Օսման Քաւալան Անյապաղ Ազատ Արձակելու Կոչ

0522Kavala

0522Kavala

ՊՈԼԻՍ, «Մարմարա».- «Ճումհուրիյէթ» թերթը արձագանգ կը հանդիսանայ այն կոչին, որ հրապարակուեցաւ՝ զօրակցելու համար «Անատոլուի մշակոյթ» հիմնարկի ձերբակալեալ նախագահ Օսման Քաւալային։ Ինչպէս ծանօթ է, Օսման Քաւալա 2017ի Նոյեմբերին ձերբակալուեցաւ եւ մինչեւ այսօր չէ հրապարակուած, թէ ի՞նչ յանցանքով բանտարկուած կը մնայ։

Քաւալան ազատ արձակելու մասին հրապարակաւ կոչ ուղղեցին «Ժողովրդավար կեանքի սատարող միութիւն»ի նախագահ Այսել Չելիքել, սպաննուած լրագրող Հրանդ Տինքի այրին՝ Ռաքել Տինք, Պօղազիչի համալսարանի նախկին վերատեսուչներէն՝ Իւսթիւն Էրկիւտեր եւ Այշէ Սոյսալ, Պոլսոյ փաստաբանական կաճառի նախկին նախագահներէն՝ Թուրկութ Քազան ու Եուճել Սայման, ինչպէս նաեւ նախկին դիւանագէտ Մուրատ Էօզչելիք։ Արդարեւ, կոչ ուղղուեցաւ, որ դատախազութիւնը կա՛մ լուրջ մեղադրական ներկայացնէ, կա՛մ անյապաղ ազատ արձակէ Քաւալան։

Հրապարակուած կոչին մէջ կ՛ըսուի. «Կը հաւատանք, որ պատասխանատուութեան մեր բաժինն ունինք երկրի շահերուն մէջ, եւ այդ պատասխանատուութիւններէն մէկն ալ անիրաւութիւններու մասին խօսիլն է, իրականութիւններու մասին վկայելն է։ Մեզմէ իւրաքանչիւրը կրնայ վկայել, թէ ան յարգարժան, համեստ եւ ժողովրդավար անհատականութիւն մըն է։ Քաւալա վեց ամիսէ ի վեր բանտարկուած կը մնայ։ Անձ մը այսքա՛ն երկար ատեն ձերբակալուած եւ իր ազատութիւններէն զերծ պահելու համար, շա՛տ հաստատ ապացոյցներ պէտք է ըլլան։ Բայց դժբախտաբար մէջտեղը մեղադրական մ՛իսկ չկայ։ Քաւալայի նման յարգարժան մարդու մը նկատմամբ գործադրուած այսպիսի քայլ՝ մեր եւ մեր հաւաքականութեան խիղճը կը վիրաւորէ։ Հաւաքականութեան մը անդամները պարտաւոր չեն համակարծիք ըլլալու ամէն նիւթի շուրջ, բայց չեն կրնար իրարու խիղճէն եւ իրաւական մարմիններէն իրենց յոյսը կտրել»։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top