութիւնը ինչ-որ տեղ երկուսի մէջտեղում է: Եթէ առանձնացնելու լինեմ մէկ պատասխան, ես կարծում եմ, մեր նոր Սահմանադրութեամբ, քանի որ Հանրապետութեան նախագահը շատ վարչական լծակներ չունի, սակայն ունի իրեն տրուած շատ մեծ պարտականութիւններ եւ լիազօրութիւններ՝ Սահմանադրութեան մէջ ձեւակերպուած, նախ եւ առաջ մեծ խնդիր է, թէ ինչպիսի էութիւն կը լցուի այդ շրջանակի ներսում: Հետեւաբար մեծ խնդիր է դրւում չորրորդ նախագահի վրայ՝ ինչ-որ ձեւով ձեւաւորել նոր նախագահի կերպարը, նրա լիազօրութիւնները, նրա ներկայութիւնը: Եւ նաեւ՝ ինչ-որ ձեւով մշակոյթ ստեղծել նոր, խորհրդարանական նախագահի:

 

«ԱԶԱՏՈՒԹԻՒՆ».- Ձեր կարծիքով, Հայաստանում քաղբանտարկեալ կա՞յ: Մարդ, որը իր քաղաքական ակտիւութեան համար կարող է յայտնուել բանտում, ինչպէ՞ս էք վերաբերւում այս ամէնին:

ԱՐՄԷՆ ՍԱՐԳՍԵԱՆ.- Քաղբանտարկեալ որեւէ երկրում լինելու խնդիրը ինձ համար անընդունելի է: Ինձ համար կրկնակի կամ եռակի անընդունելի է՝ եթէ խօսքը վերաբերում է մեր երկրին: Ես վերջերս շատ ինտենսիւ (բուռն կերպով, խտացեալ-Խմբ.) կարդում եմ երեւոյթի մասին, եւ իհարկէ, ինձ աջակցում են այդ իմաստով նաեւ յօդուածները, որ ստացել եմ զանազան կազմակերպութիւններից՝ մարդու իրաւունքների հետ կապուած, հասարակական կազմակերպութիւններից: Քաղբանտարկեալը դա անհատ է, որը կարելի է բաժանել երկու մասի: Այն անհատին, որ իր խղճի, որ խիղճ ասելով հասկանում են ե՛ւ քաղաքական համոզմունքներ, ե՛ւ կրօնական կամ ազգային այլ սկզբունքներ, որի համար ինքը պատժւում է: Իհարկէ, յաճախ քաղբանտարկեալ են անուանում նաեւ անհատների, որոնք, ելնելով ինչ-որ սկզբունքներից, անհամաչափ ուժ են կիրառում ինչ-որ նպատակի համար: Առաջին դէպքում ինձ համար ընդունելի չի այդ խումբը մարդկային, որ իրենց «խղճի բանտարկեալներն են»: Իհարկէ, խնդիրը պարզ չէ, որովհետեւ եթէ այսօր հարցում անէք, որեւէ միջազգային կազմակերպութիւն, դեռեւս ես չեմ տեսել, որ յայտարարի, որմ այո, Հայաստանում այսինչ անհատը քաղբանտարկեալ է: Եթէ հանրութեան մէջ, քաղաքացիական հասարակութեան մէջ կամ զանազան կազմակերպութիւնների մէջ, որոնք զբաղւում են մարդու իրաւունքներով, հարցնէք, ապա նրանք ձեզ ինչ-որ ցանկ կը տան: Իհարկէ, իւրաքանչիւր դէպքում պէտք է առանձին, առանձնակի քննարկում լինի, ոչ թէ սկզբունքային, որովհետեւ իւրաքանչիւր դէպքը առանձին դէպք է: Հանրապետութեան նախագահը պէտք է այս հարցին շատ լուրջ ուշադրութիւն դարձնի՝ նպատակ ունենալով բացառել Հանրապետութիւնում քաղբանտարկեալների երեւոյթը: Այս հարցը լուծելու համար, շատ յստակ է, որ ե՛ւ քննչական, ե՛ւ դատական մարմինները պէտք է համապատասխան բարձր որակ ունենան եւ լինեն իրենց բարձրութեան վրայ:

 

«ԱԶԱՏՈՒԹԻՒՆ».- Վստահ եմ, արդէն ծանօթ էք, որ Երեւանի աւագանիում այդպիսի բախում տեղի ունեցաւ՝ ծեծի ենթարկուեցին «Երկիր Ծիրանի»ի անդամները, կանայք: Ի՞նչ կարող էք ասել այս մասին: Որ խօսում էիք Հայասստանի իմիջի (պատկերի-Խմբ.) մասին, վստահ եմ, որ սա չի նպաստել այդ իմիջին:

ԱՐՄԷՆ ՍԱՐԳՍԵԱՆ.- Ցաւօք սրտի, սա երեւի միակ բացասական երեւոյթը չէ, որ վնասում է մեր պետութեան եւ ազգային իմիջին: Ես կարծում եմ, այդ հարցին արդէն պատասխանեցի՝ ինձ համար որեւէ բռնութիւն անընդունելի է: Ինձ համար անընդունելի է մանաւանդ քաղաքացիական կամ քաղաքական շրջանակներում երկխօսութեան բացակայութիւնը, երբ որ երկխօսութիւնը փոխարինւում է ինչ-որ ուժային գործողութիւններով: Եւ իհարկէ երրորդը, շատ ցաւալի է, որ էդ ամբողջ երեւոյթի մէջ ներգրաւուած են, ինչպէս դուք բաժանեցիք, տղամարդիկ եւ կանայք: Դա պարզ գոյատեւման էթիկայի (բարոյագիտութեան-Խմբ.) պակաս է: Հետեւաբար, ես որեւէ ձեւով չեմ կարող արդարացնել նմանատիպ երեւոյթները: Սրանք նոյնպէս ուժի կիրառման ձեւեր են: Եւ կոչ եմ անում բոլորին՝ նորմալ, ցիւիլ (քաղաքկիրթ-Խմբ.), քաղաքացիական ձեւով սկսել երկխօսութիւնը: Եւ կոչը բոլորին է ուղղուած. ե՛ւ այն անհատներին, որոնք իշխանութեան մէջ են, ե՛ւ նրանց, որ ընդդիմութիւն են: Կարծում եմ, նմանատիպ երեւոյթները մեր ազգին վայել չեն, մեր ազգի կերպարին վայել չեն: Մենք հսկայական մարդկային ժառանգութիւն ունենք եւ պէտք է դրանից օգտուենք:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top