ՈՒԱՇԻՆԿԹԸՆ ՈՒՂԵՒՈՐՈՒԹԵԱՆ ՆԱԽՕՐԵԱԿԻՆ ԱԶԳ. ԱՌԱՋՆՈՐԴԱՐԱՆ ԱՅՑԵԼԵԼՈՎ՝

0314AP6

«Փիլիպոս»ի 8րդ Կարգի Աշակերտները Վերանորոգեցին Հայաստանի Ա. Հանրապետութեան Աւանդներուն Հաւատարմութեան Ուխտը

 

ԼԱ ՔՐԵՍԵՆԹԱ.- Պահպանելով տարիներու բարի աւանդութիւնը, Ազգ. Ռոզ եւ Ալէք Փիլիպոս վարժարանի 8րդ կարգի աշակերտները, Ուաշինկթըն այցելութեան նախօրեակին՝ Հինգշաբթի, 8 Մարտի կէսօրին այցելեցին Ազգային առաջնորդարան, ստանալու համար առաջնորդ Մուշեղ արք. Մարտիրոսեանի օրհնութիւնը եւ լսելու անոր պատգամը։ Անոնք ներկայացուցին գեղարուեստական կոկիկ յայտագիր մը, որ նուիրուած էր Հայաստանի Ա. Հանրապետութեան 100ամեակին։

Աւելի քան 55 աշակերտներ առաջնորդարան ժամանեցին՝ ընկերակցութեամբ հայերէնի դաստիարակներու՝ Գէորգ Սարգիսեանի, Սոնա Մատարեանի եւ Անահիտ Ներսէսեանի։ Անոնք առաջնորդուեցան «Ս. Տրդատ եւ Ս. Աշխէն» մատուռը, ուր աղօթեցին։ Առաջնորդ սրբազանի կողքին էին առաջնորդական փոխանորդ Թորգոմ Ծ. վրդ. Տօնոյեան եւ Նարեկ Ա. քհնյ. Փեհլիվանեան։ Տէրունական աղօթքէն ետք հոգեւոր հայրերը երգեցին Արեւագալի շարական մը։

Գեղարուեստական յայտագիրը ներկայացուեցաւ «Տիգրան եւ Զարուհի Տէր Ղազարեան» սրահին մէջ։ Աշակերտներուն անունով խօսք արտասանեց Սաթիկ Սէրայտարեանը՝ նշելով, թէ այս այցելութեան հիմնական նպատակն է ստանալ սրբազանին օրհնութիւն եւ լսել պատգամը, որ զիրենք պիտի թրծէ մեր աղօթքներու բարոյական արժէքներով։ Ան հաստատեց, թէ կը գիտակցին Հայաստանի Հանրապետութեան 100ամեակի խորհուրդին, հաղորդակից են անկախութիւնը կերտող սերունդի արժէքին ու աւանդին, եկած են նորոգելու անոնց հաւատարմութեան ուխտը եւ անկախութիւնը կերտող սերունդի քայլերուն հետեւորդը ըլլալու կամքը, նաեւ այդ հաւատքով լծուելու հայրենիքին, ազգին ու եկեղեցւոյ ծառայութեան։

Հանդիսավարութիւնը կատարեց Անի Թովմասեան։ Ան յաջորդաբար բեմ հրաւիրեց ընկերները, որոնք արտասանեցին առանձնաբար կամ խմբովին, երգեցին ու նուագեցին. ընտրուած կտորները մեծ մասամբ հայրենասիրական գործեր էին, համեմուած՝ ժողովրդական երաժշտութեամբ։

Յայտագիրի աւարտին, ուսուցչուհի Սոնա Մատարեան յայտնեց, թէ աշակերտները երկու շաբաթէ ի վեր խանդավառութեամբ կը պատրաստուէին այս այցելութեան, իսկ ներկայացուած յայտագիրը հայելին է իրենց առօրեային եւ հայրենասիրական-հայաշունչ ապրումներուն։ Ապա ան հրաւիրեց առաջնորդը, որ ուղղէ իր պատգամը։

Սրբազանը ուրախութիւն յայտնեց աշակերտներուն այցելութեան համար, հպարտանք՝ ներկայացուած յայտագիրին, ողջունեց եւ օրհնեց տնօրէնութիւնն ու դաստիարակները, որոնց հոգածութիւնը կը վայելեն աշակերտները, եւ ծնողները, որոնք գիտակցելով Հայ Դպրոցի առաքելութեան՝ իրենց հոգեհատորները վստահած են անոր յարկին։

Խօսքը յատկապէս աշակերտներուն ուղղելով՝ ան շեշտեց, որ Հայ Դպրոցի յարկին տակ աճելով անոնք տարուէ տարի աւելի եւս կը սպառազինուին մարդկային, քրիստոնէական ու հայկական արժէքներով, պաշտպանուելու համար արտաքին օտար եւ անբաղձալի ազդեցութիւններու դէմ, իսկ այսօր, կը խոստանան նաեւ վերանորոգել մեր աւանդներուն իրենց հաւատարմութեան ուխտը։ Առաջնորդը յիշեցուց, որ Հայաստանի անկախութիւնը կերտողները իրենց կարգին հաւատարիմ էին անցեալէն եկող ժառանգութեանց ու ազգային արժէքներու պահպանումի ուխտին, իսկ աշակերտներուն ազնիւ պարտականութիւնն է շարունակե՛լ նոյն աւանդութիւնները։

Խօսելով աշակերտներուն Ուաշինկթըն մօտալուտ այցելութեան մասին՝ առաջնորդ սրբազանը յորդորեց զանոնք, որ հոն իրազեկ դառնան, թէ այս երկիրը կ՛ապրի կարգ ու կանոնով եւ օրէնքներով, որոնք կը նմանին անսասանելի պատգամներու. նման կարգ ու կանոն կը տիրէ նաեւ մեր դպրոցներուն ու հաւաքական կեանքին մէջ, եւ աշակերտները պարտին յարգել այդ բոլորը, եւ վերադարձին՝ աւելի լաւ ըմբռնեն օրէնքին ու Հայ Դպրոցին արժէքը, որպէսզի անոնցմով տոգորուած՝ ապագային դառնան մեր ժողովուրդի առաջնորդներն ու ղեկավարները։

Ան մաղթեց, որ աշակերտները նաեւ Ուաշինկթընի մէջ Ծաղկազարդի օրը առիթ ունենան ըլլալու քաղաքի հայկական եկեղեցւոյ յարկին տակ, իսկ աւելի ուշ, իրենց հոգիները հարստացնեն Աւագ Շաբթուան ու Քրիստոսի Ս. Յարութեան պատգամներով եւ խորհուրդներով, վերանորոգեն եկեղեցւոյ, դպրոցի, ազգի ու ծնողներու աւանդներուն պահապան ըլլալու իրենց ուխտը։

Հանդիպումը վերջ գտաւ առաջնորդին օրհնութեան աղօթքով։ Բոլորը միասնաբար երգեցին «Կիլիկիա»ն ու «Մեր Հայրենիք»ը։ Մեկնելէ առաջ, անոնք ծանօթացան Ազգ. առաջնորդարանի կարգ մը բաժանմունքներուն եւ նուէր ստացան առաջնորդարանի հրատարակութիւններէն՝ «Աստուծոյ Խօսքը» աղօթագիրքէն օրինակներ։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top