Մեծի Տանն Կիլիկիոյ Կաթողիկոսութիւնը Կը Հզօրանայ Չորս Եպիսկոպոսներու Ձեռնադրութեամբ

0417ordination

0417ordination

ԱՆԹԻԼԻԱՍ.- Շաբաթ, 14 եւ Կիրակի, 15 Ապրիլին, Մեծի Տանն Կիլիկիոյ կաթողիկոսութեան չորս միաբան հայրեր՝ Մասիս Ծ. վրդ. Զօպուեան (առաջնորդ Քուէյթի եւ շրջակայից Հայոց թեմին), Սիփան Ծ. վրդ. Քէչէճեան (առաջնորդ Սպահանի Հայոց թեմին), Մեսրոպ Ծ. վրդ. Սարգիսեան (կաթողիկոսական փոխանորդ Արաբական Միացեալ Էմիրութեանց, Քաթարի եւ շրջակայից Հայոց թեմին) եւ Թորգոմ Ծ. վրդ. Տօնոյեան (առաջնորդական փոխանորդ Ամերիկայի Միացեալ Նահանգներու Արեւմտեան թեմին), Անթիլիասի Մայրավանքի Ս. Գրիգոր Լուսաւորիչ մայր տաճարին մէջ եպիսկոպոս ձեռնադրուեցան:

Հայրապետական թափօրը նուիրապետական բոլոր կարգերու եւ ժողովուրդի ներկայացուցիչներով ու հանդերձանքով առաջնորդուեցաւ վեհարանէն մայր տաճար: Վեհափառ հայրապետին ամպհովանին կը կրէին ձեռնադրեալներու կնքահայրերը՝ Անուշաւան Նազարեան, Վարուժ Մովսէսեան, Հրայր Սողոմոնեան եւ Կարօ Էշկիեան: Վեհափառ հայրապետը կը գլխաւորէր թափօրը՝ առընթերակայ ունենալով Մուշեղ արք. Մարտիրոսեանը եւ Նարեկ արք. Ալեէմէզեանը:

Իրենց թեմերու Ազգային ժողովներու խնդրագիրներուն եւ վեհափառ հայրապետին կողմէ տրուած արտօնութեան համաձայն, ընծայեալ հայր սուրբերը ներկայացան մայր տաճարին Ս. Երրորդութեան խորանին առջեւ եւ խարտաւիլակ հայ սուրբին՝ Պետրոս վրդ. Մանուէլեանի ու վկաներուն արտօնութեամբ ծնրադիր կարդացին իրենց ուխտագիրները՝ հետեւելու անսայթաք կեանքի եւ ուղղափառ հայրերու վարքին ու գործունէութեան, ինչպէս նաեւ ծառայելու Մեծի Տանն Կիլիկիոյ կաթողիկոսութեան եւ իրենց վստահուած հօտին: Անոնք ստորագրեցին իրենց ուխտագիրները եւ խարտաւիլակին ու վկաներուն առաջնորդութեամբ ներկայացան վեհափառին՝ ստանալու համար անոր օրհնութիւնը: Վեհափառ հայրապետը եպիսկոպոսական իշխանութեան խորհրդանիշ եմիփորոնները զգեցուց ընծայեալներուն եւ պահպանիչով օրհնեց զանոնք:

Եպիսկոպոսական ձեռնադրութեան եւ օծման արարողութիւնները սկիզբ առած էին Շաբաթ, 14 Ապրիլին եւ շարունակուեցան Կիրակի, 15 Ապրիլին Ս. եւ անմահ պատարագի մատուցման ընթացքին՝ նախագահութեամբ Արամ Ա. կաթողիկոսին: Օրուան պատարագի երգեցողութիւնը կատարեց կաթողիկոսարանի «Շնորհալի» երգչախումբը՝ խմբավարութեամբ Զաւէն աբղյ. Նաճարեանի:

Պատարագի ընթացքին ընծայեալները ծնրադիր հրաժարեցան աշխարհէն եւ կոչուեցան եպիսկոպոսութեան կարգին: Ապա, սրբալոյս միւռոնի հեղումով եւ «Առաքելոյ Աղաւնոյ» շարականի երգեցողութեամբ, վեհափառ հայրապետը օծեց ընծայեալներուն ճակատներն ու աջ ձեռքին բթամատը եւ անոնց յանձնեց եպիսկոպոսական գաւազանն ու մատանին: Աւարտին վեհափառ հայրապետը ընծայեալներուն կուրծքերը զարդարեց պանակէով:

Ձեռնադրութեան եւ օծման արարողութեան աւարտին վեհափառ հայրապետը տուաւ իր հայրապետական պատգամը: Նախ եւ առաջ  վեհափառը իր ուրախութիւնը ու գնահատանքը յայտնեց չորս ընծայեալներուն եպիսկոպոսական ծառայութեան միանալուն առիթով: Ան յայտնեց, որ ասիկա ուրախութիւն է հայ եկեղեցւոյ, հայ ժողովուրդին եւ Մեծի Տանն Կիլիկիոյ կաթողիկոսութեան Ս. աթոռին, որ Ցեղասպանութեան արհաւիրքը ապրելէ ետք կարողացած է վերանորոգ ոգիով եւ հաւատքով շարունակել իր առաքելութիւնն ու ծառայական կեանքը:

Վեհափառ հայրապետը իր պատգամը ուղղելով նորաօծ եպիսկոպոսներուն՝ կարեւորութեամբ շեշտեց երեք կէտեր, որոնք հիմնականօրէն կ՛ընդգծէին հայ եկեղեցւոյ ու ժողովուրդին ծառայելու հրամայականը:

Վեհափառի քարոզէն ետք, «Ողջոյն»ի պահուն, միաբան հայրերն ու բոլոր հոգեւորականները, խորան բարձրանալով շնորհաւորեցին նորաօծ եպիսկոպոսները՝ համբուրելով անոնց միւռոնուած ճակատները եւ ձեռքերը:

Պատարագի աւարտին, նորաօծ սրբազան հայրերը ընդունեցին շնորհաւորութիւնները եկեղեցւոյ մէջ:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top