500 Հաւատացեալներու Մասնակցութեամբ՝ Սան Տիէկոյի Ս. Յովհաննու Կարապետ Եկեղեցւոյ Նոր Համալիրի Հիմնարկէք

0000stjohngarabedsd3

0000stjohngarabedsd3ՍԱՆ ՏԻԷԿՕ.- 500 հաւատացեալներու մասնակցութեամբ, Կիրակի, Ապրիլ 29ին կայացաւ Սան Տիէկոյի Ս. Յովհաննու Կարապետ Հայց. առաքելական եկեղեցւոյ նոր համալիրին հիմնարկէքի պաշտօնական արարողութիւնը՝ առաջնորդ Յովնան արք. Տէրտէրեանի հովանիին տակ։

Առաջնորդի կողքին էին եկեղեցւոյ հոգեւոր հովիւ Բագրատ Ծ. վրդ. Պերճէքեան եւ Արեւմտեան թեմի հոգեւորականներէն Մանուկ վրդ. Մարգարեան, իսկ երգեցողութիւնը կատարեց «Խաչատուրեան» երգչախումբը, առաջնորդութեամբ Ստեփան սրկ. Կոզումեանի։

Արարողութեան բացումը կատարեց ծխական խորհուրդի ատենապետ դոկտ. Պերճ Մինասեան, որ շնորհակալութիւն յայտնեց համայնքին, առաջնորդին եւ հոգեւոր հովիւին, որոնք նպաստեցին ծրագիրը այս կենսական հանգրուանին հասցնելու ջանքերուն։

Հանդիսավարութիւնը ստանձնած էր շինարարական յանձնախումբի ատենապետ Ճիմ Սահակեան, որ մանրամասնութիւններ փոխանցեց ծրագիրի յառաջդիմութեան մասին՝ ուրախութիւն յայտնելով, որ արդէն իսկ 800,000 տոլարի խոստումներ կատարուած են շինարարութեան ծրագիրը ի-րականացնելու համար, միաժամանակ աւելցնելով, որ աւելին հարկաւոր է՝ ծրագիրին ամբողջացումը ապահովելու համար։ Ան նաեւ շնորհակալութիւն յայտնեց բոլոր նուիրատուներուն եւ կամաւորներուն, որոնք իրենց ներդրումը կ՛ունենան այս ծրագիրին մէջ։

Արարողութեան գլխաւոր բանախօսն էր առաջնորդ Յովնան արք. Տէրտէրեան, որ ծրագիրը նմանցուց ապագայ սերունդներուն հասնող կամուրջի մը, որուն առաջին քայլը առնուեցաւ այդ օրը։

0000stjohngarabedsd1

Նշենք, որ արարողութեան ներկայ էին նաեւ եկեղեցւոյ Կիրակնօրեայի 40 աշակերտները։

Առաջնորդը շնորհակալութիւն յայտնեց նաեւ ծխական խորհուրդին, բոլոր յանձնախումբերուն եւ նուիրատուներուն, յատկապէս եկեղեցւոյ հիմնադրամի յանձնախումբի ատենապետ Հէրի Գրիգորեանին, որուն յանձնեց յուշանուէր մը։

Փակման խօսքը արտասանեց եկեղեցւոյ հոգեւոր հովիւ Բագրատ Ծ. վրդ. Պերճէքեան, որմէ ետք ելոյթ ունեցան Կիրակնօրեայի 40 աշակերտները։ Ապա, առաջնորդին գլխաւորութեամբ տեղի ունեցաւ հիմնարկէքի արարողութիւն, որմէ ետք կատարուեցաւ հիւրասիրութիւն։

Եկեղեցւոյ նոր համալիրին հասցէն է՝ 13860 El Camino Real, San Diego, CA 92130:

Սան Տիէկոյի Ս. Յովհաննու Կարապետ եկեղեցւոյ նոր համալիրը պիտի կառուցուի Տել Մար քաղաքին մօտերը գտնուող տարածքի մը վրայ։ Անիկա պիտի իրականացուի հանգրուաններով, իսկ անոր աւարտին, շրջափակէն ներս պիտի կայանայ նոր եկեղեցի մը, ընկերային ձեռնարկներու յատուկ սրահ, երիտասարդական կեդրոն, մարզական սրահ, գրադարան, դասարաններ, դաշտահանդէսներու վայր եւ ընդարձակ կանգառ:

Յաւելեալ տեղեկութեանց կամ ծրագիրին աջակցելու համար, այցելել www.stjohngarabed.org կայքը, կամ դիմել jspaloalto@sbcglobal.net եւ stjohngarabedsd@gmail.com հասցէներուն:

0000stjohngarabedsd2

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top