ԱՐՑԱԽԵԱՆ ՊԱՅՔԱՐԻ ՍԿԶԲՆԱՒՈՐՈՒԹԵԱՆ 30ԱՄԵԱԿԻ ԱՌԹԻՒ- Պարգեւ Արք. Մարտիրոսեանի Լոսանճելըսեան Շրջագայութիւնը Կը Շարունակուի

0317Barkev Mikael
0317Barkev Mikael

Առաջնորդ Միքայէլ եպս. Մուրատեանի հետ

ՍԵԴԱ ԳՐԻԳՈՐԵԱՆ (*)

 

Կլենտէյլի մէջ գործող 24 միութիւններ, ՀՅԴ «Ա. Ահարոնեան» կոմիտէութեան գլխաւորութեամբ, այս օրերուն լծուած են Արցախեան գոյամարտի 30ամեայ երթը ժողովրդային համախմբումով տօնակատարելու աշխատանքին, գլխաւոր պատգամաբեր ունենալով Արցախի հոգեւոր հովիւ Պարգեւ արք. Մարտիրոսեանը, որ յատուկ այս նպատակին համար հրաւիրուած է Արցախէն՝ իր սրտի խօսքը փոխանցելու լոսանճելըսահայութեան, Կիրակի 18 Մարտին, Կլենտէյլի Verdugo Park-ի մէջ կազմակերպուած ժողովրդային տօնախմբութեան, որ պիտի սկսի առաւօտեան ժամը 11ին եւ պիտի տեւէ մինչեւ երեկոյեան ժամը 6:

Պարգեւ սրբազան Լոս Անճելըս ժամանեց Կիրակի, 11 Մարտին եւ կը շարունակէ Արցախի հայորդիներուն ջերմ ողջոյնները փոխանցել Լոս Անճելըսի իրենց քոյր եղբայրներուն, տասնօրեայ իր կեցութեան ընթացքին տեսակցութիւններ ունենալով Լոս Անճելըսի հոգեւոր պետերու, ազգային, կրթական եւ մարզական հաստատութիւններու ներկայացուցիչներու հետ՝ այցելելով հոգեւոր կառոյցներ, ազգային, կրթական հիմնարկներ եւ հաստատութիւններ:

 

ԱՅՑԵԼՈՒԹԻՒՆ ԹԻՒՖԷՆՔԵԱՆ ԱԶԳԱՅԻՆ ՄԱՆԿԱՄՍՈՒՐ

 

Արցախի 30ամեակին նուիրուած այս շրջագայութեան ծիրէն ներս Պարգեւ սրբազան Չորեքշաբթի, 14 Մարտի առաւօտեան այցելեց Թիւֆէնքեան Ազգ. մանկամսուր, ընկերակից ունենալով Արեւմտեան թեմի առաջնորդ Մուշեղ արք. Մարտիրոսեան, Ս. Աստուածածին եկեղեցւոյ հովիւներէն Վազգէն Ա. քհնյ. Աթմաճեան եւ կազմակերպիչ յանձնախումբէն ներկայացուցիչներ, որոնք բոլորը ջերմօրէն ընդունուեցան տնօրէնուհի Արսինէ Աղազարեանի, մանկամսուրի բարերար Սավի Թիւֆէնքեանի, Ուսումնական խորհուրդի ներկայացուցիչներու, ուսուցչական կազմի եւ մանուկ աշակերտներու կողմէ:

0317Barkev Tufenk

Թիւֆէնքեան Ազգ. մանկամսուրի պաշտօնէութեան եւ սաներուն հետ

Տնօրէնուհի Աղազարեանի բարի գալուստի խօսքէն ետք մանուկները մեծ խանդավառութեամբ երգեցին հայրենասիրական երգեր, որոնցմէ  մէկը յօրինուած էր դպրոցի երաժշտութեան ուսուցչուհիին կողմէ եւ նուիրուած էր Արցախին։ Ապա Մուշեղ սրբազան մանկամսուրի սաներուն ներկայացուց հեռաւոր Արցախէն ժամանած այցելուն՝ Պարգեւ սրբազանը, որ իր կարգին խօսք առնելով յորդորեց մանուկները իրենց ծնողներուն հետ անպայման այցելել Արցախ եւ եղբայրական կամուրջներ հաստատել Արցախի իրենց տարեկիցներուն հետ:

Թիւֆէնքեան մանկամսուրի թոթովախօս հայ մանուկներու հետ հոգեպարար հանդիպման ի յիշատակ, աշակերտները Պարգեւ սրբազանին ձօնեցին իրենց իսկ թաթիկներով գծած ու ներկած հայրենաշունչ պաստառ մը: Այցելութեան աւարտին տեղի ունեցաւ կոկիկ հիւրասիրութիւն:

 

ՀԱՆԴԻՊՈՒՄ ԱՌԱՋՆՈՐԴ ՄԻՔԱՅԷԼ ԵՊՍ. ՄՈՒՐԱՏԵԱՆԻ ՀԵՏ

 

Հինգշաբթի, 15 Մարտի առաւօտեան, Պարգեւ սրբազան այցելեց Հայ կաթողիկէ Ս. Գրիգոր Լուսաւորիչ աթոռանիստ եկեղեցի եւ տեսակցեցաւ հայ կաթողիկէ համայնքի առաջնորդ Միքայէլ եպս. Մուրատեանի հետ: Հանդիպման նաեւ ներկայ եղան հայր Արմենակ Պետրոսեան եւ կազմակերպիչ յանձնախումբի անդամներ:

Հոգեւոր զոյգ պետերու զրոյցը ընդգրկեց հայրենական եւ ազգային հարցեր, ապա, անդրադառնալէ ետք Լոս Անճելըս այցելութեան նպատակին, Պարգեւ սրբազան հետաքրքրական տեղեկութիւններ փոխանցեց Արցախի հոգեւոր եւ մշակութային ներկայ կեանքին եւ պետական մակարդակով խրախուսուող վերաբնակեցման ծրագիրին մասին՝ նշելով, որ Արցախէն արտագաղթողներուն թիւը նուազ է ներգաղթողներէն, իսկ պետութիւնը գրաւիչ պայմաններ կը ստեղծէ յատկապէս բազմազաւակ ընտանիքներու համար, որպէսզի անոնք բնակութիւն հաստատեն յատկապէս սահմանային գիւղերու մէջ: Ան ուրախութեամբ աւելցուց, որ Արցախի բնակիչներուն եւ ծնելիութեան թիւը վերջին տարիներուն աճ արձանագրած է, միաժամանակ նշելով, որ շրջանին մէջ քահանաներու պահանջը մեծ է, ու ներկայիս թիւով միայն տասը քահանայ կը գործէ Արցախի 272 գիւղերու բնակիչներու հոգեւոր կարիքներուն համար:

Տեսակցութեան աւարտին, Միքայէլ եպս. Մուրատեանի առաջնորդութեամբ, Պարգեւ սրբազան եւ ընկերակիցները շրջագայեցան եկեղեցւոյ բոլոր բաժանմունքներուն մէջ. Արցախի հովուապետը վերյիշեց իր առաջին այցելութիւնը եկեղեցի, որ 18 տարի առաջ էր, երբ կառոյցը տակաւին շինարարական աշխատանքներու մէջ էր:

 

ՀԱՅ ՔՈՅՐԵՐՈՒ ՎԱՐԺԱՐԱՆԷՆ ՆԵՐՍ

 

Կէսօրին, առաջնորդ Միքայէլ եպս. Մուրատեանի առաջնորդութեամբ, Արցախի հոգեւոր պետը ու ընկերակիցները այցելեցին Լոս Անճելըսի Հայ Քոյրերու վարժարան, ուր եւ ընդունուեցան վարժարանի պատասխանատու քոյրեր՝ Լուսինէի եւ Գայեանէի, ինչպէս նաեւ փոխտնօրէնուհի Սոնա Գազանճեանի կողմէ: Ջերմ ու սիրալիր մթնոլորտի մէջ ծաւալեցաւ զրոյց, ապա հոգեւոր հայրերը շրջագայեցան վարժարանին մէջ եւ այցելեցին դասարանները: Աշակերտները ակնկառոյց կը սպասէին Արցախէն ժամանած հիւրին, որուն հետ զրուցեցին հայերէն, ապա երգեցին հայրենասիրական երգեր եւ պատասխանեցին Պարգեւ սրբազանի հարցումներուն, ականջ դնելով անոր հայրական ու ազգայնաշունչ յորդորներուն:

0317Barkev ASA

Հայ Քոյրերու վարժարանէն ներս

Հայ Քոյրերու վարժարանի սաներուն հետ հոգեպարար այս պահը աւարտեցաւ բարձր տրամադրութեամբ, իբրեւ յիշատակի նուէր Պարգեւ սրբազանի մատուցուեցաւ վարժարանի տարեգիրքը, մինչ իւրաքանչիւր աշակերտի հոգիէն ներս կը շարունակէր ղօղանջել Արցախ աշխարհի հոգեւոր կանչը…

Նոյն օրը երեկոյեան, Արցախի ազատագրութեան 30ամեակի յանձնախումբի կազմակերպութեամբ, Կլենտէյլի «Impressions» սրահին մէջ տեղի ունեցաւ ընդունելութիւն-ընթրիք, ի պատիւ Արցախ աշխարհի հոգեւոր առաջնորդ Պարգեւ արք. Մարտիրոսեանի:

Մանրամասնութիւնները կը փոխանցենք յառաջիկային:

Յիշեցնենք, որ Արցախի 30ամեակին նուիրուած ժողովրդային տօնախմբութիւնը տեղի պիտի ունենայ Կիրակի, 18 Մարտին, առաւօտեան ժամը 11էն երեկոյեան ժամը 6, Verdugo Parkի մէջ, Կլենտէյլ:

 

 * Պարգեւ Սրբազան Մարտիրոսեանի լոս անճելըսեան շրջագայութեան թղթակցութեան Ա. բաժինը, որ լոյս տեսաւ Հինգշաբթի, 15 Մարտին, պատրաստուած էր Սեդա Գրիգորեանի կողմէ

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top