Սերպիոյ Խորհրդարանը Մերժեց Ցեղասպանութիւնը Ճանչցող Ընդդիմութեան Առաջարկը

0309Serb

0309Serb

ԵՐԵՒԱՆ.- Հայաստանի Հանրային ձայնասփիւռի կայանը կը հաղորդէ, թէ Հինգշաբթի, Մարտ 8ին, Սերպիոյ խորհրդարանը մերժեց Հայոց Ցեղասպանութիւնը ճանչնալու մասին ընդդիմութեան ներկայացուցած բանաձեւը քննարելու առաջարկը:

Վերջին տասնամեակին նման առաջարկներ քանի մը անգամ ներկայացուած են սերպ խորհրդարանին, սակայն ցարդ մերժուած են. այս մասին կը հաղորդէ «Ազատութիւն» կայանի պալքանեան ծառայութիւնը:

Օսմանեան Թուրքիոյ մէջ մէկուկէս միլիոն հայերու Ցեղասպանութիւնը ճանչցող բանաձեւը այս անգամ ներկայացուած էր Սերպիոյ նախկին վարչապետ Զորան Զիւքովիչի կողմէ, որ ներկայիս կը գլխաւորէ «Նոր Կուսակցութիւն» քաղաքական ուժը:

Մօտաւորապէս 7 միլիոն բնակչութիւն ունեցող Սերպիան, որ անցեալ դարասկիզբին նոյնպէս կը գտնուէր Օսմանեան կայսրութեան սահմաններէն ներս, սակաւաթիւ հայ համայնք ունեցող երկիրներէն է. տարբեր գնահատականներով՝ հոն կը բնակի մօտաւորապէս 300 հայ: Հակառակ այս հանգամանքին, Սերպիոյ նախագահը մէկն էր աշխարհի այն առաջնորդներէն, որոնք 2015ի Ապրիլ 24ին, Երեւանի մէջ մասնակցեցան Հայոց Ցեղասպանութեան 100ամեակին նուիրուած ձեռնարկներուն:

«Չէինք կրնար յանդգնիլ այստեղ չըլլալ. մեզի համար չգալու տարբերակը չկար», Ծիծեռնակաբերդի յուշահամալիրին մէջ յայտարարած էր այդ օրերու Սերպիոյ նախագահ Տոմիսլաւ Նիքոլիչ: «Ինչպէ՞ս կրնանք մենք այսօր այստեղ չըլլալ եւ ինչպէ՞ս կրնանք դաւաճանել միլիոնաւոր զոհերու յիշատակը. ինչպէ՞ս չճանչնանք ճշմարտութիւնը, ինչպէ՞ս չսորվինք ճշմարտութեան այն դասերը, զորս մարդկութիւնը դասաւանդած եւ աւանդած է շատոնց», ըսած էր ան:

Սակայն, Սերպիոյ խորհրդարանը կը շարունակէ խուսափիլ 1915ի իրադարձութիւնները պաշտօնապէս իբրեւ ցեղասպանութիւն ճանչնալու քայլէն:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top