Մելքոնեան, Պուռնութեան Եւ Գրիգորեան Պիտի Բանախօսեն Հանրապետութեան 100ամեակին Նուիրուած Գիտաժողովին

0414First-Republic-Armenian

0414First Republic ArmenianԿԼԵՆՏԷՅԼ.- ՀՅԴ Արեւմտեան Ամերիկայի Կեդրոնական կոմիտէին կազմակերպած եւ Հայաստանի Ա. Հանրապետութեան հարիւրամեակին նուիրուած երկօրեայ գիտաժողովին, որ պիտի կայանայ Շաբաթ եւ Կիրակի, Մայիս 5-6ին, ներկաները առիթ պիտի ունենան ունկնդրելու դոկտորներ՝ Աշոտ Մելքոնեանի, Ճորճ Պուռնութեանի եւ Ռապըրթ Գրիգորեանի ուսումնասիրութիւնները:

Գիտաժողովը կ՛իրականանայ Քալիֆորնիոյ Նահանգային համալսարանի Նորթրիճի մասնաճիւղէն (CSUN) ներս գործող Հայագիտական բաժինին հետ համագործակցաբար:

«Հայկական պետականութեան վերականգնում՝ իրագործումներ եւ անդրադարձներ» բնաբանով սոյն խորհրդաժողովը առիթ պիտի հանդիսանայ քննարկելու Հայաստանի Ա. Հանրապետութեան ունեցած յատկանշական դերը հայ ժողովուրդի պատմութեան մէջ, մասնակցութեամբ աշխարհի տարածքէն 15 պատմաբաններու եւ մասնագէտներու:

0414Ashot Melkonyan

Դոկտ. Աշոտ Մելքոնեան

Դոկտ. Աշոտ Մելքոնեան Հայաստանի Ազգային գիտութեանց ակադեմիոյ Պատմութեան հիմնարկի վարիչն է եւ մասնագիտացած է Երեւանի Պետական համալսարանին մէջ։ Անոր ուսումնասիրութիւնները լոյս տեսած են Հայաստանի, Միացեալ Նահանգներու, Բրիտանիոյ, Ֆրանսայի, Ռուսիոյ, Վրաստանի, Լիբանանի, Եգիպտոսի եւ Իրանի մէջ։ Անոր ուսումնասիրութիւնները կեդրոնացած են յատկապէս Հայաստանի ժողովրդագրութեան, Ջաւախքի պատմութեան եւ հայ-վրացական յարաբերութիւններուն վրայ։ Մելքոնեանի շնորհուած է Պատմահայր Մովսէս Խորենացիի անուան շքանշանը, հայոց պատմութեան ուսումնասիրութեանց մէջ իր յատկանշական ներդրումներուն համար։

Դոկտ. Մելքոնեանի ներկայացումը կ՛առնչուի Միացեալ Հայաստանի յայտարարութեան, որ կատարուեցաւ Մայիս 28, 1919ին եւ որուն նպատակն էր մէկ հովանիի տակ առնել հայութեան արեւելեան եւ արեւմտեան հատուածները, նկատի ունենալով Հայոց Ցեղասպանութեան իբրեւ հետեւանք տեղահան եղած արեւմտահայութեան որոշ հատուածներու այն մտահոգութիւնը, թէ Հայաստանի Ա. Հանրապետութեան իշխանութիւնները բաւարար կերպով չեն պաշտպաներ արեւմտահայութեան իրաւունքները։ Միացեալ Հայաստանի նպատակը կարելի չեղաւ իրականացնել՝ Թուրքիոյ քեմալականներուն եւ Ռուսիոյ պոլշեւիկներուն հակահայ գործակցութեան իբրեւ հետեւանք, որ պիտի առաջնորդէր Հայաստանի խորհրդայնացման, սակայն, այդ յայտարարութիւնը կարելի եղաւ դարձնել Հայ Դատի պայքարին մէկ հիմնաքարը։

Դոկտ. Ճորճ Պուռնութեան

Դոկտ. Ճորճ Պուռնութեան

Դոկտ. Ճորճ Պուռնութեան պատմագիտութեան մէջ մասնագիտացած է Քալիֆորնիոյ համալսարանի Լոս Անճելըսի մասնաճիւղին մէջ։ Շարք մը հաստատութեանց մէջ դասաւանդած դասախօսը ներկայիս Նիւ Եորքի «Իոնա» համալսարանին մէջ Միջին Արեւելքի եւ Արեւելեան Եւրոպայի պատմութեան դասախօս է: Ան ստանձնած է նաեւ համալսարաններու մէջ վարչական պաշտօններ, որոնց շարքին՝ «Քոլոմպիա» համալսարանի տեսուչի օգնական։ Բազմաթիւ լեզուներու տիրապետող Պուռնութեանի ուսումնասիրութիւնները կեդրոնացած են Իրանի, Հայաստանի եւ Կովկասի պատմութեանց վրայ։ Ան հեղինակ է 36 հատորներու եւ բազմաթիւ ուսումնասիրական յօդուածներու, իսկ հայոց պատմութեան նուիրուած անոր մէկ գիրքը՝ «Հայ Ժողովուրդի Յամառօտ Պատմութիւնը» («The Concise History of the Armenian People») ցարդ թարգմանուած է սպաներէնի, արաբերէնի, թրքերէնի, ռուսերէնի, հայերէնի, ճափոներէնի եւ պարսկերէնի:

Դոկտ. Պուռնութեանի ներկայացնելիք ուսումնասիրութեան խորագիրն է՝ «Երեւան նահանգը եւ Հայաստանի Հանրապետութեան հիմնադրութիւնը»։ Ան պիտի խօսի Նոյեմբեր 1917էն Դեկտեմբեր 1920ի միջեւ Երեւանի դիմագրաւած բազմաթիւ մարտահրաւէրներուն մասին, ներառեալ՝ համաճարակներ, սով, թշնամիներու ռազմական յարձակումներ եւ աւելի քան 300,000 գաղթականներու կարիքներու ապահովում ու զանոնք դիմագրաւելու համար տարուած վիթխարի ջանքերը։ Բանախօսը պիտի մատնանշէ, թէ իր գոյութեան նուազ քան 1000 օրերուն ընթացքին, Հայաստանի Ա. Հանրապետութիւնը, որուն մայրաքաղաքը նախապէս Հարաւային Կովկասի կեանքին մէջ քաղաքական, մտաւորական կամ տնտեսական յատկանշական ներդրում չէր ունեցած, կրցած էր հաստատել ու պահպանել կրթական հաստատութիւններ, վարչական համակարգ, դատարաններ, բանտեր, նամակաբաշխումի, թելեկրաֆի եւ փոխադրական ճամբաներ, բանակ, ոստիկանութիւն եւ առողջապահական կեդրոններ, նաեւ գոյացուցած էր հողագործութեան յարմար պայմաններ ու որոգման համակարգ։

Դոկտ. Ռապըրթ Գրիգորեան

Դոկտ. Ռապըրթ Գրիգորեան

Դոկտ. Ռապըրթ Գրիգորեան Միացեալ Նահանգներու արտաքին գործոց նախարարութեան մէջ Վերլուծական չափանիշներու բաժանմունքի վարիչն է։ Ան պատմագիտութեան եւ եւրասիական գիտութեանց մէջ մասնագիտացած է «Հարվըրտ» համալսարանին մէջ, որուն Ռուսական եւ եւրասիական ուսմանց «Տյէվիս» կեդրոնի դասախօսներէն եղած է։ Ան դասաւանդած է նաեւ Ճորճ Ուաշինկթընի անուան համալսարանին մէջ. յաճախ դասախօսութիւններ կու տայ Միացեալ Նահանգներու կառավարութեան եւ յատկապէս արտաքին գործոց նախարարութեան պաշտօնատարներուն եւ դիւանագէտներուն, ինչպէս նաեւ ամերիկացի դիւանագէտներ պատրաստող Արտաքին սպասարկութեանց հիմնարկին մէջ։ Ան հեղինակ է բազմաթիւ ուսումնասիրական յօդուածներու եւ Հայաստանի առնչուող՝ «Հայաստան. Խաչմերուկներու Վրայ» («Armenia: At the Crossroads») հատորին։

Դոկտ. Գրիգորեան պիտի ներկայացնէ՝ «Հայկական յիշողութիւնը խորհրդային պետութեան դէմ. Հայաստանի Ա. Հանրապետութեան վերյիշումը 1988-1991 տարիներուն» խորագրուած ուսումնասիրութիւնը, ուր պիտի մատնանշէ, թէ Փետրուար 1988ին տեղի ունեցած Սումգայիթի ջարդերը իրողապէս խզեցին հայ ժողովուրդին եւ խորհրդային համակարգին միջեւ գոյութիւն ունեցած լռելեայն այն համաձայնութիւնը, որ հայութեան ֆիզիքական ապահովութեան երաշխիքներ կու տար՝ հաւատարմութեան դիմաց։ Այս համաձայնութիւնը հաստատուած էր խորհրդահայ մտաւորականներու եւ ղեկավարներու այն համոզումին վրայ, թէ Ռուսիա եւ Խորհրդային Միութիւնը կը հանդիսանան միակ ուժերը, որոնք կարողութիւնը ունին հայութեան բնաջնջումը կանխարգիլելու։ Սակայն, Սումգայիթի ջարդերը պարտադրած էին վերատեսութեան ենթարկելու ոչ միայն այս համոզումը, այլեւ Հայաստանի Ա. Հանրապետութեան նկատմամբ կեցուածքները։

Նշենք, որ խորհրդաժողովի հովանաւորութիւնը ստանձնած են տէր եւ տիկ. Հէրի եւ Շերըլ Նաճարեանները: Անիկա տեղի պիտի ունենայ Նորթրիճի համալսարանի «Plaza Del Sol» սրահին մէջ, որուն հասցէն է՝ 18111 Nordhoff St., Northridge, CA 91330:

Գիտաժողովին մուտքը ազատ է: Յաւելեալ տեղեկութեանց համար, այցելել the1strepublic.org կայքը:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top