Թուրքիոյ Քրտամէտ Կուսակցութիւնը Աֆրինի Գործողութիւնը Դադրեցնելու Կոչ Կ՛ընէ

Սուրիոյ կառավարութեան համակիր ուժեր Աֆրին կը հասնին---


Լուսանկարը՝ Ճորճ Ուրֆալեանի («Ա.Էֆ.Փէ.»)
Սուրիոյ կառավարութեան համակիր ուժեր Աֆրին կը հասնին--- Լուսանկարը՝ Ճորճ Ուրֆալեանի («Ա.Էֆ.Փէ.»)

Սուրիոյ կառավարութեան համակիր ուժեր Աֆրին կը հասնին—
Լուսանկարը՝ Ճորճ Ուրֆալեանի («Ա.Էֆ.Փէ.»)

ՊՈԼԻՍ, «Ա.Էֆ.Փէ.».- Թուրքիոյ քրտամէտ Ժողովուրդներու ժողովրդավարական կուսակցութեան համանախագահ Փերվին Պուլտան Հինգշաբթի, Փետրուար 22ին «ապատեղեկատուութիւն» որակեց Թուրքիոյ կառավարութեան այն պնդումները, ըստ որոնց՝ աւելի քան ամիս մը առաջ հիւսիսային Սուրիոյ Աֆրին քաղաքին դէմ սկսած թրքական զինուորական գործողութեան ընթացքին միայն «ահաբեկիչներ» սպաննուած են։

Թուրքիոյ փոխվարչապետ Պեքիր Պօզտաղ նոյն օրը պնդած էր, թէ ցարդ ոչ մէկ քաղաքային սպաննուած է այս գործողութեան ընթացքին, մինչ միջազգային կազմակերպութիւններու համաձայն՝ առնուազն 112 քաղաքայիններ, ներառեալ երեխաներ եւ կիներ, սպաննուած են թրքական յարձակումին իբրեւ հետեւանք։

Այս պնդումը «սուտ» համարած Պուլտան նաեւ յայտնեց, թէ մեծ թիւով թուրք զինուորներ եւս սպաննուած են այս յարձակումին ընթացքին, ինչի համար ան աւելցուց, թէ ժամանակը հասած է, որ վերջ տրուի ռազմական այս գործողութեան։

Միւս կողմէ, «Մայատին» կայանը կը հաղորդէ, որ թրքական ուժերը կը շարունակեն իրենց ռմբակոծումները, որոնց նպատակն է Թուրքիոյ նախագահ Ռեչեփ Թայիփ Էրտողանի՝ «Աֆրինը պաշարելով խեղդամահ ընելու» սպառնալիքը գործադրել։ Ըստ նոյն աղբիւրին՝ թրքական ռմբակոծումին նպատակը սուրիական բանակի վերահսկողութեան տակ գտնուող շրջանն ու Աֆրինը իրարու կապող կենսական գիծը կտրելն է, ինչ որ կրնայ մարդասիրական աղէտ ստեղծել Աֆրինի մէջ:

Աֆրինի մէջ, քրտական ուժերու աղբիւրներ Հինգշաբթի օր յայտնեցին, թէ Ռուսիոյ առաջարկին անսալով՝ Սուրիոյ բանակը Աֆրին չի գտնուիր, սակայն Սուրիոյ կառավարամէտ ուժերը կը շարունակեն մուտք գործել Աֆրին, հակառակ անոնց արգելք հանդիսանալ փորձող թրքական հրետանիի ջանքերուն:

Միւս կողմէ, Թուրքիոյ նախագահին մօտիկ աղբիւր մը յայտեց, որ «առնչակից մարմինները, ներառեալ գաղտնի սպասարկութիւնը, բացառաբար Դամասկոսի հետ ուղղակի եւ անուղղակի հաղորդակցութիւններ կ՛ունենան»՝ Թուրքիոյ եւ Սուրիոյ զինուորական ուժերուն միջեւ ուղղակի բախումի մը առաջքը առնելու համար, վերահաստատելով Էրտողանի այն սպառնալիքը, թէ՝ «Սուրիոյ կառավարութեան կամ այլ տարրերու Աֆրինի մէջ առած քայլերը պիտի ունենան ծանր հետեւանքներ»:

Իր կարգին, Ռուսիոյ արտաքին գործոց նախարար Սերկէյ Լաւրով նշեց. «Արտաքին բոլոր դերակատարները պէտք է Սուրիոյ միութեան պահպանման համար Դամասկոսի հետ երկխօսութիւն կատարելու կարեւորութեան գիտակցին»։

Մինչ այդ, միջազգային համայնքը Դամասկոսի արեւելեան Ղութա շրջանին մէջ բախումները կասեցնելու կոչերը սաստկացուց՝ հոն արձանագրուող մեծաթիւ զոհերուն ի տես։

Սուրիոյ արտաքին գործոց նախարարութիւնը հաստատեց, որ արեւմուտքի կարգ մը պատասխանատուներ եւ այլ կողմեր մեղսակից կը համարուին Դամասկոսի մէջ քաղաքացիներուն դէմ ի գործ դրուած ահաբեկչական արարքներուն, յատկապէս երբ անոնք կ՛ուրանան սուրիացիները պաշտպանելու եւ ահաբեկիչներուն դէմ պայքարելու Սուրիոյ իրաւունքը՝ յիշեցնելով, որ Դամասկոսի բնակչութիւնը արեւելեան Ղութայէն կատարուած ամէնօրեայ ահաբեկչական յարձակումներու թիրախ է:

ՄԱԿի ընդհանուր քարտուղարին եւ Ապահովութեան խորհուրդին յղուած նամակին մէջ նախարարութիւնը գրած է. «Երեքշաբթի, Փետրուար 20ին, արեւելեան Ղութայի մէջ կայք հաստատած զինեալ ահաբեկչական խմբաւորումներ տասնեակ հրթիռներ արձակեցին Դամասկոսի բնակելի թաղամասերուն, դպրոցներուն, հիւանդանոցներուն, հանրային ու ծառայողական հաստատութիւններուն եւ կարգ մը դիւանագիտական պատուիրակութիւններու կեդրոններուն ուղղութեամբ: Ահաբեկչական այս յարձակումները սաստկացան այն ժամանակ, երբ Արեւմուտքի կարգ մը պատասխանատուներ քարոզարշաւներով հանդէս եկան՝ ի նպաստ զինեալ ահաբեկչական խմբաւորումներուն ու անոնց ահաբեկչական գործողութիւններուն:

Վերջին օրերուն սաստկացած ու մինչ այս նամակին ուղարկումի ժամը շարունակուող ահաբեկչական գործողութիւններուն իբրեւ հետեւանք, Դամասկոսի զանազան շրջաններու ուղղութեամբ արձակուեցան աւելի քան 45 հրթիռներ, 6 քաղաքայիններ զոհուեցան եւ աւելի քան 29՝ վիրաւորուեցան»:

Կը հաղորդուի նաեւ, որ վերջին քանի մը օրերուն սաստակացած ռմբակոծումերուն իբրեւ հետեւանք, արեւելեան Ղութայի մէջ մօտաւորապէս 300 հոգի սպաննուած է։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top