Փաշինեան Կառավարութեան Աշխատակազմին Ներկայացուց Նորանշանակ Փոխվարչապետները

ԵՐԵՒԱՆ.- Հայաստանի վարչապետ Նիկոլ Փաշինեան կառավարութեան աշխատակազմին ներկայացուց առաջին փոխվարչապետ Արարատ Միրզոյեանը, փոխվարչապետներ Տիգրան Աւինեանը եւ Մհեր Գրիգորեանը: Այս մասին կը տեղեկացնէ Հայաստանի վարչապետի պաշտօնական կայքը:

Կառավարութեան ղեկավարը շնորհաւորեց փոխվարչապետները՝ կառավարութեան կազմին մէջ ընդգրկուելնուն առիթով եւ մաղթեց յաջողութիւն: «Մենք կարեւոր աշխատանք ունինք տանելիք եւ պէտք է արդարացնենք Հայաստանի Հանրապետութեան քաղաքացիներու եւ հայ ժողովուրդի յոյսերը, որովհետեւ պէտք չէ մոռնանք, որ այստեղ ենք՝ ժողովուրդին որոշումով եւ այստեղէն պէտք է հեռանանք դարձեալ անոր որոշումով: Ասոնք են մեր գործունէութեան մեկնարկի եւ աւարտի մասին պատկերացումները եւ այս միջակայքի ծիրին մէջ պէտք է ծառայենք Հայաստանի քաղաքացիներուն ու հայ ժողովուրդին: Կառավարութեան գործունէութիւնը պիտի ըլլայ հետեւեալ տրամաբանութեամբ՝ պէտք է արդիւնաւէտ քայլեր իրականացնենք եւ եթէ որեւէ քայլի ճշմարտացիութեան հարցով համոզուած ենք, հաշուի առնելով գոյութիւն ունեցող փաստարկները, ուրեմն պէտք է զանոնք կիսենք հանրութեան հետ եւ կարենանք համոզել զայն նոյն կերպով՝ այնպէս, ինչպէս համոզուած ենք մենք», ըսաւ Նիկոլ Փաշինեան՝ աւելցնելով, որ այսպէս պիտի ըլլայ կառավարութեան գործելակերպը, որ կը բխի ժողովրդավարութեան կանոններէն: Ըստ վարչապետին՝ Հայաստանի քաղաքացին պէտք է զգայ, որ ինքն է որոշումներու կայացման ամենակարեւոր աղբիւրը:

Նոյն ժամանակ, Նիկոլ Փաշինեան շեշտեց, որ գործադիրը պէտք չէ ընթանայ ժողովրդական ճանապարհով, իսկ բոլոր գործողութիւնները իրականացնելու ընթացքին պէտք է ունենայ քաղաքացիներուն իրաւագիրը: «Անոնք պէտք է համոզուած ըլլան, որ մենք կ՛առնենք առաւել արդիւնաւէտ քայլեր: Այս գործընթացի կազմակերպման ամենակարեւոր դերակատարները փոխվարչապետներն են, եւ ես յաջողութիւն կը մաղթեմ ձեզի՝ ձեր գործունէութեան մէջ: Պէտք է առաւելագոյնը ընենք, որպէսզի Հայաստանի եւ Սփիւռքի լաւագոյն ներուժը համախմբենք մեր կառավարութեան շուրջ: Գնահատման չափանիշը պէտք է ըլլայ մասնագիտական մօտեցումը եւ նուիրուածութիւնը աշխատանքին: Կը կարծեմ, որ պիտի առաջնորդուինք հետեւեալ սկզբունքով. անոնք, որոնք պիտի համապատասխանեն այդ չափանիշներուն, պիտի շարունակեն աշխատիլ: Իւրաքանչիւրը ցոյց պիտի տայ իր աշխատանքին արդիւնաւէտութիւնը եւ պիտի ուզէ աշխատիլ, անշուշտ, շնորհակալ պիտի ըլլանք, որ շարունակէ իր ծառայութիւնը Հայաստանի Հանրապետութեան եւ ժողովուրդին», նշեց Նիկոլ Փաշինեան։

Առաջին փոխվարչապետ Արարատ Միրզոյեան շնորհակալութիւն յայտնեց կառավարութեան ղեկավարին՝ վստահութեան համար եւ ընդգծեց, որ կը կիսէ վարչապետի ներկայացուցած մօտեցումները եւ սկզբունքները՝ իշխանութեան աղբիւրի՝ քաղաքացիներու, անընդհատ անոնց հաշուետու ըլլալուն վերաբերեալ: «Կը կարծեմ, որ առաջադրանքը բաւական յստակ է, եւ ներկաներն ու հանրութիւնը յստակ կը գիտակցին, որ կ՛ապրինք նոր Հայաստանի մէջ, որ գծուած է յստակ գիծ: Բոլորս գիտենք ինչէն պէտք է ազատիլ, եւ մենք շատ հաստատուն ու վճռական քայլերով պիտի երթանք այդ ուղղութեամբ», նշած է Արարատ Միրզոյեան: Առաջին փոխվարչապետը յոյս յայտնած է, որ պետական աշխատակազմի բոլոր ներկայացուցիչները, ներառեալ՝ կառավարութեան աշխատակազմը, յստակ կը գիտակցին իր առջեւ դրուած խնդիրը:

Փոխվարչապետ Տիգրան Աւինեան յայտնած է իր համոզումը, որ նոր կառավարութեան հիմնական գործունէութեան արդիւնքները պիտի ըլլան իրական փոփոխութիւնները, որոնք սպասուած են: «Կը կարծեմ՝ այն փոփոխութիւնները, զորս պիտի իրականացնէ այս կառավարութիւնը՝ Հայաստանի Հանրապետութեան համար պիտի ըլլան աննախադէպ: Կ՛ակնկալեմ, որ կարճ ժամանակահատուածի մը մէջ կառավարման համակարգին մէջ պիտի ունենանք տրամաբանութեան լրջագոյն փոփոխութիւն», ըսաւ Տիգրան Աւինեան՝ վստահութիւն յայտնելով, որ կառավարութիւնը պիտի արձանագրէ լուրջ արդիւնքներ:

Փոխվարչապետ Մհեր Գրիգորեան կարեւոր համարեց միասնական աշխատանքն ու կարեւորագոյն ծրագիրներու իրականացումը՝ ի նպաստ ժողովուրդի բարեկեցութեան մակարդակի բարձրացման:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top