Վիրապեան, Մաթէոսեան Եւ Աստուրեան Պիտի Բանախօսեն

0309First Republic Logo-Armenian

0309First Republic Logo-ArmenianԿԼԵՆՏԷՅԼ.- ՀՅԴ Արեւմտեան Ամերիկայի Կեդրոնական կոմիտէին կազմակերպած եւ Հայաստանի Ա. Հանրապետութեան հարիւրամեակին նուիրուած երկօրեայ գիտաժողովին, որ պիտի կայանայ Մայիս 5-6ին, ներկաները առիթը պիտի ունենան ունկնդրելու դոկտորներ Ամատունի Վիրապեանի, Վարդան Մաթէոսեանի եւ Ստեփան Աստուրեանի ուսումնասիրութիւնները։

Նշենք, որ գիտաժողովը կ՛իրականանայ Քալիֆորնիոյ Նահանգային համալսարանի Նորթրիճի մասնաճիւղին (CSUN) մէջ գործող Հայագիտական բաժինին հետ համագործակցաբար։

«Հայկական պետականութեան վերականգնում՝ իրագործումներ եւ անդրադարձներ» բնաբանով սոյն խորհրդաժողովը առիթ պիտի հանդիսանայ քննարկելու համար Հայաստանի Ա. Հանրապետութեան ունեցած յատկանշական դերը հայ ժողովուրդի պատմութեան մէջ, մասնակցութեամբ աշխարհի տարածքէն պատմաբաններու եւ մասնագէտներու:

0000Amatuni Virabyan

Դոկտ. Ամատունի Վիրապեան

Դոկտ. Ամատունի Վիրապեան Հայաստանի Ազգային արխիւի տնօրէնն է եւ պատմութեան մէջ մասնագիտացած է Վանաձորի Պետական համալսարանէն։ Ան հեղինակ է աւելի քան 50 գործերու, որոնց շարքին են նաեւ Հայաստանի Ա. Հանրապետութեան առնչուող հատորներ։ 2004էն ի վեր, ան Հայաստանի Գիտութեանց ակադեմիոյ խորհրդակցական մարմինի անդամ եղած է, իսկ 2007էն ի վեր՝ Մատենադարանի ուսումնասիրական հիմնարկի խորհրդակցական մարմինին։ Ան պիտի բանախօսէ Հայաստանի Ա. Հանրապետութեան ընկերատնտեսական իրավիճակին մասին՝ քննարկելով Համաշխարհային Ա. պատերազմին, ինչպէս նաեւ Հայոց Ցեղասպանութենէն վերապրած եւ Հայաստան ապաստանած գաղթականներուն ունեցած փորձառութիւնները։ Այս պայմաններուն ստեղծած տնտեսական ճգնաժամին իբրեւ հետեւանք, մօտաւորապէս 180,000 քաղաքացիներ սովամահ եղան, իսկ պետութիւնը՝ պարտադրուած, մենատիրական քայլերու դիմած էր՝ կացութիւնը հակակշռելու նպատակով։ Տնտեսութիւնը բարեկարգելու ջանքերը խեղդուած էին հայ-թրքական պատերազմին եւ խորհրդայնացման ալիքին տակ։

0000vartan

Դոկտ. Վարդան Մաթէոսեան

Դոկտ. Վարդան Մաթէոսեան գործադիր վարիչն է Նիւ Եորքի Հայ Ազգային կրթական յանձնախումբին։ Ան պատմութեան մէջ մասնագիտացած է Հայաստանի Գիտութեանց ակադեմիոյ Պատմութեան հիմնարկէն ու հեղինակած է շարք մը յօդուածներ, թարգմանութիւններ, գիրքերու վերլուծութիւններ՝ հայերէնով, սպաներէնով եւ անգլերէնով, ինչպէս նաեւ 6 հատորներ, որոնցմէ մէկը Կոստան Զարեանի կենսագրութիւնն է։ Ան պիտի ներկայացնէ «Լեռնէն լիճ. Հանրապետութեան նաւերը եւ Կոստան Զարեան» նիւթը, որ նուիրուած է Հայաստանի Ա. Հանրապետութեան  «ծովուժ»ին, որուն որբ մարտանաւը Սեւանայ լիճին վրայ տեղադրուած «Աշոտ Երկաթ»ն էր։ Անիկա նաեւ ունէր հետախուզական «Գեղանուշ» նաւը, որ Ռուսիոյ կողմէ լքուած էր Նախիջեւանի մէջ, եւ անոր Սեւանայ լիճ փոխադրութեան պատմութիւնը առաջնորդած էր Հանրապետութեան առնչուող հազուագիւտ վէպերէն մէկուն՝ Զարեանի «Նաւը Լերան Վրայ» հատորին։

0000Stephan Astourian

Դոկտ. Ստեփան Աստուրեան

Դոկտ. Ստեփան Աստուրեան Քալիֆորնիոյ համալսարանի Պըրքլիի մասնաճիւղին մէջ գործող Հայագիտականին՝ Ուիլեըմ Սարոյեանի անուան ամպիոնի վարիչն է, ինչպէս նաեւ դասախօս է նոյն համալսարանի Պատմութեան բաժանմունքին մէջ։ Ան անդամ է շարք մը ուսումնասիրական կեդրոններու եւ հիմնարկներու վարչութեանց, ներառեալ նշեալ համալսարանի՝ Սլաւական, Արեւելեան Եւրոպայի եւ Եւրասիական ուսմանց հիմնարկին։ Ան շարք մը ուսումնասիրութիւններ հրատարակած է՝ հայոց, օսմանեան, ատրպէյճանական եւ յետ-խորհրդային կովկասեան քաղաքականութեան մասին։ Ան գիտաժողովին պիտի ներկայացնէ «Ակնարկ Հայաստանի Ա. Հանրապետութեան ծնունդին, զարգացման եւ յաջորդող տարիներուն վրայ», եւ պիտի կեդրոնանայ Հանրապետութեան նկատմամբ հայ պատմագիտութեան տարբեր յատկանիշներուն եւ մօտեցումներուն վրայ, շեշտելով յատկապէս հայութեան երկարամեայ անկախութեան տենչը, օտար ուժերու «դաւաճանական» միջամտութիւնները, սխալներէն սորվելու հայկական կողմին անկարողութիւնը եւ պատասխանատուութիւն ստանձնելու չկամութիւնը։

Նշենք, որ խորհրդաժողովին հովանաւորութիւնը ստանձնած են տէր եւ տիկին Հէրի եւ Շերըլ Նաճարեաններ։ Անիկա տեղի պիտի ունենայ CSUN-ի «Plaza Del Sol» սրահին մէջ, որուն հասցէն է՝ 18111 Nordhoff St., Northridge, CA 91330։

Մուտքը ազատ է: Յաւելալ տեղեկութեանց համար, այցելել the1strepublic.org կայքը։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top