«Սերժ Սարգսեանէն Կ՛ակնկալենք, Որ Իր Ստանձնած Բարեփոխումներու Գործընթացը Աւարտին Հասցնէ». Արմէն Ռուստամեան

0417armenrustamian

0417armenrustamian

ԵՐԵՒԱՆ.- Հայաստանի Հանարպետութեան Ազգային ժողովի ճեպազրոյցներուն ընթացքին, ՀՅԴ խմբակցութեան ղեկավար Արմէն Ռուստամեան յայտարարեց, որ իրենք կը խօսէին ոչ թէ անձերու, այլ համակարգի փոփոխութեան մասին:

«Մենք 3 տարի այդ մասին խօսած ենք: Մենք ըսած ենք, որ մեր գործողութիւնները անձերով չենք պայմանաւորեր, մենք չէինք բացառեր նաեւ, որ Սերժ Սարգսեան կրնայ վաղը պաշտօն մը զբաղեցնել», ըսաւ ան:

Ռուստամեան ըսաւ, որ, ըստ սահմանադրութեան, իւրաքանչիւր կէս տարին անգամ մը խորհրդարանը կրնայ անվստահութիւն յայտնել վարչապետին: «1/3ը կրնայ անվստահութիւն յայտնել վարչապետին, իսկ այսօր ընդդիմութիւնը այդքան է», ըսաւ ան:

Ըստ ՀՅԴ պատգամաւորին՝ իրենք Սերժ Սարգսեանէն կ՛ակնկալեն, որ բարեփոխումներու գործընթացը, որ ան ստանձնած է, աւարտին հասցնէ:

«Սերժ Սարգսեանն ալ պիտի ապացուցէ, որ այս փոփոխութիւնները ժողովուրդին համար էին: Ամենավատ տարբերակին պարագային ալ մեր երկիրը կ՛ուղղուի շատ աւելի հաւասարակշռուած իշխանութիւն ունենալու ուղիով: Հիմնական սպառնալիքը, զոր կը տեսնենք, նահանջի չուղղուիլն է այս անգամ ալ նախագահական ճամբով», ըսաւ ան:

Ռուստամեան նաեւ աւելցուց, որ Ազգային Ժողովին յատուկ նիստը պիտի գումարեն, որովհետեւ ի վերջոյ վարչապետը կը ծնի Ազգային Ժողովէն՝ աւելցնելով, որ ան որեւէ «հաւանական խափանում» չի տեսներ վաղուան նիստին գծով:

ՀՅԴի նախարարական պաշտօններուն անդրադառնալով՝ ՀՅԴ խմբակցութեան ղեկավարը ըսաւ, որ հաւանաբար յատուկ փոփոխութիւններ չըլլան:

«Բայց հետագային չեմ բացառեր, որ կառավարութեան մէջ փոփոխութիւններ տեղի ունենան, որովհետեւ այսօր կարեւոր կը նկատուին նաեւ անհատական կառավարման հարցերը, որոնց նախարարներ պէտք է ստոյգ պատասխան տան իրենց ոլորտներու ձեռքբերումներուն համար», նկատել տուաւ ան:

Արմէն Ռուստամեան նոյն ճեպազրոյցին ընթացքին յայտնեց, որ 16 Ապրիլին դիւրութեամբ հասած է աշխատավայր՝ խորհրդարան, հակառակ Երեւանի փողոցներուն մէջ երթեւեկութեան կաթուածահար վիճակին:

«Ես առիթ ունեցայ գնահատելու այն, ինչը տեղի կ՛ունենայ. ընդդիմութիւնը միշտ պիտի փորձէ աշխատիլ օրէնքի շրջանակներուն մէջ, եթէ օրէնքէն դուրս գայ, իշխանութեան առիթ պիտի տայ աշխատիլ թոյլատրելի զինանոցով», ըսաւ ան:

Ըստ Ռուստամեանի՝ իշխանութիւնները կ՛արձագանգեն ըստ անհրաժեշտութեան: Նոյն ատեն ան կոչ ուղղեց ոստիկանութեան զուսպ ըլլալու: «Մենք տեսած ենք օրեր շարունակ փակ փողոցներ, անոնք, ի վերջոյ, բացուած են, հարցը այն է, որ անոնք այնպիսի գործողութիւններ են, որոնք իշխանութեան կողմէ համապատասխան արձագանգի պիտի արժանանան», նկատեց պատգամաւորը:

Ռուստամեան յայտնեց, որեւէ երկրին մէջ նման գործողութիւններ օրինական չեն համարուիր: «Որեւէ տեղ տեսա՞ծ էք, որ կարելի է մտնել, ձայնասփիւռի շէնք գրաւել, գլխաւոր փողոցները փակել, ո՞ր մէկ երկրին մէջ ատիկա թոյլատրուած է, ոչ մէկ պայմանագիրով նման բան թոյլատրուած է», յայտնեց ան:

Ըստ պատգամաւորին՝ Սերժ Սարգսեանի վարչապետութեան դէմ պայքարողները կ՛առաջնորդուին «նպատակը կ՛արդարացնէ միջոցը» սկզբունքով, ինչ որ միշտ վատ հետեւանքներ կ՛ունենայ:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top