Նիկոլ Աղաբաբեանի Գունագեղ Աշխարհը

0517nigolaghababian1

 

0517nigolaghababian1

ՏԻԳՐԱՆ ԷՔԻԶԵԱՆ

 

Ընդհանրապէս ամէն ազգ, ամէն ժողովուրդ ունեցած է իր տաղանդաւոր զաւակները, որոնցմով հարստացած է այդ ժողովուրդի մշակյոյթը: Հայ ժողովուրդն ալ, անշուշտ, բացառութիւն չէ եւ, իր կարգին ունեցած է մեծ ու հոյակապ տաղանդներ, որոնք անջնջելի հետքեր թողած են մեր մշակոյթին եւ բարձրորակ արուեստի հարուստ երկնակամարին վրայ։

Այդպիսի արուեստագէտներէն է հայրենի գեղանկարիչ Նիկոլ Աղաբաբեան, որուն արուեստը հաստատուն քայլերով կ՛ընթանայ դէպի այդ բարձունքը: Ան իր ամուր հետքը թողած է արդի հայ գեղանկարչութեան վրայ: Նիկոլի պաստառները, մեծ մասամբ բնանկարներ՝ աչքի կը զարնեն իրենց վառ գունագեղութեամբ եւ, անշուշտ, կ՛արտացոլեն նկարիչի մեծ սէրն ու նուիրուածութիւնը հանդէպ հայրենիքի եւ անոր չքնաղ բնութեան: Աղաբաբեանի արուեստին մէջ զգալի են հայրենի երկինքի կապոյտի ազդեցութիւնը: Կարծէք պաստառներուն մէջէն դուրս ժայթքող ջերմութիւնը կը բխի հայրենի հողի ընդերքէն, կը մտնէ դիտողի սիրտին ու հոգիին մէջ՝ իրեն համար մնայուն տեղ մը ապահովելով հոն։

Ահա թէ ի՛նչ կ՛ըսէ Հայաստանի Հանրապետութեան ժողովրդական նկարիչ փրոֆեսէօր Հրանդ Թադէոսեան Նիկոլի արուեստին առնչութեամբ. «Նիկոլի տաք գոյներից պատերն ասես ճաք են տալիս, դրանք լուռ մենախօսութիւններ են՝ հոգեկան խոր զգացումների մասին պատմող: Նկարչի կտաւներում բնութեան բազմաձեւութիւնները շատ մարդկային հնչեղութիւնն են ստացել: Դրանք իւրատեսակ մունետիկներ իբրեւ, մեզ յիշեցնում են մեր լինելիութիւնն ու կենսակերպն ապահովող կարեւոր մի գոյութեան մասին, որի հանդէպ մեր վերաբերմունքն անցել է դաժանութեան սահմանները: Մինչդեռ Նիկոլը մի անսովոր դաշինք է կնքել բնութեան հետ ու գունային յուզախռով սքանչելի մի բանաստեղծութիւն ձօնել նրան: Նկարներից մէկը հեռուից ներսումդ տաք ալիք է բարձրացնում, խառնում մտքերդ, զգացմունքներդ աշխոյժացնում, ասես մեղեդի ես լսում, նկարը խօսում է հետդ թրթռացող, վէտվէտացող գոյների լեզուով»։

Նիկոլ Աղաբաբեան մեղմ եւ հանդարտ էութիւն մըն է, սակայն ներքուստ ան միշտ պայքարած է մեր կեանքին մէջ գոյութիւն ունեցող անարդարութիւններուն դէմ: Պատահական չէ, որ Արցախեան ազատամարտի առաջին իսկ օրերէն Նիկոլը անդամագրուեցաւ Ազատութեան Բանակին՝ ձեռնամուխ ըլլալով հայրենիքի պաշտպանութեան սրբազան գործին: Իր կտաւներէն մէկը նուիրուած է այդ պայքարին եւ կը կոչուի «Այո՛, Յաղթեցինք»։

Նիկոլի արուեստին մասին Հայաստանի Հանրապետութեան Գեղարուեստի ակադեմիոյ տնօրէն, Հայաստանի Հանրապետութեան արուեստի վաստակաւոր գործիչ, փրոֆեսէօր Արամ Իսաբեկեան կ՛ըսէ. «Նիկոլ Աղաբաբեանը Հայաստանի Հանրապետութեան ամենաճանաչուած նկարիչներից է: Այդ հանգամանքը հաստատում է նաեւ Հայաստանի մշակոյթի նախարարութեան «Ոսկէ մետալ» եւ Հայաստանի սփիւռքի նախարարութեան «Արշիլ Կորքի» մետալներով պարգեւատրուելը: Նա ունի ինքնուրոյն ձեռագիր, որը ակնյայտօրէն առանձնանում է մերօրեայ բազում ձեռագրերից: Նիկոլ Աղաբաբեանի գեղանկարչութեան կշիռը ակնյայտօրէն օր օրի կը հզորացնի կերպարուեստի աշխարհը»։

Նիկոլ Աղաբաբեան ծնած է 1964ին, Տաւուշի մարզի Կողբ գիւղը: Աւարտած է Երեւանի Պետական մանկավարժական համալսարանի գեղանկարչութեան բաժինը: 1992էն ի վեր անդամ է Հայաստանի նկարիչներու միութեան, ինչպէս նաեւ ԵՈՒՆԵՍՔՕի Մասնագէտ նկարիչներու մի-ջազգային միութեան: Ան ունեցած է առաւել քան 70 անհատական ցուցահանդէսներ Հայաստանի եւ արտերկրեայ տարբեր քաղաքներու մէջ, ինչպէս՝ Հռոմ, Միլան, Վենետիկ, Փարիզ, Մոնթէ Քարլօ, Քանն, Նիս, Նիւ Եորք, Սան Փեթերսպուրկ, Պերլին, Մատրիտ եւ այլն: Նիկոլի գեղանկարչական աշխատանքները կը գտնուին ժամանակակից արուեստի թանգարաններու ցուցասրահներու եւ անձնական հաւաքածոներու մէջ, որոնց շարքին է Հայաստանի Պետական պատկերասրահը, Գերմանիոյ Մշակոյթի նախարարութեան թանգարանը, Նիւ Եորքի Ս. Վարդան եկեղեցուոյ թանգարանը եւ Չինաստանի Պետական թանգարանը: Ինչպէս վերեւը նշուեցաւ, իր գործերը մաս կը կազմեն նաեւ յայտնի անձնաւորութիւններու անձնական հաւաքածոներու, ինչպէս՝ «Օրորա»ի հիմնադիր Ռուբէն Վարդանեանի, «Կազպրոմ»ի տնօրէն՝ Ալէքսէյ Միւլերի, Փարիզէն Արմէն Պօղոսեանի եւ Թամարա Քոչարեան–Պետրոսեանի, Ստենֆորտի համալսարանէն փրոֆեսէօր Թինա Սիլինկի, Զիկրիտ Միւլեր Հոլցի, Փիեռ Կարտանի եւ այլոց։

Ներկայիս, Նիկոլ կը գտնուի Լոս Անճելըս, իր տիկնոջ եւ դստեր հետ: Համայնքիս արուեստասէր հասարակայնութիւնը շատ շուտով՝ Յունիս ամսուան սկիզբը, առիթը պիտի ունենայ վայելելու Նիկոլ Աղաբաբեանի գործերու ցուցահանդէսը՝ ՀԲԸՄի «Պոյաճեան» սրահին մէջ, Փասատինա:

Այս մասին աւելի մանրամասնօրէն համայնքը կը տեղեկացուի ծանուցումներու միջոցով։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top