Ամերիկեան Դատարանը Բանտարկութեան Դատապարտեց Թուրք Պաշտօնատարը

Մեհմետ Հաքան Աթիլլա եւ Ռեզա Զարապ
Մեհմետ Հաքան Աթիլլա եւ Ռեզա Զարապ

Մեհմետ Հաքան Աթիլլա եւ Ռեզա Զարապ

ՆԻՒ ԵՈՐՔ, «Ռոյթըրզ».- Մանհեթըն շրջանի դատարան մը Մայիս 16ին 32 ամսուան բանտարկութեան դատապարտեց Թուրքիոյ պետական «Հալքպանք» դրամատան ղեկավարներէն Մեհմետ Հաքան Աթիլլան։

Դատաւոր Ռիչըրտ Պըրմըն «Հալպանք»ի 20 տարիներու կառավարիչի տեղակալ Աթիլլան մեղաւոր համարեց՝ Իրանի դէմ Միացեալ Նահանգներու սահմանած պատժամիջոցները շրջանցելով Իրանի հետ անօրինական գործառքներ իրականացնելու յանցանքով:

Աթիլլա, որ անցեալ տարի ձերբակալուած էր, այս վճիռէն ետք տակաւին 18 ամիս բանտարկուած պիտի մնայ։ Դատախազութիւնը պահանջած էր 20 տարուան բանտարկութիւն:

Թուրքիոյ փոխվարչապետ Պեքիր Պոզտաղ ամերիկեան դատարանին վճիռը «քաղաքական» որակեց Մայիս 17ին, իսկ Թուրքիոյ արտաքին գործոց նախարարութիւնը յայտարարեց, թէ Աթիլլայի դատավճիռը անօրինակա՛ն է եւ չի համապատասխաներ արդարադատութեան սկզբունքներուն, քանի որ անիկա հիմնուած է այլախոհ կրօնական Ֆեթուլլահ Կիւլենի կողմնակիցներուն տրամադրած կեղծ վկայութիւններուն վրայ:

Նախարարութեան ակնարկութիւնը կ՛երթայ Թուրքիոյ եւ Իրանի քաղաքացի, ոսկիի առեւտրական Ռեզա Զարապին, որ նմանապէս այս հարցով ձերբակալուած էր ու ընդունած էր իր յանցանքը, իսկ այժմ կը գործակցի հետաքննութիւնը իրականացնողներուն հետ:

Հարցը կը վերաբերի 2010-2015 տարիներուն իրականացուած եւ «ոսկի՝ քարիւղի փոխարէն» անունով ծանօթ գործառքին։ Անոր միջոցաւ եւ Անգարայի գիտակցութեամբ կարելի եղած է շրջանցել ամերիկեան պատժամիջոցները՝ միլիոնաւոր տոլարի շահեր ապահովելով գործառքի դերակատարներուն, որոնց մէջ են նաեւ Թուրքիոյ նախագահ Էրտողանի եւ անոր կառավարութեան ու ընտանիքի անդամները։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top